បន្ទប់ស្នាក់ មជ្ឈមណ្ឌល និងវត្តអារាមក្រុងតាខ្មៅផ្តល់ការស្នាក់ឥតគិតថ្លៃ​ជូនសិស្ស​ប្រឡង​បាក់ឌុប

មជ្ឈមណ្ឌលយុវជន និងគ្រួសារពលរដ្ឋមួយចំនួននៅខេត្តកណ្តាល បានបង្ហោះតាមហ្វេសបុក ប្រកាស​ផ្តល់ផ្ទះស្នាក់ និងបន្ទប់ស្នាក់ឥតគិតថ្លៃ ជូនសិស្សានុសិស្សមកពីចម្ងាយ មកពីតាម​បណ្តា​ស្រុក​មក​ស្នាក់នៅនៅជិតមណ្ឌលប្រឡងសញ្ញាបត្រមធ្យមសិក្សាទុតិភូមិ នៅក្នុងក្រុងតាខ្មៅ នាថ្ងៃទី​៨-៩ ខែតុលា ឆ្នាំ២០២៤ខាងមុខនេះ។

បើតាម កញ្ញា ណាំ ស្រីណុច មន្ត្រី និងជាអ្នកគ្រប់គ្រងមជ្ឈមណ្ឌលយុវជន នៃមន្ទីរអប់រំយុវជន និង​កីឡា​ខេត្តកណ្តាល បានថ្លែងប្រាប់ BTV នៅថ្ងៃទី៧ ខែតុលានេះថា នៅក្នុងឆ្នាំនេះ មជ្ឈមណ្ឌល​យុវជនខេត្តកណ្តាល ក៏ដូចវត្តអារាម ផ្ទះជួល និងលំនៅដ្ឋានមួយ​ចំនួន​ទៀត​របស់​ពលរដ្ឋ​នៅ​ក្នុង​ក្រុងតាខ្មៅខេត្តកណ្តាល គឺបានសហការរៀបចំ​ផ្តល់​បន្ទប់​ស្នាក់​នៅ​ឥត​គិត​ថ្លៃ​ជូន​សិស្សានុសិស្សចូលរួមប្រឡងសញ្ញាបត្រមធ្យមសិក្សាទុតិភូមិ មកពីតាមបណ្តាស្រុកឆ្ងាយៗ និង​មិន​អាចរកបន្ទប់ស្នាក់ នៅតាមផ្ទះសំណាក់ សណ្ឋាគារ ឬកន្លែងស្នាក់ផ្សេងៗទៀតបាន។

បណ្តា​សិស្សបេក្ខភាពប្រឡងបាក់ឌុបបានថ្លែងអំណរ​គុណ​ដល់​មជ្ឈ​មណ្ឌល​យុវជន​ខេត្ត​កណ្តាល​ដែល​ឆ្នាំ​នេះ បានបើក្តល់ការស្នាក់នៅគិតថ្លៃ ដែលការងារនេះ គឺបានជួយសម្រាលពេលវេលា និងថវិកាសម្រាប់ស្នាក់នៅការធ្វើដំណើរចូលរួមប្រឡង។

សូមបញ្ជាក់ថា សម្រាប់សិស្សានុសិស្ស ដែលមានបំណងស្វែងបន្ទប់ការស្នាក់នៅ នៅជិត​មណ្ឌល​ប្រឡង​សញ្ញា​បត្រមធ្យមសិក្សាទុតិភូមិក្នុងក្រុងតាខ្មៅ និងស្រុកស្អាងជាដើមនៅខេត្តកណ្តាល ពួក​គេ​អាច​ចូលទៅស្វែងរកតាមអាស័យដ្ឋានស្នាក់នៅតាមរយៈហ្វេសបុក «មហាគ្រួសារតាខ្មៅ»៕ អត្ថបទ ស៊ុម សុខជា