ក្រសួងសុខាភិបាលត្រៀមកម្លាំងជាង ១៥០០នាក់ការពារ និងសង្រ្គោះបន្ទាន់​ក្នុងព្រះរាជពិធីបុណ្យអុំទូក

ក្នុងឱកាសព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ដែលនឹងប្រព្រឹត្ដទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៤ នាពេលខាងមុខ ក្រសួងសុខាភិបាល បានត្រៀមកម្លាំងសរុបចំនួន ១,៥១៨ នាក់ក្នុងរយៈពេលបីថ្ងៃ ដើម្បី ការពារ និងសង្រ្គោះបន្ទាន់ក្នុងព្រះរាជពិធីនេះ។

ការថ្លែងរបស់ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការក្រសួងសុខាភិបាល និងជាប្រធានគណៈកម្មការការពារសុខភាព និងសង្រ្គោះបន្ទាន់ បានអញ្ជើញដឹកនាំកិច្ចប្រជុំត្រៀមរៀបចំផែនការការងារការពារសុខភាព និងសង្រ្គោះបន្ទាន់ ក្នុងព្រះរាជពិធីបុណ្យអ៊ុំទូកបណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅនៅថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៤ នាពេលខាងមុខនេះ។

កិច្ចប្រជុំនេះពិភាក្សាត្រៀមរៀបចំផែនការ ការពារសុខភាព និងសង្គ្រោះបន្ទាន់មានដូចខាងក្រោម៖ រថយន្តគិលានសង្រ្គោះ ចូលរួមការពារសុខភាព ក្នុងអំឡុងពេលព្រះរាជពិធីបុណ្យជាតិ និងរថយន្តគិលានសង្រ្គោះ ចូលរួមការពារសុខភាព កីឡាករ កីឡាការិនី ចំណុះទូក តាមទីតាំងប្រចាំការ។

ក្នុងឱកាសព្រះរាជពិធីបុណ្យបុណ្យអ៊ុំទូកបណ្តែតប្រទីប និងសំពះព្រះខែ អកអំបុក រយៈពេល៣ថ្ងៃ ឯកឧត្តមរដ្ឋលេខាធិការក្រសួងសុខាភិបាល និងជាប្រធានគណៈកម្មការការពារសុខភាព និងសង្រ្គោះបន្ទាន់ បានគ្រោង និងរៀបចំអនុវត្តនៅផែនការ និងទីតាំងប្រចាំការ ដូចខាងក្រោម ៖

១. រថយន្តគិលានសង្រ្គោះ សរុបចំនួន៧១គ្រឿង ក្រុមគ្រូពេទ្យ សរុបចំនួន ៥០៦នាក់ក្នុង១ថ្ងៃ

២. រថយន្តគ្លីនិកចល័ត សរុបចំនួន០២គ្រឿង គ្រូពេទ្យប្រចាំការ ២៤នាក់ក្នុង១ថ្ងៃ

៣. ជម្រកតង់សុខភាព សរុបចំនួន១២តង់ គ្រូពេទ្យប្រចាំការ ៦៦នាក់ក្នុង១ថ្ងៃ

៤. ក្រុមគ្រូពេទ្យការពារសុខភាពចល័តសម្រាប់មហាជន និងអប់រំសុខភាពសរុបចំនួន៨៤នាក់ក្នុង១ថ្ងៃ

៥. ក្រុមគ្រូពេទ្យរថយន្តគិលានសង្រ្គោះប្រចាំការតាមគោលដៅ សរុបចំនួន ១,៥១៨នាក់ក្នុងរយៈពេលបីថ្ងៃ៕ អត្ថបទ រដ្ឋា