គ្រួសារក្រីក្រ និងចាស់ជរាគ្មានទីពឹង៥០គ្រួសារ ទទួលអំណោយពីរាជរដ្ឋាភិបាល តាមរយៈ​ក្រុមការងាររាជរដ្ឋាភិបាលចុះសង្កាត់កំពង់ឆ្នាំង

កំពង់ឆ្នាំង៖ នៅព្រឹកថ្ងៃទី២០ ខែកញ្ញា ឆ្នាំ២០២៤នេះ លោកជំទាវ ទន់ សាអីម ប្រធាន​ក្រុម​ការងារ​រាជរដ្ឋាភិបាលចុះសង្កាត់កំពង់ឆ្នាំង លោកជំទាវ សឿ សុជាតា អនុប្រធាន​ក្រុម​ការងារ​រាជ​រដ្ឋាភិបាល​ចុះ​សង្កាត់កំពង់ឆ្នាំង និងក្រុមការងារ បានចុះជួបសួរសុខទុក្ខគ្រួសារក្រីក្រ និងចាស់ជរា​គ្មាន​ទីពឹង និងផ្តល់អំណោយជូនពួកគាត់ចំនួន៥០គ្រួសារ ស្ថិតក្នុងសង្កាត់កំពង់ឆ្នាំង ក្រុងកំពង់​ឆ្នាំង ខេត្តកំពង់ឆ្នាំង ។

លោកជំទាវ ទន់ សាអីម បានថ្លែងថា៖ គ្រឿងឧបភោគបរិភោគ ដែលយកមកផ្តល់ជូននាពេលនេះ គឺជា​ការ​គិតគូរយកចិត្តទុកដាក់ពីរាជរដ្ឋាភិបាល និងបានពាំនាំ​ការ​ផ្ដាំ​ផ្ញើ​សួរ​សុខ​ទុក្ខ​ពី​សំណាក់​សម្ដេច​ធិបតី ហ៊ុន ម៉ាណែត នាយករដ្ឋមន្ត្រី ដែលគ្រប់ពេលវេលា សម្ដេចតែងតែ​គិតគូរ​ពី​សុខទុក្ខ​របស់​​ប្រជាពលរដ្ឋដែលងាយរងគ្រោះ ចាស់ជរាគ្មានទីពឹង ជនមានពិការភាព កុមារកំព្រា អ្នករស់​នៅ​ជាមួយមេរោគអេដស៍ជាដើម ទោះបីជាអំណោយទាំងនេះមានតិចតួចក្តី ប៉ុន្តែក៏អាច​ជួយ​សម្រាល​ការ​លំបាកបានមួយកម្រិតក្នុងរដូវបុណ្យភ្ជុំប្រពៃណីខ្មែរនេះ។ លោកជំទាវ ក៏បាន​អំពាវ​នាវ​ដល់ប្រជាពលរដ្ឋទាំងអស់ត្រូវចេះថែរក្សាសុខភាព ត្រូវរក្សាអនាម័យដោយការរស់នៅស្អាត ហូប​ស្អាត ផឹកស្អាត ដើម្បីអោយសុខភាពយើងល្អ និងបាន​មើល​ឃើញ​នូវ​ការ​អភិវឌ្ឍន៍​ប្រទេស​ជាតិ​គ្រប់​ទីកន្លែងរបស់រាជរដ្ឋាភិបាលកម្ពុជា។

ប្រជាពលរដ្ឋចាស់ជរា និងគ្រួសារក្រីក្រ បានថ្លែងអំណរគុណរាជរដ្ឋាភិបាល ជាពិសេស​សម្តេច​ធិបតី ហ៊ុន ម៉ាណែត នាយករដ្ឋមន្ត្រីដែលបានយកចិត្តទុកដាក់ពីសុខទុក្ខប្រជាពលរដ្ឋទាំងអស់ និង​បាន​ជួយដល់ពួកគាត់ក្នុងគ្រាលំបាកគ្រប់ពេលវេលា។

ក្រោមការដឹកនាំ​របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា អាណត្តិទី៧នេះ បាន​បន្ត​ធ្វើ​ឲ្យ​ប្រទេសមានសុខសន្តិភាព និងបានកសាងអភិវឌ្ឍន៍ហេដ្ឋរចនាសម្ព័ន្ធ លើគ្រប់វិស័យ ព្រម​ទាំងបានយកចិត្តទុកដាក់គិតគូសុខទុក្ខរបស់ប្រជាពលរដ្ឋទូទាំងប្រទេស គឺមិន​ឲ្យ​ប្រជា​ពលរដ្ឋ​ខ្វះ​ខាតលំបាកអ្វីឡើយ ជាក់ស្តែងដូចដែលក្រុមការងារបានចុះមកដល់នៅទីនេះស្រាប់៕ កាំង ហុងវាស្នា