កូរ៉េខាងត្បូង៖ ទាហានកូរ៉េខាងជើង ទំនងជាកំពុងប្រយុទ្ធនៅអ៊ុយក្រែន ហើយខ្លះបានស្លាប់ក្នុងសង្រ្គាម

ប្រមុខការពារជាតិរបស់ទីក្រុងសេអ៊ូល បាននិយាយកាលពីថ្ងៃអង្គារ (០៨ តុលា) ថា ទាហានជាច្រើនរបស់កូរ៉េខាងជើង ទំនងជាកំពុងតែចូលរួមជាមួយនឹងទាហានរុស្ស៊ី ក្នុងការប្រយុទ្ធនៅអ៊ុយក្រែន ដោយអ្នកខ្លះត្រូវជឿថាបានស្លាប់ក្នុងសង្រ្គាម និងទាហានជាច្រើនទៀតត្រូវបានរំពឹងថានឹងបញ្ជូនទៅបន្ថែម។

ប្រព័ន្ធផ្សព្វផ្សាយអ៊ុយក្រែន បានរាយការណ៍កាលពីចុងសប្តាហ៍នេះថា មន្ត្រីយោធាកូរ៉េខាងជើង ៦នាក់ ត្រូវបានសម្លាប់នៅក្នុងការវាយប្រហារដោយមីស៊ីលរបស់ទីក្រុងគីវ លើទឹកដីកាន់កាប់ដោយរុស្ស៊ី នៅជិតតំបន់ ដូណិតស្ក៍ (Donetsk) កាលពីថ្ងៃទី០៣ ខែតុលា។ រដ្ឋមន្ត្រីការពារជាតិរបស់ទីក្រុងសេអ៊ូល លោក គីម យ៉ុងហ៊្យុន (Kim Yong-hyun) បានប្រាប់សមាជិកសភាកាលពីថ្ងៃអង្គារថា “មានភាពអាចទៅរួចខ្ពស់ដោយពិចារណាលើកាលៈទេសៈផ្សេងៗ” ដែលថារបាយការណ៍អ៊ុយក្រែននោះជាការពិត។

លោកបន្ថែមថា កូរ៉េខាងជើង ត្រូវបានគេរំពឹងថានឹងបញ្ជូនទាហានធម្មតាទៅបន្ថែមទៀត ដើម្បីគាំទ្រដល់កិច្ចខិតខំប្រឹងប្រែងធ្វើសង្គ្រាមរបស់រុស្ស៊ី។ ប្រមុខការពារជាតិកូរ៉េខាងត្បូងរូបនេះបន្តថា “ភាពទៅរួចខ្ពស់នៃការបញ្ជូនកងទ័ពពីទីក្រុងព្យុងយ៉ាងនោះដោយសារតែកិច្ចព្រមព្រៀងទៅវិញទៅមកដែលស្រដៀងទៅនឹងសម្ព័ន្ធមិត្តយោធារវាងរុស្ស៊ី និងកូរ៉េខាងជើង”។

ក្រុមអ្នកជំនាញបាននិយាយជាយូរមកហើយថា មីស៊ីលកូរ៉េខាងជើង កំពុងត្រូវបានដាក់ពង្រាយក្នុងទឹកដីអ៊ុយក្រែន ដោយកងកម្លាំងរុស្ស៊ី ដោយនោះជាអ្វីដែលទាំងទីក្រុងមូស្គូ និងទីក្រុងព្យុងយ៉ាង បានបដិសេធ។ កូរ៉េខាងត្បូងក៏អះអាងដែរថា កូរ៉េខាងជើង បានបញ្ជូនសព្វាវុធរាប់ពាន់កុងតឺន័រទៅឱ្យរុស្ស៊ី សម្រាប់ប្រើនៅអ៊ុយក្រែន៕