កូរ៉េខាងជើង ប្ដេជ្ញាបង្កើនល្បឿនដើម្បីក្លាយជាមហាអំណាចនុយក្លេអ៊ែរ

ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃអង្គារ (០៨ តុលា) នេះថា មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានលើកឡើងថា ប្រទេសរបស់លោកនឹងបង្កើនល្បឿនឆ្ពោះទៅរកការក្លាយជាមហាអំណាចយោធាជាមួយនឹងអាវុធនុយក្លេអ៊ែរ ហើយនឹងមិនបដិសេធការប្រើប្រាស់អាវុធទាំងនោះឡើយ ប្រសិនបើកូរ៉េខាងជើងស្ថិតនៅក្រោមការវាយប្រហាររបស់សត្រូវ។

លោក Kim បានលើកឡើងពីឈ្មោះប្រធានាធិបតីកូរ៉េខាងត្បូង លោក យ៉ុន សុកយ៉ុល (Yoon Suk Yeol) ជាលើកទីពីរក្នុងរយៈពេលមួយសប្តាហ៍ ក្នុងការរិះគន់ទីក្រុងសេអ៊ូល ដែលបានឃុបឃិតជាមួយទីក្រុងវ៉ាស៊ីនតោន ក្នុងការធ្វើឱ្យមានអស្ថិរភាពក្នុងតំបន់។

KCNA បានដកស្រង់សម្តីរបស់លោក Kim ដែលនិយាយថា “លោក Yoon Suk Yeol បានធ្វើអត្ថាធិប្បាយដ៏ជូរចត់ និងអសុរោះួយចំនួនអំពីការបញ្ចប់របបកូរ៉េខាងជើង ហើយប្រសិនបើសត្រូវព្យាយាមប្រើកម្លាំងប្រឆាំងនឹងប្រទេសរបស់យើង យោធារបស់កូរ៉េខាងជើងនឹងប្រើអំណាចវាយលុកទាំងអស់ដោយមិនស្ទាក់ស្ទើរ រួមទាំងអាវុធនុយក្លេអ៊ែរ”។

កូរ៉េខាងជើង បានបន្តកម្មវិធីអាវុធនុយក្លេអ៊ែររបស់ខ្លួនអស់ជាច្រើនទសវត្សរ៍ ហើយត្រូវបានគេជឿថាមានសារធាតុបំផ្ទុះបរិមាណូគ្រប់គ្រាន់សម្រាប់ផលិតអាវុធបែបនេះរាប់សិបប្រភេទ ដោយក៏បានធ្វើតេស្តបំផ្ទុះនុយក្លេអ៊ែរនៅក្រោមដីចំនួន ៦លើករួចមកហើយ៕