បេក្ខជន ១,២០០នាក់ ដាក់ពាក្យធ្វើអ្នកស្ម័គ្រចិត្តក្នុងព្រឹត្តិការណ៍កីឡាជាតិ លើកទី៤

យុវជន-យុវតីប្រមាណ ១,២០០នាក់ បានដាក់ពាក្យចូលរួមបម្រើការងារក្នុងព្រឹត្តិការណ៍​កីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ ដែលនឹងប្រព្រឹត្តទៅ នាថ្ងៃទី២៩ ខែតុលា ដល់ថ្ងៃទី០៨ ខែវិច្ឆិកាខាងមុខ ។ នេះបើយោងតាមការជូនដំណឹងរបស់អគ្គនាយកដ្ឋានកីឡា នៃក្រសួងអប់រំ យុវជន និងកីឡា ។

គណៈកម្មការអ្នកស្ម័គ្រចិត្ត នៃព្រឹត្តិការណ៍កីឡាជាតិ បានជូនដំណឹងដល់បេក្ខជនដែលបានចុះឈ្មោះទាំងអស់ ត្រូវត្រៀមខ្លួនចូលរួមធ្វើការសម្ភាសន៍រយៈពេល ៣ថ្ងៃ នៅថ្ងៃទី២៣, ២៤ និងថ្ងៃទី២៥ ខែកញ្ញាខាងមុខ ដើម្បីកំណត់យកបេក្ខជនប្រមាណ ៦០០ ទៅ ៧០០នាក់ សម្រាប់ចូលរួមចំណែកក្នុងដំណើរការប្រកួតកីឡាជាតិ លើកទី៤ និងកីឡាជាតិជនពិការ លើកទី២ នាខែក្រោយ ។ នេះបើតាមការបញ្ជាក់របស់ឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា កាលពីថ្មីៗ ។

យោងតាមសេចក្ដីជូនដំណឹងរបស់អគ្គនាយកដ្ឋានកីឡា កំឡុងបើកទទួលពាក្យស្នើសុំជាអ្នកស្ម័គ្រចិត្ដ កាលពីថ្មីៗ បានបញ្ជាក់ដែលថា សម្រាប់អត្ថប្រយោជន៍ ដែលបេក្ខជនជាប់ជាអ្នកស្ម័គ្រចិត្តនេះ នឹងទទួលបាននូវឯកសណ្ឋានអ្នកស្ម័គ្រចិត្ត កាតសម្គាល់ខ្លួន និងទទួលបាននូវលិខិតថ្លែងអំណរគុណពីគណកម្មការរៀបចំព្រឹត្តិការណ៍ការប្រកួតកីឡាជាតិប្រចាំ ២ឆ្នាំម្ដងនេះផងដែរ ។

គួរដឹងថា ពិធីបើកការប្រកួតកីឡាជាតិ លើកទី៤ និងកីឡាជាតិជនពិការ លើកទី២ នឹងប្រារព្ធពិធីបើកផ្លូវការ នាថ្ងៃទី៣០ ខែតុលា ក្រោមអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងពិធីបិទ នឹងធ្វើឡើងនាថ្ងៃទី០៨ ខែវិច្ឆិកា ឆ្នាំ២០២៤ នៅវិមានពហុកីឡដ្ឋានជាតិអូឡាំពិកដូចគ្នា ក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា និងជាតំណាងដ៏ខ្ពង់ខ្ពស់របស់សម្ដេចធិបតីនាយករដ្ឋមន្ដ្រី៕ អត្ថបទ លី ឈុនឡា