ក្រសួងការងារត្រៀមផ្សព្វផ្សាយកម្មវិធីគោលនយោបាយអាទិភាពរបស់រាជរដ្ឋាភិបាលក្នុងពិធីបុណ្យអុំទូក

ខណៈព្រះរាជពិធីបុណ្យអុំទូក នឹងចាប់ផ្តើមពីថ្ងៃស្អែកនេះ ក្រសួងការងារ និងបណ្តុះ​បណ្តាល​វិជ្ជាជីវៈ​ បានកំពុងរៀបចំស្តង់ ដើម្បីធ្វើ​ការ​ផ្សព្វផ្សាយ​គោល​នយោបាយ​អាទិភាព​របស់​រាជ​រដ្ឋាភិបាល​​ជូន​ដល់សាធារណជនទូទៅ អំពីការអនុវត្តរបបសន្តិសុខសង្គម ឱកាសការងារ និង​កម្ម​វិធី​បណ្ដុះ​បណ្ដាលជំនាញវិជ្ជាជីវៈ និងបច្ចេកទេសដល់យុវជន ១,៥លាននាក់។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​មានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ក្នុងឱកាសពិធីបុណ្យអុំទូករយៈពេល ៣ថ្ងៃខាង​មុខ​នេះ ក្រសួងការងារ បានត្រៀម​រួច​ជា​ស្រេច​ក្នុង​ការ​ផ្សព្វ​ផ្សាយ​អំពី​សេវា​សំខាន់ៗ​ចំនួន​៣​របស់​ក្រសួង ទៅកាន់អ្នកចូលរួមទស្សនាពិធីបុណ្យជាតិនេះ ដែលមានដូចជា បេឡជាតិសន្តិសុខសង្គម (ប.ស.ស.) , ទីភ្នាក់ងារជាតិមុខរបរ និងការងារ (NEA) និងកម្ម​វិធី​បណ្តុះ​បណ្តាល​ជំនាញ​វិជ្ជា​ជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥លា​ន​នាក់​។

ឯកឧត្តម បានបញ្ជាក់ថា ចំពោះសេវាដែលមាននៅស្តង់ផ្សព្វផ្សាយសេវា និងចុះបញ្ជីចល័តរបស់ ប.ស.ស. នៅពិធីបុណ្យអុំទូក សមាជិក ប.ស.ស. និងសាធារណជន អាចទទួល​ការ​ប្រឹក្សា​យោបល់ និងសេវាទាំងនោះដោយផ្ទាល់តែម្តង ជាមួយក្រុមមន្រ្តីជំនាញ របស់ក្រសួងការងារ និង​បណ្តុះ​បណ្តាលវិជ្ជាជីវៈ ដែលស្តង់នេះដែរមានទីតាំងស្ថិតនៅតំបន់កោះពេជ្រ។

ឯកឧត្តម បានអំពាវនាវឱ្យប្រជាពលរដ្ឋខ្មែរទាំងអស់ ចូលរួមទ​ស្សនា​ពិធី​បុណ្យ​អុំទូក​នេះ​ឲ្យ​បាន​ច្រើន​កុះករ និងចូលរួមថែរក្សាវប្បធម៌របស់ខ្លួន និងគ្រប់គ្រងសំរាមឱ្យបានល្អ ព្រោះទីក្រុងស្អាត ទើប​ភ្ញៀវចូលមកលេងច្រើន។

សូមបញ្ជាក់ថា ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក មានរយៈពេល ៣ថ្ងៃ ចាប់ពីថ្ងៃទី១៤ ដល់១៦ ខែវិច្ឆិកា ឆ្នាំ២០២៤។ ឆ្នាំនេះដែរ មានទូកង សរុបចំនួន ៣៤៦​ទូក ​បានចុះឈ្មោះចូលរួមប្រណាំង ដោយកីឡាករសរុបជាង ២ម៉ឺននាក់៕ អត្ថបទ ឈិត បូរ៉ាវី