[UPDATE] មនុស្ស ២៥នាក់ ត្រូវបានគេបារម្ភថាស្លាប់ក្នុងអគ្គិភ័យឆាបឆេះរថយន្តដឹកសិស្ស នៅថៃ

មនុស្សរហូតដល់ទៅ ២៥នាក់ ត្រូវបានគេបារម្ភថា ស្លាប់ បន្ទាប់ពីអណ្ដាតភ្លើងដ៏សន្ធោសន្ធៅ បាន​ឆាប​ឆេះរថយន្តដឹកសិស្ស និងគ្រូចំនួន ៤៤នាក់ ក្នុងដំណើរកម្សាន្តរបស់សាលា នៅ​ប្រទេ​ស​ថៃ នាថ្ងៃអង្គារ (ទី១ ខែតុលា)។

សារព័ត៌មាន The Nation បានដកស្រង់សម្តីក្រុមអ្នកជួយសង្គ្រោះដែលនិយាយថា ពួកគេបាន​ទាញ​យក​សពឆេះខ្លោចយ៉ាងតិច ១០នាក់ ពីរថយន្តក្រុង។

រដ្ឋមន្ត្រីក្រសួង​ដឹកជញ្ជូន លោក Suriya Jungrungreangkit បាននិយាយថា ចំនួនអ្នកស្លាប់មិន​ទាន់​ច្បាស់​នៅឡើយទេ ប៉ុន្តែមនុស្ស ២៥នាក់ មិនទាន់បានដឹងពីជោគវាសនា បន្ទាប់ពីមាន​អគ្គិភ័យ​នេះ​។ លោកបានប្រាប់អ្នកសារព័ត៌មានថា៖ «របាយការណ៍ដំបូង បានបង្ហាញថា មាន​អ្នក​ជិះ​នៅលើឡាននោះចំនួន ៤៤នាក់ ដោយមានសិស្ស ៣៨នាក់ និងគ្រូ ៦នាក់។ តាមយង​ដឹង​ឥឡូវ​នេះ គ្រូ ៣នាក់ និងសិស្ស ១៦នាក់ បានចេញពីឡាននោះ»។ លោកបានបន្ថែមថា៖ «សម្រាប់​អ្នក​បាត់ខ្លួន យើងមិនទាន់ច្បាស់នៅឡើយទេ»។

រូបភាព​ដំបូង​ដែល​ត្រូវ​បានបង្ហោះនៅលើបណ្ដាញសង្គម និងផ្សព្វផ្សាយដោយសារព័ត៌មាន ក្នុង​ស្រុក បង្ហាញពីផ្សែងពណ៌ប្រផេះដ៏ក្រាស់ឃ្មឹកដែលហុយទ្រលោមចេញពីរថយន្តក្រុង ដែល​ផ្នែក​ខ្លះ​នៅ​តែ​ត្រូវបានឆាបឆេះនៅឡើយ។ អ្នកថតរូបរបស់សារព័ត៌មាន Reuters បានឃើញ​រថយន្ត​ពន្លត់​អគ្គិភ័យ នគរបាល និងរថយន្តសង្គ្រោះ បានចតនៅជុំវិញរថយន្តដែលប្រែពណ៌ទៅជាខ្មៅ ដោយ​មានក្រុមអ្នកពន្លត់អគ្គិភ័យនៅឈរមុខទ្វារចូល។

នាយករដ្ឋមន្ត្រី លោកស្រី Paetongtarn Shinawatra បានឲ្យដឹងថា និស្សិតទាំង​នោះ​កំពុង​ធ្វើ​ទស្សន​កិច្ច​សិក្សាពីខេត្ត Uthai Thani ចម្ងាយប្រហែល ២៥០គីឡូម៉ែត្រ ភាគខាងជើង​រដ្ឋធានី​បាង​កក ហើយលោកស្រី បានចូលរួមរំលែកទុក្ខយ៉ាងក្រៀមក្រំជាមួយក្រុមគ្រួសារជនរងគ្រោះ តាម​រយៈបណ្ដាញសង្គម X៕