បច្ចុប្បន្នជនកម្ពុជា​មានពិការភាពចំនួន ៩,៥០០ នាក់ បានកំពុងបម្រើការងារនៅក្នុងវិស័យរដ្ឋ និងឯកជន

ភ្នំពេញ៖ យោងតាមក្រសួងសង្គមកិច្ច អតីតយុទ្ធជន និងយុវនីតិសម្បទា បានឲ្យដឹងថា គិតត្រឹមខែវិច្ឆិកា ឆ្នាំ២០២៤នេះ ជនមានពិការភាពសរុបចំនួន ៩,៥០០នាក់ កំពុងតែបម្រើការងារនៅតាមក្រសួងស្ថាប័នរដ្ឋ និងឯកជនទូទាំងប្រទេស ដោយទទួលបានប្រាក់ចំណូល និងអត្ថប្រយោជន៍សង្គមទៅតាមមុខតំណែងតួនាទី និងការងារស្របតាមសមត្ថភាពរៀងៗខ្លួន។

នៅក្នុងពិធីបើកវេទិកាថ្នាក់ជាតិលើកទី៥ ស្តីពីការងារនិងមុខរបរប្រកបដោយបរិយាបន្នសម្រាប់ជនមានពិការភាព នៅព្រឹកថ្ងៃទី១២ ខែធ្នូនេះ ឯកឧត្តម សែម សុខា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានមានប្រសាសន៍ថា រហូតមកដល់ពេលបច្ចុប្បន្ននេះ មន្ត្រីរាជការមានពិការភាពសរុបចំនួន ៣,៨១៦នាក់ ក្នុងនោះមន្ត្រីរាជការជាស្រ្តីពិការជាង ៨០០នាក់ កំពុងបម្រើការងារនៅតាមក្រសួង ស្ថាប័នរដ្ឋចំនួន៣៩។ ដោយឡែក ស្ថិតិក្នុងវិស័យឯកជន រួមមាន៖ ធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ និងរោងចក្រដែលបានប្រកាសចុះបញ្ជិកា និងទទួលបានវិញ្ញាបនបត្រលើការអនុវត្តច្បាប់្តីពីកការពារ និងើកកម្ពស់សិទ្ធិជនពិការនៅទូទាំងប្រទេសចំនួន ២៨៧ស្ថាប័ន មានជនមានពិការភាពដែលកំពុងបម្រើការងារ សរុបមានចំនួនជាង ៥,៦០០នាក់។

ឯកឧត្តមរដ្ឋលេខាធិការ បានលើកឡើងបន្តថា ក្នុងនាមជារដ្ឋភាគី នៃអនុសញ្ញាស្តីពីសិទ្ធិជនមានពិការភាព គឺត្រូវរួមគ្នាផ្តល់សិទ្ធិអំណាចសេដ្ឋកិច្ច ដល់ជនមានពិការភាពឱ្យទទួលបានការងារស្មើៗគ្នា។ សកម្មភាពទាំងនេះ នឹងធ្វើឱ្យមានភាពប្រសើរឡើងនូវលទ្ធភាពរបស់ជនមានពិការភាព ទៅកាន់ទីផ្សារការងារ មុខរបរ និងសេដ្ឋកិច្ចក្រៅប្រព័ន្ធ ដែលបើកចំហប្រកបដោយបរិយាបន្ន។ ឯកឧត្តម បានបន្ថែមថា សុខុមាលភាពរបស់ជនមានពិការភាព ត្រូវបានយកចិត្តទុកដាក់ពីគ្រប់មជ្ឈដ្ឋាន ជាពិសេសការធានានូវឱកាសសេដ្ឋកិច្ចសម្រាប់ជនមានពិការភាព តាមរយៈការជំរុញការអនុវត្តអនុក្រឹត្យស្តីពីការកំណត់អត្រានិងបែបបទនៃការជ្រើសរើសជនពិការចូលបម្រើការងារ និងកម្មវិធីជាតិផ្សេងៗទៀតរបស់រាជរដ្ឋាភិបាល។

ពាក់ព័ន្ធការរៀបចំវេទិកាថ្នាក់ជាតិលើកទី៥នេះ លោក ខេង វីរៈ នាយកប្រតិបត្តិអង្គការ PAFID បានបញ្ជាក់ថា ធ្វើឡើង គោលបំណងដើម្បីសម្រាប់ជាកន្លែងរបស់និយោជកផ្តល់បទពិសោធន៍ការអនុវត្តល្អពីការផ្តល់ការងារដល់ជនមានពិការភាព និងដើម្បីឲ្យសមាជិកក្រុមវេទិកា បានជួបពិភាក្សានិងផ្តល់អនុសាសន៍ដើម្បីឆ្លុះបញ្ចាំង និងស្ថាបនាផែនការយូរអង្វែង។ បន្ថែមពីនេះ ដើម្បីផ្តល់ឱកាសដល់យុវជនមានពិការភាព ជួបដោយផ្ទាល់ជាមួយនិយោជក ចែករំលែកព័ត៌មានអំពីឱកាសការងារ និងដកស្រង់បទពិសោធន៍ការទទួលបានការងារ ដើម្បីផ្លាស់ប្តូរគំនិតនៃរបៀបទទួលជោគជ័យ និងជំនាញដើម្បីទទួលបានការងារ និងដើម្បីផ្តល់អនុសាសន៍សម្រាប់លើកកម្ពស់ឱកាសការងារសម្រាប់ជនមានពិការភាពពេលខាងមុខ៕

អត្ថបទ ឈិត បូរ៉ាវី