ចិនថ្កោលទោសការវាយប្រហារភេរវកម្មសម្លាប់ពលរដ្ឋខ្លួន២នាក់នៅប៉ាគីស្ថាន និងជំរុញការស៊ើបអង្កេតឱ្យបានហ្មត់ចត់

ជនជាតិចិនពីរនាក់បានស្លាប់ និងម្នាក់ទៀតរងរបួស បន្ទាប់ពីក្បួនរថយន្តដឹកបុគ្គលិកចិនរបស់ក្រុមហ៊ុន Port Qasim Electric Power Company (Private) Limited ត្រូវបានរងការវាយប្រហារនៅជិតអាកាសយានដ្ឋានអន្តរជាតិ Jinnah ក្នុងទីក្រុង Karachi កាលពីថ្ងៃអាទិត្យប្រហែលម៉ោង ១១ យប់។ការវាយប្រហារនេះក៏បណ្តាលឲ្យមានអ្នករបួសមួយចំនួនក្នុងចំណោមប្រជាជនប៉ាគីស្ថានក្នុងតំបន់ផងដែរ។

ស្ថានទូត និងស្ថានអគ្គកុងស៊ុលចិនប្រចាំប្រទេសប៉ាគីស្ថាន បានថ្កោលទោសយ៉ាងដាច់អហង្ការចំពោះការវាយប្រហារភេរវកម្មនេះ និងសម្តែងការរំលែកទុក្ខយ៉ាងជ្រាលជ្រៅចំពោះជនរងគ្រោះស្លូតត្រង់នៃប្រទេសទាំងពីរ និងបានសម្តែងការអាណិតអាសូរយ៉ាងស្មោះស្ម័គ្រចំពោះអ្នករងរបួស និងក្រុមគ្រួសាររបស់ពួកគេ។

ពួកគេកំពុងខិតខំប្រឹងប្រែងគ្រប់បែបយ៉ាងដើម្បីដោះស្រាយផលវិបាកដោយសហការជាមួយភាគីប៉ាគីស្ថាន នេះបើយោងតាមសេចក្តីថ្លែងការណ៍ចេញដោយស្ថានទូតចិននៅថ្ងៃចន្ទនេះ។

ភាគីចិនបានដាក់ចេញនូវផែនការបន្ទាន់មួយភ្លាមៗ ដោយស្នើឱ្យភាគីប៉ាគីស្ថានស៊ើបអង្កេតឱ្យបានហ្មត់ចត់ចំពោះការវាយប្រហារនេះ ការដាក់ទោសយ៉ាងធ្ងន់ធ្ងរលើជនល្មើស និងចាត់វិធានការចាំបាច់ទាំងអស់ដើម្បីការពារសុវត្ថិភាពរបស់ពលរដ្ឋចិន ស្ថាប័ន និងគម្រោងនានានៅក្នុងប្រទេសប៉ាគីស្ថាន។

ស្ថានទូតចិនបានរំលឹកដល់ប្រជាពលរដ្ឋចិន សហគ្រាស និងគម្រោងនានាក្នុងប្រទេសប៉ាគីស្ថាន ឱ្យមានការប្រុងប្រយ័ត្ន យកចិត្តទុកដាក់ចំពោះស្ថានភាពសន្តិសុខ ពង្រឹងវិធានការសន្តិសុខ និងខិតខំប្រឹងប្រែងឱ្យអស់ពីសមត្ថភាព ដើម្បីប្រុងប្រយ័ត្នសុវត្ថិភាព៕