គណៈប្រតិភូកូរ៉េ ស្វែងយល់សក្តានុពល និងឱកាសវិនិយោគនៅកម្ពុជា

ភ្នំពេញ៖ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅ​ថ្ងៃម្សិ​លក​ន្ល​ង​ទៅ​បានទទួលជួប ពិភាក្សាការងារជាមួយគណៈប្រតិភូ ដឹកនាំដោយ លោក បេ ហេដុង (Bae Hae-​dong) ប្រធានសហព័ន្ធសភាពាណិជ្ជកម្ម និងឧស្សាហកម្មខេត្តក្យង់គី នៃសាធារណរដ្ឋកូរ៉េ ក្នុង​គោលបំណងដើម្បីស្វែងយល់អំពីស្ថានភាព សក្តានុពល និងឱកាសវិនិយោគនៅកម្ពុជា ជា​ពិសេស​ការ​ស្វែងយល់ពីកិច្ចសហប្រតិបត្តិការជាមួយក្រសួងការងារ ក្នុងវិស័យការងារ។

ក្រសួងការងារ និងបណ្តុះបណ្តាលវិជ្ជាជីវៈ នៅព្រឹកថ្ងៃទី១២ ខែធ្នូ ឆ្នាំ២០២៤នេះ បានឲ្យដឹងថា ក្នុង​ជំនួប​នេះ ឯកឧត្តម ហេង សួរ បានសម្តែងការស្វាគមន៍ និងសង្ឃឹមថា តាមរ​យៈ​ទស្សន​កិច្ច​របស់​គណៈ​ប្រតិភូនៅកម្ពុជានាពេលនេះ នឹងនាំមកនូវអ្នកវិនិយោគកូរ៉េកាន់តែច្រើនមកកម្ពុជា។

ឯកឧត្តមរដ្ឋមន្រ្តី បានគូសបញ្ជាក់ថា កម្ពុជា និងសាធារណរដ្ឋកូរ៉េ បានដំឡើងកំរិត​ទំនាក់​ទំនង​ជាដៃ​គូ​យុទ្ធសាស្ត្រ ខណៈដែលរាជរដ្ឋាភិបាលកម្ពុជាក៏កំពុងកៀរគរអ្នកវិនិយោគបរទេស ដោយ​រាជ​រដ្ឋាភិបាល​បាន​ដាក់​ចេញ​នូវ​គោល​នយោបាយ​ជា​ច្រើន​ក្នុង​កា​រ​ជួយ​សម្រប​សម្រួល​ដល់​ការ​វិនិយោគ​បរទេសនៅកម្ពុជា ដូចជាតំបន់សេដ្ឋកិច្ចពិសេសជាដើម។ ក្នុងន័យនេះ កម្ពុជាក៏ចង់​ឱ្យ​មាន​តំបន់​សេដ្ឋកិច្ចពិសេសកូរ៉េ នៅកម្ពុជាផងដែរ។

ជាការឆ្លើយតប លោក បេ ហេដុង បានសម្តែងការគាំទ្រ និងគូសបញ្ជាក់ថា តាំងពីដើមមក កម្ពុជា និង​កូរ៉េមានទំនាក់ទំនងយ៉ាងស៊ីជម្រៅលើវិស័យសេដ្ឋកិច្ច និងវប្បធម៌ រួមទាំងក្នុងវិស័យការងារ និង​បណ្តុះបណ្តាលវិជ្ជាជីវៈផងដែរ។ លោកជឿជាក់ថា សហប្រតិបត្តិការ និងទំនាក់​ទំនង​រវាង​ប្រទេស​ទាំង​ពីរនឹងនៅតែបន្តប្រកបដោយប្រសិទ្ធភាពខ្ពស់។ លោកសង្ឃឹមថា កម្ពុជា នឹងបណ្តុះ​បណ្តាល​កម្លាំង​ពលកម្មជំនាញ ដែលស្របតាមតម្រូវការការងារនៅក្នុងប្រទេសកូរ៉េ។ លោក​បង្ហាញ​ថា​សហព័ន្ធសភាពាណិជ្ជកម្ម និងឧស្សាហកម្មខេត្តក្យង់គី នៃសាធារណរដ្ឋកូរ៉េ រង់​ចាំ​រាល់​កិច្ច​សហការដើម្បីដាក់ចេញជាវិធានការរួមគ្នា៕ អត្ថបទ ឈិត បូរ៉ាវី