កម្ពុជាកំពុងជំរុញការប្រើប្រាស់សេវាហិរញ្ញវត្ថុ ដើម្បីលើកស្ទួយជីវភាពរស់នៅរបស់ប្រជាជន

បរិយាបន្ន និងចំណេះដឹងហិរញ្ញវត្ថុ និងកិច្ចការពារអតិថិជន ត្រូវបានលើកកម្ពស់ជាប្រចាំ ដើម្បី​ឱ្យការប្រើប្រាស់សេវាហិរញ្ញវត្ថុកាន់តែ មានប្រសិទ្ធភាព ដែលនឹងរួមចំណែកលើកស្ទួយជីវភាពរស់​នៅរបស់ប្រជាជន និងកាត់បន្ថយភាពក្រីក្រ។

ឯកឧត្តម យឹម លាត ទេសាភិបាលរង ធនាគារជាតិនៃកម្ពុជា លើកឡើងនៅក្នុងសិក្ខាសាលា ស្តីពី​ការ​លើកកម្ពស់បរិយាបន្ន ហិរញ្ញវត្ថុ និងការប្រើប្រាស់ប្រាក់រៀល នៅថ្ងៃទី ៩ ខែ តុលា ឆ្នាំ២០២៤ នេះថា ជុំវិញបញ្ហានេះ ធនាគារជាតិនៃកម្ពុជា និងក្រសួង ពាណិជ្ជកម្ម បានចូលរួមយ៉ាងសកម្ម ក្នុង​ការលើកកម្ពស់ការយល់ដឹងពីសារៈសំខាន់ និងគោលនយោបាយលើកកម្ពស់ការប្រើប្រាស់ ប្រាក់​រៀល និងបរិយាបន្នហិរញ្ញវត្ថុរបស់ប្រជាជន ក៏ដូចជាក្រុមហ៊ុន-សហគ្រាសនៅកម្ពុជា។ ចំពោះ​ការអនុវត្តវិធានការជំរុញការប្រើ ប្រាស់ប្រាក់រៀលរបស់ក្រសួងពាណិជ្ជកម្ម បានរួម​ចំណែក​យ៉ាង​សំខាន់ នៅក្នុងការបង្កើនការប្រើប្រាស់ប្រាក់រៀលកន្លងមក ជាពិសេស ការដាក់​ឱ្យអនុវត្ត​ប្រកាស ដែលតម្រូវឱ្យមានការដាក់ស្លាកតម្លៃនៅតាមហាងទំនិញនានាជាប្រាក់រៀលជាដើម។ ការផ្លាស់ប្ដូរផ្នត់គំនិត របស់សាធារណជន ឱ្យងាកមកប្រើប្រាស់រូបិយវត្ថុជាតិពិត​ជាមាន​សំខាន់​ណាស់ ដូច្នេះនៅពេលសាធារណជនបានឃើញការដាក់តាំង ស្លាកតម្លៃជាប្រាក់​រៀលកាន់​តែច្រើន​ឡើង សាធារណជននឹងកាន់តែសុំាជាមួយការចាយប្រាក់រៀល និងកាន់តែមានទំនុកចិត្ដប្រើប្រាស់ ប្រាក់រៀលបន្ថែមទៀត។

ទាក់ទិនកិច្ចការខាងលើនេះ ឯកឧត្តម បានលើកទឹកចិត្តឱ្យក្រុមហ៊ុន សហគ្រាស ម្ចាស់អាជីវកម្ម គ្រឹះស្ថាន​ធនាគារ និងហិរញ្ញវត្ថុ វិស័យឯកជន និងគ្រប់ភាគីពាក់ព័ន្ធទាំងអស់ បង្កើន​ការ​ប្រើប្រាស់​ឱ្យបានទូលំទូលាយ ដើម្បីជាប្រយោជន៍ដល់ខ្លួនឯង និងសេដ្ឋកិច្ចជាតិ ជាពិសេសការ​បើកប្រាក់​បៀរ​វត្សរ៍ជាប្រាក់រៀលជូនបុគ្គលិក ការប្រើប្រាស់​ប្រាក់រៀលនៅក្នុងប្រតិបត្តិកា​ររបស់ខ្លួន​កាន់តែ​ច្រើនឡើង តាម រយៈការជំរុញការបិទស្លាកតម្លៃជារៀល និងការទូទាត់ជាប្រាក់រៀល ការកំណត់​អត្រា​ប្តូរដែលអនុគ្រោះដល់អ្នកប្រើប្រាស់ប្រាក់រៀល ការផ្ដល់ឥណទាន និងការសន្សំជាប្រាក់រៀល ក្នុងលក្ខខណ្ឌឱ្យកាន់តែប្រសើរជាងប្រាក់ដុល្លារអាមេរិក។

ចំណែក ឯកឧត្តម បួន សារ:មុនី រដ្ឋលេខាធិការក្រសួងពាណិជ្ជកម្ម លើកឡើងថា ជុំវិញការ​ប្រើ​ប្រាស់​ប្រាក់រៀលនេះ កម្ពុជា បានកំពុងផ្លាស់ប្តូរនូវផ្នត់គំនិតរបស់ប្រជាជន ឱ្យចូលរួមប្រើប្រាស់​ប្រាក់​ទាំងអស់គ្នា ការប្រើប្រាស់រូបិយវត្ថុខ្លួន គឺជាមោទនភាពជាតិ, ជាក់ស្តែងការជំរុញ​ការដាក់​ស្លាក​តម្លៃ​ជាប្រាក់រៀល ពិតជាបានផ្ដល់ផលប្រយោជន៍ជាច្រើនដូចជា ពង្រឹង​ការយល់​ដឹងរបស់​សាធារណ- ជនពីកម្រិតថ្លៃជាប្រាក់ បង្កើនទម្លាប់នៃការប្រើប្រាស់ប្រាក់រៀល បណ្ដុះស្មារតី​ស្រឡាញ់​ប្រាក់រៀល ជំរុញការប្រើប្រាស់ប្រាក់រៀលឱ្យកាន់ តែទូលំទូលាយ ព្រមទាំងបង្កើន​តម្លាភាព​សម្រាប់អ្នកប្រើប្រាស់ តាមរយៈការកាត់បន្ថយចំណាយប្រតិបត្តិការប្តូរប្រាក់ជាដើម។

ឯកឧត្តមរដ្ឋលេខាធិការ បន្តឱ្យដឹងថា នៅក្នុងរយៈពេលខាងមុខនេះ ក្រសួងពាណិជ្ជកម្ម និង​ធនាគារជាតិនៃកម្ពុជា នឹងធ្វើ ប្រកាសរួមមួយ ដើម្បីជំរុញអ្នកដែលចុះបញ្ជីទាំងអស់ ត្រូវតែបង្កើត​កុង​គណនេយ្យជាប្រាក់រៀល ដែលបញ្ហានេះគឺដល់ពេលដែលយើង ត្រូវអនុវត្តទាំងអស់គ្នា ដើម្បី​ជំរុញការប្រើប្រាស់ប្រាក់រៀលឱ្យកាន់តែទូលាយ៕ អត្ថបទ៖ សុន រ៉ាឌី