អាមេរិករិះគន់អ៊ីស្រាអែលនៅអង្គការសហប្រជាជាតិចំពោះស្ថានភាពមហន្តរាយនៅហ្កាហ្សា

សម្ព័ន្ធមិត្តរបស់អ៊ីស្រាអែល គឺសហរដ្ឋអាមេរិក បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃពុធសប្ដាហ៍នេះថា អ៊ីស្រាអែល ត្រូវតែដោះស្រាយជាបន្ទាន់ចំពោះស្ថានភាពមហន្តរាយ ក្នុងចំណោមជនស៊ីវិលប៉ាឡេស្ទីននៅតំបន់ហ្កាហ្សាស្ទ្រីប និងបញ្ឈប់ការរងទុក្ខកាន់តែវេទនា ដោយសារតែការកំហិតលើការផ្តល់ជំនួយ។

ដោយយោងទៅលើរបាយការណ៍ស្ដីពីស្ថានភាពយ៉ាប់យ៉ឺននៅភាគខាងត្បូង និងកណ្តាលតំបន់ហ្កាហ្សា ឯកអគ្គរដ្ឋទូតសហរដ្ឋអាមេរិកប្រចាំនៅអង្គការសហប្រជាជាតិលោកស្រី Linda Thomas-Greenfield បាននិយាយថា ស្ថានភាពដ៏មហន្តរាយទាំងនេះត្រូវបានព្យាករណ៍ជាច្រើនខែកន្លងមកហើយ ប៉ុន្តែនៅតែមិនទាន់ត្រូវបានដោះស្រាយបាននៅឡើយ ។នៅពេលនេះ មិនត្រូវឲ្យមានស្ថានភាពលំបាក់បែបនេះបន្តកើតឡើងមានទៀតទេ។

លោកស្រីបាននិយាយនៅក្នុងសេចក្តីថ្លែងការណ៍មួយថា យើងអំពាវនាវឱ្យអ៊ីស្រាអែលចាត់វិធានការជាបន្ទាន់ដើម្បីបញ្ឈប់ស្ថានភាពដ៏លំបាកនេះ។

ក្រុមប្រឹក្សាសន្តិសុខដែលមានសមាជិក ១៥ ប្រទេសបានជួបប្រជុំគ្នាជុំវិញវិបត្តិមនុស្សធម៌មួយឆ្នាំបន្ទាប់ពីការវាយប្រហារដ៏សាហាវពីសំណាក់ក្រុមសកម្មប្រយុទ្ធប៉ាឡេស្ទីនហាម៉ាសលើភាគខាងត្បូងអ៊ីស្រាអែល បានបង្កឱ្យមានសង្រ្គាមនៅហ្កាហ្សាសព្វថ្ងៃ។ ចាប់តាំងពីពេលនោះមក អ៊ីស្រាអែលបានវាយកម្ទេចដែនដីដែលខ្លួនឡោមព័ទ្ធមួយនេះស្ទើររាបដល់ដី សម្លាប់មនុស្សជាង៤ម៉ឺននាក់ និងបង្ខំឲ្យប្រជាជនស្ទើរតែទាំងអស់នៃប្រជាជនសរុប ២,៣ លាននាក់ត្រូវភៀសខ្លួនដោយពឹងផ្អែកលើជំនួយទាំងស្រុងដើម្បីរស់។

លោកស្រី Thomas-Greenfield ក៏បានសង្កត់ធ្ងន់ផងដែរលើបទបញ្ជារបស់អ៊ីស្រាអែលនាពេលថ្មីៗនេះសម្រាប់ជនស៊ីវិលនៅភាគខាងជើងហ្កាហ្សាឱ្យជម្លៀសម្តងទៀត ដោយនិយាយថាពួកគេត្រូវតែអាចត្រលប់ទៅសហគមន៍វិញដើម្បីកសាងទីជម្រករបស់ពួកគេឡើងវិញ៕