ប្រព័ន្ធផ្សព្វផ្សាយ៖ ទូកនេសាទវៀតណាមរងការវាយប្រហារ ជិតប្រជុំកោះមានជម្លោះ ក្នុងសមុទ្រចិនខាងត្បូង

សារព័ត៌មានរដ្ឋ កាលពីយប់ថ្ងៃចន្ទ (ទី៣០ ខែកញ្ញា) បានរាយការណ៍ថា អ្នកនេសាទវៀតណាមយ៉ាងតិច១០នាក់ បានរងរបួស បន្ទាប់ពីទូករបស់ពួកគេ ត្រូវបានវាយប្រហារដោយនាវាបរទេស ខណៈពេលដែលកំពុងនេសាទ ក្នុងសមុទ្រចិនខាងត្បូង នៅជិតប្រជុំកោះ Paracel ដែលត្រូវបានទាមទារទាំងពីប្រទេសចិន និងវៀតណាម។

ដោយដកស្រង់សម្តីអាជ្ញាធរ នៅខេត្ត Quang Ngai ភាគកណ្តាល សារព័ត៌មាន Thanh Nien បានរាយការណ៍ថា ការវាយប្រហារនោះ បានកើតឡើងនៅថ្ងៃទី២៩ ខែកញ្ញា។ តែយ៉ាងណា សេចក្ដីរាយការណ៍ មិនបានផ្តល់ការពិពណ៌នាលម្អិត អំពីនាវាបរទេស ឬថា តើទូកនេសាទនោះត្រូវបានវាយប្រហារយ៉ាងដូចម្ដេច។

ដោយសម្អាងលើសម្ដីរបស់លោក Nguyen Thanh Bien កាពីតែននៃទូកនេសាទនោះ របាយការណ៍ បានឲ្យដឹងថា អ្នកនេសាទ ៣នាក់ ក្នុងចំណោមអ្នកនេសាទទាំងនោះ បានបាក់ជើង និងដៃ ដោយសារការវាយប្រហារនោះ។ របាយការណ៍បានបន្តថា ទូកនេសាទដែលមានអ្នកនេសាទ ១០នាក់នោះបានចេញដំណើរពីកំពង់ផែមួយក្នុងខេត្ត កាលពីថ្ងៃទី១៣ ខែកញ្ញា។

ក្រសួងការបរទេសវៀតណាម និងចិន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់ារព័ត៌មាន Reuters។ តែសេចក្ដីរាយការណ៍នោះ បានបន្ថែមថា អាជ្ញាធរវៀតណាមកំពុងស៊ើបអង្កេតលើហេតុការណ៍នេះ៕