ម៉ិកស៊ិក ប្រារព្ធខួបនៃការរញ្ជួយដីដ៏មហន្តរាយ ដោយមានការធ្វើសមយុទ្ធ

ប្រជាជននៅក្នុងទីក្រុង Mexico City បានជម្លៀសខ្លួនចេញពីអគារ និងលំនៅឋានសម្រាប់ការធ្វើសមយុទ្ធរញ្ជួយដីបន្ទាន់មួយ កាលពីថ្ងៃព្រហស្បតិ៍ ទី១៩ ខែកញ្ញា ជាកាលបរិច្ឆេទមួយ ដែលប្រារព្ធខួបនៃការបំផ្លិចបំផ្លាញដោយរញ្ជួយដី ឆ្នាំ២០១៧ និងឆ្នាំ១៩៨៥។

អាជ្ញាធរ បានបន្លឺសំឡេងកណ្តឹងរោទិ៍រញ្ជួយដី នៅទីក្រុង Mexico City ហើយបុគ្គលិកការិយាល័យបានចាប់ផ្តើមអនុវត្តការរត់ចេញ សម្រាប់ការជម្លៀសខ្លួនចេញពីអគារជាបន្ទាន់។

ប្រធានាធិបតីម៉ិកស៊ិក លោក Lopez Obrador រួមជាមួយប្រធានាធិបតីជាប់ឆ្នោតថ្មី លោកស្រី ក្លៅឌៀ សេនបោម(Claudia Sheinbaum) និងមន្ត្រីជាច្រើនរូប បានប្រារព្ធពិធីគោរពវិញ្ញាណក្ខន្ធជនរងគ្រោះដោយរញ្ជួយដី ឆ្នាំ២០១៧ និងឆ្នាំ១៩៨៥។

ក្នុងឆ្នាំ២០១៧ គ្រោះរញ្ជួយដីកម្រិត៧,១ រ៉ិចទ័រ បានវាយប្រហារនៅភាគកណ្តាលប្រទេសម៉ិកស៊ិក បណ្តាលឲ្យមនុស្សចំនួន៣៧០នាក់ស្លាប់ ភាគច្រើននៅក្នុងរដ្ឋធានី។ អគាររាប់ម៉ឺនខ្នងត្រូវបានបំផ្លាញ ហើយមនុស្សរាប់សិបនាក់ស្លាប់ខណៈសាលារៀន និងការិយាល័យ បានបាក់រលំ។

រញ្ជួយដី បានអង្រួនប្រទេសនេះក្នុងរយៈពេលត្រឹមតែ១២ ថ្ងៃបន្ទាប់ពីការរញ្ជួយដីដែលមានកម្លាំងខ្លាំង ដាច់ដោយឡែកមួយផ្សេងទៀត ដែលបានវាយប្រហារនៅឆ្នេរសមុទ្រភាគនិរតីប្រទេស បណ្តាលឲ្យមនុស្សប្រហែល១០០នាក់ស្លាប់។

ប៉ុន្តែខួបមួយផ្សេងទៀតក៏បានធ្វើឡើងនៅថ្ងៃដដែលនេះដែរ ដែលត្រូវបានចារទុកក្នុងចិត្តប្រជាជនវ័យចំណាស់នៅក្នុងរដ្ឋធានីសម្រាប់ការចងចាំពីការរញ្ជួយដីដ៏ធំ បណ្តាលឲ្យមនុស្សរាប់ពាន់នាក់ស្លាប់ក្នុងឆ្នាំ ១៩៨៥។