ក្រោយទស្សនកិច្ចផ្ទាល់ពលរដ្ឋបង្ហាញការរីករាយដោយឃើញតំបន់ឦសានមានការអភិវឌ្ឍច្រើន និងមានបង្គោលព្រំដែនប្រកដប្រជា

បន្ទាប់ពីមើលឃើញដោយភ្ទាល់ភ្នែក និងជាក់ស្តែង បងប្អូន​ប្រជាព​លរដ្ឋ​ខ្មែរ​បាន​បង្ហាញ​ការ​រីក​រាយ​យ៉ាង​ខ្លាំងបន្ទាប់ពីឃើញនៅតំបន់ភូមិភាគឦសាន មានការអភិវឌ្ឍច្រើន និងមានកា​រ​បោះបង្គោល​ព្រំដែន​ជាមួយប្រទេសជិតខាងបានយ៉ាងត្រឹមត្រូវពិតប្រាកដ មិនដូចការលើក​ឡើង​របស់​ជន​អគតិ​មួយ​ក្តាប់​តូច ដែលតែងតែធ្វើការញុះញង់ខុសពីការពិតជាក់ស្តែងនោះ។

តាមរយៈកិច្ចសម្ភាសន៍ជាមួយក្រុមការងារដែលបានសម្របសម្រួលជូនបងប្អូនប្រជាពលរដ្ឋ ក៏​ដូច​ជា​​លោកគ្រូ អ្នកគ្រូមកពី តាម​បណ្តា​ខេត្ត​នានា​ទៅ​ទស្សនា​កម្សាន្ត​នៅ​តំបន់​ភូមិ​ភាគ​ឦសាន​ដោយ​ឥត​គិត​ថ្លៃ​ជារៀងរាល់ចុងសប្តាហ៍នោះ បានលើកឡើងថា ពួកគេពិតជាសប្បាយចិត្តយ៉ាងខ្លាំង​ក្រោយ​ឃើញ​តំបន់ភូមិភាគឦសានមានការអភិវឌ្ឍ ច្រើនទាំងហេដ្ឋារចនាសម្ព័ន្ធ និងវិស័យកសិកម្ម។ ជាងនេះទៅទៀតពួកគេមិននឹកស្មានថា នៅតំបន់ភូមិភាគឦសាននេះ មានបង្គោលព្រំដែនយ៉ាងប្រកដប្រជា និងច្បាស់លាស់ទាល់តែសោះ ដូច្នេះពួកគេក៏បានអំពាវនាវឲ្យបងប្អូប្រជាពលរដ្ឋខ្មែរទាំងអស់កុំចេះតែជឿលើការញុះញង់ពីពួក ក្រុមអគតិមួយក្តាប់តូចនៅខាងក្រៅ ដែលតែងតែញុះញង់ខុសពីការខណៈពួកគេទាំងនោះមិនបានមើល ឃើញជាក់ស្តែង និងខ្លះទៀតមិនដែលទាំងស្គាល់ទឹកដីភូមិភាគឦសាននេះផងនោះ។

សូមរំលឹកថា រាជរដ្ឋាភិបាលកម្ពុជាបានប្រកាសដាក់ចេញគោលការណ៍រៀបចំកម្មវិធីដំណើរកម្សាន្តជូនពលរដ្ឋ និងយុវជនទៅកាន់ខេត្តក្រចេះ ស្ទឹងត្រែង មណ្ឌលគិរី និងរតនគិរី ដោយឥតថ្លៃរៀងងរាល់ចុងសប្ដាហ៍គឺបានចាប់ពីខែកញ្ញា ដល់ខែធ្នូ ដើម្បីពួកគាត់បានឃើញនូវទិដ្ឋភាពការអភិវឌ្ឍ ក៏ដូចជាការអភិវឌ្ឍរបស់ប្រជាជនជាក់ស្ដែងនៅតាមបណ្ដោយព្រំដែនកម្ពុជា ឡាវ និងវៀតណាម។

ការរៀបចំដំណើរកម្សាន្តនេះមានបំណងលុបបំបាត់មន្ទិលសង្ស័យ របស់ប្រជាពលរដ្ឋមកលើរដ្ឋាភិបាលពាក់ព័ន្ធនឹងកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ និងវៀតណាម (CLV-DTA) ដែលពួកគេបានសម្ដែងការព្រួយបារម្ភខ្លាចបាត់បង់ទឹកដីទៅប្រទេសវៀតណាម។ ប៉ុន្តែរាជរដ្ឋាភិបាលបានអះអាងថា កិច្ចសហប្រតិបត្តិការនេះ ជាឧត្តមប្រយោជន៍ជាតិ ជាពិសេសនាំមកនូវវិបុលភាពក្នុងខេត្តជាប់ព្រំដែនប្រទេសទាំងបី។ យ៉ាងណាក៏ដោយនាពេលនេះរាជរដ្ឋាភិបាលបានបញ្ចប់នូវកិច្ចសហប្រតិបត្តិការ តំបន់អភិវឌ្ឍន៍ត្រីកោណរវាងកម្ពុជា ឡាវ និងវៀតណាមជាផ្លូវការហើយ ដោយការបញ្ចប់កិច្ចសហប្រតិបត្តិ ការនេះគឺប្រៀបបាននឹងការដកដាវ និងដកគ្រាប់កាំភ្លើងពីក្រុមប្រឆាំងនៅក្រៅប្រទេស ដែលបានយក បញ្ហានេះមកចាក់ប្រជាពលរដ្ឋឲ្យមានការបារម្ភអំពីបញ្ហាបាត់ទឹកដី៕ អត្ថបទបាន ចក់