ឯកឧត្តម ហ៊ុន ម៉ានី អញ្ជើញ​សំណេះសំណាលជាមួយ​រចនា​សម្ព័ន្ធ​គណៈចលនា​មហាជន​ខេត្តរតនគិរី

នាព្រឹកថ្ងៃទី៩ ខែតុលា ឆ្នាំ២០២៤នេះ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍ និងជា​អគ្គលេខាធិការគណៈចលនាមហាជន នៃ​គណៈកម្មាធិការកណ្តាលគណបក្សប្រជាជនកម្ពុជា​បាន​អញ្ជើញ​ជា​អធិបតីក្នុងពិធីសំណេះសំណាល​ជាមួយរចនាសម្ព័ន្ធគណៈចលនាមហាជន​ខេត្តរតនគិរី​។ ពិធីនេះ មានការ​អញ្ជើញ​ចូល​រួម​ពី​ថ្នាក់​ដឹក​នាំអគ្គលេខាធិការដ្ឋានគណៈមហាជន គណៈកម្មាធិការកណ្តាល សមាជិក សមាជិកាជន​បង្គោល​គណៈចលនាមហាជន ខេត្ត ក្រុង-ស្រុក និងឃុំ-សង្កាត់ ក្នុងខេត្តរតនគិរី សរុប ២៧៤ រូប។

ឯកឧត្តម ណាប់​ ប៊ុនហេង​ អនុប្រធានប្រចាំការ គណៈកម្មាធិការបក្សខេត្ត​រតនគិរី​ បាន​ថ្លែង​អំណរគុណ និងសូមស្វាគមន៍យ៉ាងកក់ក្តៅចំពោះវត្តមានរបស់ ឯកឧត្តមអគ្គលេខាធិការ និង​គណៈ​ប្រតិភូ ដែលបានផ្តល់កិត្តិយសដល់គណៈកម្មាធិការបក្សខេត្ត អញ្ជើញមក​ំណេះ​សំណាល​ដោយផ្ទាល់ នាឱកាសនេះ។

បន្ទាប់ពីស្តាប់របាយការណ៍របស់ឯកឧត្តមតំណាងគណបក្សខេត្ត ឯកឧត្តមអគ្គលេខាធិការ បាន​ធ្វើ​ការ​កោតសរសើរដល់ក្រុមការងារ​ទាំងអស់​ដែល​បាន​ខិតខំ​ប្រឹងប្រែង​កសាង​នូវ​សមិទ្ធផល​ជា​ច្រើន​ក្នុង​ខេត្តរតនគិរី ជាពិសេសការបង្ហាញការគាំទ្រដល់គម្រោង «ព្រែកជីកហ្វូណន​តេជោ​»​នា​ពេល​កន្លង​មកនេះ។ ទន្ទឹមនេះ ឯកឧត្តមក៏បានសំណូមពរ​ដល់​ថ្នាក់​ដឹកនាំ​ក្រុម​ការងារ​មហា​ជន​ខេត្ត​រតនគិរី គ្រប់លំដាប់ថ្នាក់ទាំងអស់ ជឿជាក់លើការដឹកនាំ របស់ប្រមុខគណបក្ស ហើយ​ត្រូវ​អនុវត្ត​ឱ្យ​បានយ៉ាងម៉ឺងម៉ាត់នូវការចង្អុលការទាំងអស់ ស្របតាមទៅ​សភាពការណ៍​ជាក់ស្ដែង​ក្នុង​មូលដ្ឋាន និងត្រូវធ្វើយ៉ាងណាថែរក្សាសាមគ្គី ឯកភាពផ្ទៃក្នុងដែលជាកត្តាគន្លឹះរបស់គណបក្ស ព្រម​ទាំងចូលរួមជំរុញដល់ការផ្សព្វផ្សាយ ទៅដល់សមាជិក សមាជិកាគណបក្ស ឱ្យស្វែងយល់ និង​គាំទ្រដល់ការសម្រេចចិត្តនានារបស់រាជរដ្ឋាភិបាល។

ឯកឧត្តមបានគូសបញ្ជាក់បន្ថែមទៀតថា ពិតណាស់ប្រសិនបើមិនមានវត្តមានរបស់អ្នកជំនាន់មុន​ គឺ​មិន​អាចមានវត្តមានយុវជនជំនាន់ក្រោយដែរ។ ក្នុងន័យនេះ ឯកឧត្តមចង់​បង្ហាញ​ឱ្យ​យុវជន​ជំនាន់​ក្រោយយល់ពីតម្លៃនៃការលះបង់របស់អ្នកជំនាន់មុន ហើយបន្តរួមគ្នាថែរក្សា សមិទ្ធិផល​នានាដែលសម្រេចបានរបស់គណបក្ស និងសូមឱ្យសមាជិកទាំងអស់ជឿជាក់លើ​ការ​ដឹកនាំ​របស់​រាជ​រដ្ឋាភិបាល ដែលដឹកនាំដោយគណបក្សប្រជាជនកម្ពុជា និងមានសម្តេចមហាបវធិបតី ហ៊ុន ម៉ាណែត អនុប្រធានគណបក្សប្រជាជនកម្ពុជា ជានាយករដ្ឋមន្ត្រី។

ពិធីសំណេះសំណាលនាពេលនេះ ត្រូវបានរៀបចំឡើងក្នុងគោលបំណងជួបសំណេះសំណាល សួរ​សុខទុក្ខអង្គបោះឆ្នោត និងបេក្ខជនពេញសិទ្ធរបស់គណបក្សប្រជាជនកម្ពុជា ក្នុងគោលដៅ​ពង្រឹង​រច​នាសម្ព័ន្ធ និងតួនាទីរបស់ការងារចលនាមហាជន​របស់​គណបក្ស​នៅ​ថ្នាក់​មូលដ្ឋាន​របស់​គណបក្ស ដើម្បីរួមចំណែកដល់ការធានាជ័យជំនះជូនគណបក្សនៅគ្រប់ការបោះឆ្នោត៕