ភ្ជុំបិណ្ឌ៣ថ្ងៃ គ្រោះថ្នាក់ចរាចរណ៍បណ្ដាលឱ្យមនុស្សស្លាប់៣០នាក់ របួសធ្ងន់ស្រាល៥០នាក់

ភ្នំពេញ៖ ពិធីបុណ្យភ្ជុំបិណ្ឌរយៈពេល៣ថ្ងៃ គឺចាប់ពីថ្ងៃទី១ ដល់ទី៣ ខែតុលា ឆ្នាំ២០២៤ មានគ្រោះថ្នាក់ចរាចរណ៍នៅទូទាំងប្រទេស បានកើតឡើងចំនួនជាង ៣០លើក ហើយបណ្ដាលឲ្យមានមនុស្សស្លាប់ចំនួន ៣០នាក់ កើនឡើងចំនួន ៨នាក់ និងរបួសធ្ងន់ស្រាល់ចំនួន ៥០នាក់ ។

យោងតាមរបាយការណ៍ របស់អគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី១ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌថ្ងៃទី១ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន១៣លើក បណ្ដាលឲ្យមនុស្សស្លាប់៩នាក់ និងរបួសធ្ងន់ស្រាល២២នាក់ មូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍ រួមមានបើកបរក្នុងល្បឿនលឿន, មិនគោរពសិទិ្ធ ប្រជែងក្នុងស្ថានភាពគ្រោះថ្នាក់ និងស្រវឹង ។

នៅថ្ងៃទី២ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌថ្ងៃទី២ (ភ្ជុំធំ) គឺមានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ១៥លើក បណ្ដាលឲ្យមនុស្សស្លាប់១៧នាក់ និងរបួស១៩នាក់ ហើយមូលហេតុដែលបណ្ដាលឲ្យកើតមានគ្រោះថ្នាក់ចរាចរណ៍ រួមមានបើកបរក្នុងល្បឿនលឿន មិនគោរពសិទិ្ធ និងប្រជែងក្នុងស្ថានភាពគ្រោះថ្នាក់ ។

ចំណែកនៅថ្ងៃទី៣ ខែតុលា ឆ្នាំ២០២៤ ត្រូវនឹងថ្ងៃភ្ជុំបិណ្ឌចុងក្រោយ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៦លើក បណ្ដាលឲ្យមនុស្សស្លាប់ ៤នាក់ និងរបួស៩នាក់ ហើយមូលហេតុដែលបណ្ដាលឲ្យកើតមាន គ្រោះថ្នាក់ចរាចរណ៍ រួមមានបើកបរក្នុងល្បឿនលឿន មិនគោរពសិទិ្ធ និងប្រជែងក្នុងស្ថានភាពគ្រោះថ្នាក់ ។

គួរបញ្ជាក់ថា គ្រោះថ្នាក់ចរាចរណ៍ នៅទូទាំងប្រទេស ក្នុងរយៈពេល ៣ថ្ងៃ នៃពិធីបុណ្យភ្ជុំបិណ្ឌ គិតចាប់ពីថ្ងៃទី១៣ ដល់ថ្ងៃទី១៥ ខែតុលា ឆ្នាំ២០២៣ បានកើតឡើងចំនួន ៥៨លើក បណ្តាលឱ្យស្លាប់ ២២នាក់ និងរបួស៧៩នាក់ ៕ អត្ថបទ បាន សុខរិទ្ធិ