ប្រណាំងទូកនៅខេត្តបន្ទាយមានជ័យ ប្រព្រឹត្តទៅនៅថ្ងៃទី២៦-២៧ ខែតុលា ឆ្នាំ២០២៤ មានទូកចូលរួមជាង៣០ទូក

បន្ទាយមានជ័យ៖ ការប្រណាំងទូកង នៅក្នុងខេត្តបន្ទាយមានជ័យ ឆ្នាំ២០២៤នេះ នឹងមានការ​រៀបចំយ៉ាង​អធិកអធម​ និងមានទូក ចូលរួមប្រណាំងច្រើនជាងបណ្ដាឆ្នាំមុនៗ​ប្រមាណជាង ៣០ទូក ។

នេះបេីតាមការបញ្ជារបស់ឯកឧត្តម អុំ រាត្រី អភិបាល នៃគណៈអភិបាលខេត្តបន្ទាយមានជ័យ ដែលបានបញ្ជាក់នៅក្នុងកិច្ចប្រជុំគណៈកម្មការរៀបចំការប្រណាំងទូក បណ្តែតប្រទីប និង សំពះព្រះខែ អកអំបុក និងស្តង់ពិព័រណ៍ទូទៅ ភូមិ១ ផលិតផល១ ក្នុងឱកាសអបអរសាទរ ព្រះរាជពិធីបុណ្យអំទូក បណ្តែតប្រទីប និង សំពះព្រះខែ អកអំបុកឆ្នាំ២០២៤ នៅថ្ងៃទី១២ ខែតុលា ឆ្នាំ ២០២៤។

គូបញ្ជាក់ដែរថា គណៈកម្មាធិការខេត្តរៀបចំបុណ្យជាតិ-អន្តរជាតិ បានសម្រេចរៀបចំពិធី​ប្រណាំង​ទូកថ្នាក់ខេត្ត នៅដងស្ទឹងសិរីសោភ័ណ ខាងក្រោយសាកលវិទ្យាល័យជាតិមានជ័យ ដែល​នឹងប្រព្រឹត្តទៅនាថ្ងៃទី២៦-២៧ ខែតុលា ឆ្នាំ២០២៤ ។ ដោយនៅរៀងរាល់រាត្រីចាប់ពីថ្ងៃទី ២៤-២៨ ខែតុលា ឆ្នាំ២០២៤ ក៏មានការប្រគំតន្ត្រីសម័យ ​អមដោយការដាក់តាំងស្តង់ផលិតផលខ្មែរ ព្រមទាំង​មានការរៀបចំកម្មវិធីផ្សេងៗ ​នៅបរិវេណសួន តេជោឈ្នះឈ្នះ ខេត្តបន្ទាយមានជ័យ ព្រមទាំង​មានការរៀបចំបណ្តែតប្រទីបអង្គភាពរដ្ឋ-វិស័យឯកជន នៅដងស្ទឹងព្រះពន្លា ក្រុងសិរីសោភ័ណ ចាប់ពីថ្ងៃទី២៦ ខែតុលា ដល់ថ្ងៃទី១៦ ខែវិច្ឆិកា ឆ្នាំ២០២៤។ ចំពោះពិធីអកអំបុក និងសំពះព្រះខែ នឹងរៀបចំនារាត្រីថ្ងៃទី១៥ ខែវិច្ឆិកា ឆ្នាំ ២០២៤ នៅបរិវេណសួនតេជោឈ្នះឈ្នះ ​ស្ថិតនៅភូមិ៣​ សង្កាត់ព្រះពន្លា​ ក្រុងសិរីសោភ័ណ​ ខេត្តបន្ទាយមានជ័យផងដែរ៕