ចិនធ្វើសមយុទ្ធដែនសមុទ្រ នៅសមុទ្រចិនខាងត្បូង ខណៈអាមេរិក និងប្រទេសអាស៊ី-ប៉ាស៊ីហ្វិក ក៏ធ្វើលំហាត់សមរួមគ្នាដែរ

ប្រទេសចិនបានធ្វើសមយុទ្ធយោធា នៅក្នុងផ្នែកមួយនៃសមុទ្រចិនខាងត្បូង ខណៈរូបភាពត្រូវបានចាក់ផ្សាយដោយទូរទស្សន៍រដ្ឋ CCTV កាលពីថ្ងៃសៅរ៍ (ទី២៨ ខែកញ្ញា) ដោយបង្ហាញពីកងទ័ព នៅលើនាវា និងកំពុងកាន់អាវុធបាញ់ប្រហារ។

សមយុទ្ធនេះបានកើតឡើងក្នុងខណៈពេលដែលប្រទេសហ្វីលីពីន សហរដ្ឋអាមេរិក អូស្ត្រាលី ជប៉ុន និងនូវែលសេឡង់ ជាលើកដំបូង បានធ្វើសមយុទ្ធដែនសមុទ្ររួមគ្នា នៅក្នុងផ្លូវទឹកដែលមានជម្លោះនេះដែរ។

លំហាត់សមធ្វើសង្គ្រាមនេះកើតមានឡើង បន្ទាប់ពីមានការប្រឈមមុខដាក់គ្នាជាបន្តបន្ទាប់ ទាំងតាមផ្លូវអាកាស និងផ្លូវទឹក រវាងហ្វីលីពីន និងចិន ដែលបានមានជម្លោះលើតំបន់ប្រទាញប្រទង់ នៅសមុទ្រចិនខាងត្បូង ក្នុងនោះរួមទាំងតំបន់ថ្មប៉ប្រះទឹក Scarborough Shoal ដែលជាតំបន់ភូមិសាស្ត្រដ៏មានភាពចម្រូងចម្រាសបំផុតមួយរបស់អាស៊ី។ តំបន់នេះត្រូវបានកាន់ាប់ដោយឆ្មាំល្បាតឆ្នេររបស់ប្រទេសចិនអស់រយៈពេលជាង ១ទសវត្សរ៍មកហើយ។

គួរបញ្ជាក់ថា ប្រទេសចិនទាមទារស្ទើរតែស្រុងនៃតំបន់ ក្នុងសមុទ្រចិនខាងត្បូង បើទោះបីជាមានការទាមទារដែនសមុទ្រត្រួតស៊ីគ្នាពីប្រ៊ុយណេ ម៉ាឡេស៊ី ហ្វីលីពីន និងវៀតណាមក៏ដោយ ដោយការអះអាងនោះបានធ្វើឲ្យប្រទេសជិតខាងរបស់ខ្លួនខឹងសម្បា៕