[UPDATE] បុរសប្រដាប់ដោយកាំភ្លើងម្នាក់ ត្រូវចាប់ខ្លួននៅជិតព្រឹត្តិការណ៍ជួបជុំរបស់លោក Trump ក្នុងរដ្ឋ California

នគរបាលក្នុងតំបន់បាននិយាយកាលពីថ្ងៃអាទិត្យ (១៣ តុលា) ថា បុរសម្នាក់ប្រដាប់ដោយកាំភ្លើង ត្រូវបានចាប់ខ្លួននៅប៉ុស្តិ៍ត្រួតពិនិត្យសន្តិសុខមួយនៅជិតព្រឹត្តិការណ៍ជួបជុំយុទ្ធនាការរបស់បេក្ខជនប្រធានាធិបតីបក្សសាធារណរដ្ឋ លោក Donald Trump នៅរដ្ឋកាលីហ្វ័រនីញ៉ា (California) កាលពីថ្ងៃសៅរ៍ ហើយប្រឈមមុខនឹងការចោទប្រកាន់ពីបទប្រើប្រាស់កាំភ្លើងខុសច្បាប់ បន្ទាប់ពីត្រូវបានរកឃើញថាមានកាំភ្លើងដាក់គ្រាប់រួចជាច្រើនដើម លិខិតឆ្លងដែនជាច្រើនច្បាប់ ផ្លាកលេខរថយន្ត និងកាតអ្នកសារព័ត៌មានក្លែងក្លាយ ព្រមទាំងមានបណ្ណ VIP ផងដែរ។

លោក ឆាដ ប៊ីយ៉ង់ខូ (Chad Bianco) ស្នងការតំបន់ រីវើសាយ (Riverside) បាននិយាយថា លោកជឿថាទីភ្នាក់ងាររបស់លោកបានបញ្ឈប់ការប៉ុនប៉ងធ្វើឃាតមួយ ខណៈក៏និយាយថានោះជា ការសង្ស័យ” ប៉ុណ្ណោះ។ កំណត់ត្រាក្នុងពន្ធនាគារបង្ហាញថា ជនសង្ស័យត្រូវបានដោះលែងឱ្យនៅក្រៅឃុំកាលពីថ្ងៃសៅរ៍ ហើយការស៊ើបអង្កេតសហព័ន្ធកំពុងដំណើរការ។

បុរសវ័យ ៤៩ឆ្នាំ ដែលត្រូវបានកំណត់អត្តសញ្ញាណថាជាអ្នករស់នៅក្នុងទីក្រុង ឡាស វេហ្គាស (Las Vegas) ឈ្មោះ វេម មីលឡឺ (Vem Miller) ត្រូវបានឃាត់ខ្លួននៅក្នុងរថយន្ត SUV ពណ៌ខ្មៅ នៅម៉ោងប្រហែល ៥ល្ងាច ម៉ោងក្នុងស្រុកកាលពីថ្ងៃសៅរ៍ ហើយមិនមានឧបទ្ទវហេតុអ្វីកើតឡើងឡើយ ខណៈ Trump មិនទាន់បានឡើងថ្លែងលើវេទិកាទេនៅពេលនោះ។

កំណត់ត្រាក្នុងពន្ធនាគារបង្ហាញថា ជនសង្ស័យ Miller ត្រូវបានដោះលែងឱ្យនៅក្រៅឃុំដោយប្រាក់ធានា ៥.០០០ដុល្លារ កាលពីថ្ងៃសៅរ៍ បន្ទាប់ពីត្រូវបានចោទពីបទកាន់កាប់អាវុធផ្ទុកគ្រាប់រួច និងបង់ដាក់គ្រាប់ជាច្រើន ដែលទាំងពីរនេះជាបទល្មើសមជ្ឈិម។ ការិយាល័យមេធាវីអាមេរិកនៅទីក្រុង ឡូស អេនជើលេស (Los Angeles) ក្នុងសេចក្តីថ្លែងការណ៍មួយកាលពីថ្ងៃអាទិត្យ បាននិយាយថា លោក Trump មិនស្ថិតក្នុងគ្រោះថ្នាក់ទេ ដោយសម្អាងដល់សេវាសម្ងាត់របស់សហរដ្ឋអាមេរិក៕