អភិបាលខណ្ឌមានជ័យ ផ្តល់អំណោយជូននគរបាល ប្រជាការពារ និងកម្មករប្រមូលសំរាមក្នុងសង្កាត់ស្ទឹងមានជ័យទី១

ភ្នំពេញ ៖ ដើម្បីជាការលើកទឹកចិត្ត និងជាផ្នែក នៃការគិតគូរដល់មន្ត្រីនៅក្រោមឱវាទផងនោះ លោកសេង គន្ធ អភិបាលខណ្ឌមានជ័យ និងជាប្រធានកិត្តិយអនុសាខាកាកបាទក្រហមកម្ពុជាខណ្ឌមានជ័យ បានផ្តល់អំណោយជូនដល់មន្ត្រីនគរបាលប៉ុស្តិ៍ ប្រជាការពារសង្កាត់ស្ទឹងមានជ័យទី១ រួមជាមួយបងប្អូនកម្មករប្រមូលសំរាម សរុបទាំងអស់៥០នាក់ ។

ពិធីសំណេះសំណាល និងផ្តល់អំណោយជូននេះ ធ្វើឡើងនាព្រឹកថ្ងៃទី១៥ ខែតុលា ឆ្នាំ២០២៤នេះ នៅក្នុងបរិវេណវត្តចង្ក្រានតាព្រហ្ម ហៅវត្តស្ទឹងមានជ័យ ដោយមានការអញ្ចើញចូលរួមជាពីព្រះចៅអធិការវត្ត , ព្រះគ្រូសូត្រស្តាំសូត្រឆ្វេង និងញាតិញ៉ោមពុទ្ធិបរិស័ទមួយចំនួនទៀត ដែលបានចូលជាបច្ច័យ និងទេយ្យទានជាច្រើនប្រគេនព្រះសង្ឃ ហើយត្រូវបានព្រះសង្ឃវេរជាទានសប្បុរសបន្តទៅ កងកម្លាំងដែលកំពុងមានវត្តមាននៅទីនោះ ។

លោកសេង គន្ធ អភិបាលខណ្ឌ បានមានមតិសំណេះសំណាលជាមួយកងកម្លាំង ដោយោកបានធ្វើការកោតសសើរកម្លាំងទាំង២ ទាំងនគរបាល និងប្រជាការពារ ដែលបានយកចិត្តទុកដាក់ក្នុងការបម្រើប្រជាពលរដ្ឋ មិនប្រកាន់ពេលវេលាយប់ ឬថ្ងៃ ។ លើកពីនោះ កម្លាំងទាំង២នេះ បានដើរតួនាទីសម្ខាន់ក្នុងការល្បាតពួនស្ទាក់ និងបង្ក្រាបបទល្មើសក្នុងមូលដ្ឋាន ធានាសន្តិសុខសុវត្ថិភាពជូនពលរដ្ឋ ពិសេសនោះ គឺការតែងចុះសម្របសម្រួលលំហូរចរាចរណ៍លើដងផ្លូវ ខណះសង្កាត់ស្ទឹងមានជ័យ តែងជួបជាប្រចាំលើការកកស្ទះ ។

អំណោយចែកជូននៅពេលនេះ ក៏ជាការលើកទឹកចិត្តចំពោះការជួយការពារសុវត្ថិភាព និងសម្របសម្រួលចរាចរណ៍ ក្នុងវត្តអារាមទាំងអស់ ក្នុងមូលដ្ឋាន កំឡុងឱកាសបុណ្យកាន់បិណ្ឌ និងភ្ជុំបិណ្ឌដែលមានរយះពេល១៥ថ្ងៃផងដែរ ដោយកម្លាំងពិតជាបានសស្រាក់សស្រាំគ្នាជាខ្លាំង ក្នុងការបំពេញភារកិច្ចរបស់ខ្លួន ។

សូមបញ្ជាក់ថា អំណោយដែលត្រូវចែកជូន ក្នុងម្នាក់ទទួលបាន ៖ អង្ករ ១បេ ២៥គីឡូក្រាម, មី ១កេស , ទឹកត្រី ១យួ , ទឹកស៊ីអ៊ីវ ១យួ , តែ , ស្ករ ស , ទឹកដោះគោ និងថវិការមួយចំនួនទៀតផងដែរ ៕ លីហេង