សង្គ្រាមរុស្ស៊ី-អ៊ុយក្រែន និងមជ្ឈិមបូព៌ា បានប៉ះពាល់សេដ្ឋកិច្ច ខណៈកម្ពុជាកំពុងទប់ថ្លៃ អគ្គិសនី និងសាំង

បញ្ហាសង្គ្រាមនៅរុស្ស៊ី-អ៊ុយក្រែន និងមជ្ឈិមបូព៌ា អាចជះឥទ្ធិពលដល់សេដ្ឋកិច្ចកម្ពុជា និង ពិភព លោកទាំងមូល ជាពិសេសធ្វើឲ្យតម្លៃប្រេងសាំងតម្លៃដឹកជញ្ជូន និងតម្លៃទំនិញឡើងថ្លៃ ខណៈ រដ្ឋាភិបាលកម្ពុជាកំពុងទប់ថ្លៃអគ្គិសនី និងប្រេងសាំងមិនឱ្យកើនឡើង ផងដែរ។

ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងក្នុងពិធីអញ្ជើញចុះសួរទុក្ខ ដល់ នាយទាហាន នាយទាហានរង ពលទាហាន និង​សិក្ខាកាម​នៅ​មជ្ឈមណ្ឌល​ហ្វឹកហ្វឺន​កងទ័ព​ជើង​គោក នៅថ្ងៃទី ៩ ខែ តុលា ឆ្នាំ២០២៤ នេះថា ការធ្វើមិនឱ្យថ្លៃ អគ្គិសនីកើនឡើង និងបញ្ចុះ​តម្លៃ​បន្ថែម គឺជាគោលនយោបាយរបស់សម្តេចបវរធិបតី ហ៊ុន ម៉ាណែត នៅក្នុងអាណត្ដិទី ៧ នេះ ក្នុង គោល​បំណងដើម្បីកាត់បន្ថយការចំណាយរបស់ប្រជាពលរដ្ឋ ហើយនឹង​ជួយ​សម្រួល​ផ្នែក​ឧស្សា​ហកម្ម​ ពាណិជ្ជកម្ម និងកសិកម្ម ម្យ៉ាង ទៀតយុទ្ធសាស្ដ្ររបស់សម្ដេចបវរធិបតី ហ៊ុន ម៉ាណែត នៅក្នុង​អាណត្ដិនេះ គឺបន្ដធ្វើយ៉ាងម្ដេចឲ្យប្រភពថាមពលរបស់កម្ពុជាកុំឲ្យខ្វះ។

ទន្ទឹមគ្នានេះ ឯកឧត្តម រដ្ឋមន្ដ្រី ក៏បានលើកឡើងផងដែរថា នៅក្នុងស្ថានភាពក្រោយសង្គ្រាម-អ៊ុយក្រែន ​និងជំងឺកូវីដ-១៩ ថាមពលទូទាំងពិភពលោក មានការកើនឡើងមិនថា សហអាមេរិក ថៃ វៀតណាម សិង្ហបុរី ឡើយ គឺមានការឡើងថ្លៃជាបន្ដបន្ទាប់ គ្រាន់តែថាតិច ឬច្រើន។ សម្រាប់​កិច្ចការ​នេះ គឺកម្ពុជាធ្វើបាន ដោយសារការខិតខំបញ្ចេញលុយរបស់រដ្ឋ តាមរយៈអគ្គិសនីកម្ពុជា ដើម្បី ទប់ថ្លៃកុំឲ្យឡើងថ្លៃជាដើម។

ឯកឧត្តម កែវ រតនៈ បានឲ្យដឹងទៀតថា រាជរដ្ឋាភិបាលអាណិត្ដនេះ នឹងបន្ដការរុញផ្គត់ផ្គង់បន្ថែម និង​អភិវឌ្ឍន៍បន្ថែម ជាពិសេសផ្ដោតទៅលើថាមពលស្អាត ដូច្នេះបានជា​ការ​វិនិយោគ​លើ​វិស័យ​អគ្គិសនី​ជា​បន្ដ​បន្ទាប់នេះ កម្ពុជាមិនមានការដាក់ពង្រាយ រោងចក្រម៉ាស៊ីនម៉ាស៊ូត ឬម៉ាស៊ីនដើរ​ដោយ​​ប្រេង​ខ្មៅទៀតទេ គឺកម្ពុជាបានធ្វើនៅក្នុងក្របខណ្ឌថាមពលស្អាត៕ អត្ថបទ៖ សុន រ៉ាឌី