ជនជាប់ចោទ៣នាក់ ត្រូវបានប្រកាសសាលក្រមផ្តន្ទាទោសជាប់ពន្ធនាគារពី៣ទៅ៤ឆ្នាំ និងពិន័យប្រាក់ពី៦ទៅ១០លានរៀល

កំពង់ឆ្នាំង៖ អ្នកនាំពាក្យសាលាដំបូងខេត្តកំពង់ឆ្នាំង នៅថ្ងៃទី១២ ខែធ្នូ ឆ្នាំ២០២៤នេះ បានអោយដឹងថា ជនជាប់ចោទ៣នាក់ត្រូវបានចៅក្រមជំនុំជម្រះនៃសាលាដំបូងខេត្តកំពង់ឆ្នាំង ប្រកាសសាលក្រមព្រហ្មទណ្ឌលេខ៨០ ឆ ចុះថ្ងៃទី១២ ខែធ្នូ ឆ្នាំ២០២៤ ដោយបានសម្រេចផ្តន្ទាទោសជនជាប់ចោទ២នាក់ដាក់ពន្ធនាគារចំនួន៤ឆ្នាំ ពិន័យជាប្រាក់១០លានរៀល និងម្នាក់ទៀតផ្តន្ទាទោស៣ឆ្នាំ ពិន័យជាប្រាក់៦លានរៀល។

លោក ហុង គឹមហាក់ អ្នកនាំពាក្យសាលាដំបូងខេត្តកំពង់ឆ្នាំងបានបន្តថា៖ នៅថ្ងៃនេះ សាលាដំបូងខេត្តកំពង់ឆ្នាំង បានប្រកាសសាលក្រមលើជនជាប់ចោទទាំង៣នាក់ ក្នុងបទបំផ្លាញ, គៃបំបាត់ និងកាប់ឆ្ការគាស់រានឈូសឆាយដីព្រៃលិចទឹក និងអំពើសមគំនិត ដោយមានការអញ្ជើញចូលរួមពីឯកឧត្តម ឯក ស៊ុនរស្មី ព្រះរាជអាជ្ញាអមសាលាដំបូងខេត្ត លោក ស៊ិន ច័ន្ទសុភ័ក្រ្ត ចៅក្រម, លោក វ៉ែន កែវសារឿត ក្រឡាបញ្ជី និងមានការចូលរួមពីមន្ត្រីនៃអង្គភាពប្រឆាំងអំពើពុករលួយចំនួន៥រូប រួមនិងមេធាវីការពារក្តីអោយជាប់ចោទផងដែរ។

ក្នុងនោះជនជាប់ចោទ២រូប (១រូបជាអាជីវករ និង១រូបទៀតជាប្រធានការិយាល័យប្រជាពរ្ស្រុកំពង់លែង) ដាក់ពន្ធនាគារក្នុងម្នាក់ៗចំនួន៤ឆ្នាំ និងពិន័យជាប្រាក់ចំនួន១០លានរៀល ពីបទ បំផ្លាញ, គៃបំបាត់ និងកាប់ឆ្ការគាស់រានឈូសឆាយដីព្រៃលិចទឹក ប្រព្រឹត្តិនៅចំណុចតាទុំ ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីកំឡុងខែមីនា ឆ្នាំ២០២៤ តាមមាត្រា៦០៨ នៃក្រមព្រហ្មទណ្ឌ មាត្រា៣២នៃច្បាប់ស្តីពីការប្រឆាំងអំពើពុករលួយ និងមាត្រា៩៨ចំណុច១នៃច្បាប់ស្តីពីជលផល។ រីឯជនជាប់ចោទ១រូបទៀត ជាអភិបាលរងស្រុកកំពង់លែង ត្រូវបានផ្តន្ទាទោសដាក់ពន្ធនាគារចំនួន៣ឆ្នាំ និងពិន័យជាប្រាក់ចំនួន៦លានរៀល ក្នុងអំពើសមគំនិតពីបទបំផ្លាញ, គៃបំបាត់កាប់ឆ្ការគាស់រានឈូសឆាយដីព្រៃលិចទឹក ប្រព្រឹត្តិនៅចំណុចតាទុំ ភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង កាលពីអំឡុងខែមីនា ឆ្នាំ២០២៤ តាមមាត្រា៩៩ មាត្រា៦០៨ នៃក្រមព្រហ្មទណ្ឌ មាត្រា៣២នៃច្បាប់ស្តីពីការប្រឆាំងអំពើពុករលួយ និងមាត្រា៩៨ចំណុច១នៃច្បាប់ស្តីពីជលផល។ ចំពោះវត្ថុចាប់យកមួយចំនួន ត្រូវបានតុលាការសម្រេចរឹបអូស និងមួយចំនួនទៀតត្រូវបានប្រគល់អោយម្ចាស់ដើមវិញ ។

កន្លងមក សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវអោយប្រជាពលរដ្ឋ អាជ្ញាធរមានសមត្ថកិច្ចទាំងអស់ ចូលរួមទប់ស្កាត់ ថែរក្សាព្រៃលិចទឹក កុំអោយមានការបំផ្លាញតទៅទៀត ក្រោយពីសម្តេចដឹងថា ព្រៃលិចទឹកជុំវិញបឹងទន្លេសាបជាច្រើនពាន់ហិកតារងការបំផ្លាញពីក្រុមជនល្មើស។ ក្រោយពីសម្តេចធិបតីមានប្រសាសន៍រួច អាជ្ញាធរខេត្តកំពង់ឆ្នាំង អយ្យការអមសាលាដំបូងខេត្តកំពង់ឆ្នាំង និងមន្ទីរកសិកម្ម រុក្ខាប្រម៉ាញ់ និងនេសាទខេត្ត បានសហការបង្ក្រាបបទល្មើសនេះបានចំនួន២ករណី និងចាប់បានជនល្មើសបំផ្លាញព្រៃលិចទឹកចំនួន៥នាក់ ផ្តន្ទាទោសតាមនីតិវិធី ហើយមួយចំនួនទៀតកំពុងរត់គេចខ្លួនផងដែរ ៕ កាំង ហុងវាស្នា