កម្មកររោងចក្រមួយចំនួនត្រឡប់ចូលរាជធានីភ្នំពេញ ខណៈមួយចំនួនបន្តជួបជុំគ្រួសារ​នៅ​ស្រុកកំណើត

ខណៈពិធីបុណ្យភ្ជុំបិណ្ឌត្រូវបានបញ្ចប់ដោយភាពសប្បាយរីករាយនៅទូទាំងប្រទេសកម្ពុជា។ គិត​ត្រឹម​ព្រឹក​ថ្ងៃទី៥ ខែតុលានេះ​ឃើញថា កម្មករ កម្មការិនីមួយចំនួន បានវិលត្រឡប់​ចូល​រាជ​ធានី​ភ្នំពេញ​ជា​បណ្តើរៗ ដើម្បីត្រៀមបំពេញការងារឡើងវិញនៅដើមសប្តាហ៍ខាងមុខ និងកម្មករ​កម្មការិនី​​មួយចំនួនផ្សេងទៀត បន្តជួបជុំក្រុមគ្រួសារនៅស្រុកកំណើត។

អ្នកស្រី សុខ មុំ ទើបត្រឡប់មកពីស្រុកកំណើតនៅខេត្តតាកែវ សព្វថ្ងៃ​ជាកម្មការិនី​រោងចក្រ​កាត់​ដេរ​សម្លៀក​មួយកន្លែង ស្ថិតនៅតំបន់ព្រៃទា ខណ្ឌពោធិ៍សែន បានឲ្យព័ត៌មាន ប៊ីធីវី ដឹងថា ឆ្នាំនេះ​មិន​ខុស​ប្លែក​ពីឆ្នាំមុនៗនោះទេ ដោយទទួលការឈប់សម្រាកដោយមានប្រាក់ឈ្នួលរយៈពេល ៦​ថ្ងៃ​។ អ្នកស្រី បានឲ្យដឹងថា ជារៀងរាល់ឆ្នាំក្នុងពិធីបុណ្យភ្ជុំបិណ្ឌ ក្រៅពីការ​ជួប​ជុំ​ក្រុម​គ្រួសារ​នៅ​តា​ម​ផ្ទះ ក៏បាននាំគ្នា្វើចង្ហាន់ និងរៀបចំទេយ្យទានផ្សេងៗប្រគេនព្រះសង្ឃនៅតាមទីវត្តអារាមនានា ដើម្បី​ឧទ្ទិសមគ្គផល​​ទៅដល់អ្នកមានគុណ និងជីដូនជីតាដែលបានចែកឋានទៅកាន់បរលោក។

កម្មការិនីរោងចក្រកាត់សម្លៀកបំពាក់ដូចគ្នា មានឈ្មោះ ស្រី អូន មានស្រុក​កំណើត​នៅ​ខេត្ត​ព្រៃវែងបាននិយាយថា បន្ទាប់ពីឈប់សម្រាកអស់រយៈពេលជាច្រើនថ្ងៃកន្លងមកនេះ បាន​បន្សល់​ទុក​នូវ​អនុស្សាវរីយ៍ជាច្រើនពីការជួបជុំ រវាងក្រុមគ្រួសារ សាច់ញាតិ និងមិត្តភ័ក្តិ។ អ្នកស្រី បាន​បន្ត​ថា ក្នុងថ្ងៃឈប់សម្រាកបុណ្យភ្ជុំបិណ្ឌនៅស្រុកកំណើតឆ្នាំនេះ ពិតជា​មាន​ក្តី​សប្បាយ​រីករាយ​ជាង​ឆ្នាំ​កន្លង​ៗ​ទៅ ដោយសារតែបានជួបជុំគ្រួសារ សាច់ញាតិជិតឆ្ងាយ ជាពិសេស អមជាមួយ​បរិយាកាស​អធិកអធមក្រោមប្រទេសមានសុខសន្តិភាព។

ក្រុម​កម្មការិនីទាំងនេះ បានលើកឡើងស្រដៀងគ្នាទៀតថា អ្វីដែលធ្វើ​ឲ្យ​ពួក​គាត់​កាន់​តែ​រីក​រាយ​ថែម​ទៀត​នោះ គឺអាចវិលត្រឡប់ និងចូលបំពេញការងារបានជាធម្មតាឡើងវិញ និងសង្ឃឹមថា នឹង​មានការងារធ្វើកាន់តែច្រើនថែមទៀត ដើម្បីមានប្រាក់ចំណូលផ្គត់ផ្គង់ក្នុងគ្រួសារ។

សូមបញ្ជាក់ថា ជារៀងរាល់ឆ្នាំ ក្នុងអំឡុងបុណ្យទានធំៗ ក៏ដូចជាពិធីបុណ្យភ្ជុំបិណ្ឌ ប្រជា​ពលរដ្ឋ​ភាគ​ច្រើន​តែង​តែចាកចេញពីរាជធានីភ្នំពេញទៅជួបជុំក្រុមគ្រួសារនៅស្រុកកំណើត និងខ្លះទៀត​ធ្វើ​ដំណើរ​កម្សាន្តទាំងក្នុង និងក្រៅប្រទេស។ សម្រាប់ឆ្នាំ២០២៤នេះ រាជរដ្ឋាភិបាលកម្ពុជា បាន​ប្រកាស​អនុញ្ញាតឱ្យកម្មករនិយោជិតទាំងអស់ ឈប់សម្រាកដោយមានប្រាក់ឈ្នួលរយៈពេល ៣ថ្ងៃ ចាប់ពីថ្ងៃ១ ដល់ទី៣ ខែតុលា ឆ្នាំ២០២៤៕ អត្ថបទ៖ ឈិត បូរ៉ាវី