លោក Zelenskiy ស្វះស្វែងរកសន្តិភាពពិតប្រាកដសម្រាប់អ៊ុយក្រែន ក្នុងអំឡុងទស្សនកិច្ចនៅអាមេរិក

ប្រធានាធិបតីអ៊ុយក្រែន លោក វ្ល៉ូឌីមី ហ្សេឡិនស្គី (Volodymyr Zelenskiy) បានទៅដល់សហរដ្ឋអាមេរិក កាលពីថ្ងៃអាទិត្យ (២២ កញ្ញា) ដើម្បីចូលរួមសម័យប្រជុំនៅឯមហាសន្និបាតអង្គការសហប្រជាជាតិ (UNGA) ហើយបានជំរុញដៃគូរបស់លោកឱ្យជួយសម្រេចបាននូវ «ជ័យជម្នះរួមគ្នាសម្រាប់សន្តិភាពដ៏យុត្តិធម៌ពិតប្រាកដ»។

លោកបានសរសេរបង្ហោះនៅលើបណ្ដាញសង្គម X រួមជាមួយនឹងការថ្លែងតាមវីដេអូពេលយប់របស់ខ្លួនថា «រដូវស្លឹកឈើជ្រុះនេះ (សរទរដូវ) នឹងកំណត់អនាគតនៃសង្រ្គាម»។

លោក Zelenskiy បានធ្វើដំណើរសំចតដោយមិនបានប្រកាសជាមុននៅក្នុងទីក្រុងកំណើតរបស់លោកប្រធានាធិបតី Joe Biden នៅក្រុង ស្រ្កានថុន (Scranton) រដ្ឋ ផិនស៊ីលវេនៀ (Pennsylvania) ទៅរោងចក្រផលិតគ្រាប់រំសេវមួយកន្លែង ដែលលោកនិយាយថា កំពុងបង្កើនការផលិតដើម្បីជួយដល់សង្រ្គាមអ៊ុយក្រែន។

ដំណើរទស្សនកិច្ចរបស់លោក Zelenskiy ស្របពេលជាមួយកិច្ចខិតខំប្រឹងប្រែងរបស់អាមេរិក ក្នុងការរៀបចំកញ្ចប់ជំនួយយោធាចំនួន ៣៧៥លានដុល្លារសម្រាប់អ៊ុយក្រែន ខណៈលោកនិយាយថានឹងបង្ហាញ «ផែនការជ័យជម្នះ» នៅក្នុងសង្គ្រាមអ៊ុយក្រែនប្រឆាំងនឹងរុស្ស៊ី ជាលើកដំបូងទៅកាន់លោក Biden។ ប្រធានាធិបតីអ៊ុយក្រែនរូបនេះក៏នឹងពិភាក្សាពីផែនការនេះជាមួយអនុប្រធានាធិបតី លោកស្រី Kamala Harris នៅក្នុងកិច្ចប្រជុំដាច់ដោយឡែកនៅថ្ងៃព្រហស្បតិ៍ (២៦ កញ្ញា) ក៏ដូចជាជាមួយមេដឹកនាំពិភពលោកផ្សេងទៀត។

លោក Zelenskiy ក៏សង្ឃឹមថានឹងជួបបេក្ខជនប្រធានាធិបតីបក្សសាធារណរដ្ឋ លោក Donald Trump ដែលបានហៅជំនួយរបស់អាមេរិកដល់សម្ព័ន្ធមិត្តអឺរ៉ុបខាងកើតរបស់ខ្លួនថាខ្ជះខ្ជាយថវិកា។ លោក Trump និយាយថាលោកប្រហែលជានឹងជួបលោក Zelenskiy នៅសប្តាហ៍នេះ ប៉ុន្តែមិនទាន់មានកាលបរិច្ឆេទណាមួយត្រូវបានប្រកាសទេ។ ប្រធានាធិបតីអ៊ុយក្រែនរូបនេះនឹងថ្លែងនៅក្នុងកិច្ចប្រជុំកំពូលរបស់អង្គការសហប្រជាជាតិនៅថ្ងៃចន្ទ (២៣ កញ្ញា) នេះ បន្ទាប់មកថ្លែងក្នុងក្រុមប្រឹក្សាសន្តិសុខនៅថ្ងៃអង្គារ និងនៅមហាសន្និបាតនៅថ្ងៃពុធ៕