ទូតកម្ពុជាប្រចាំនៅកូរ៉េ៖ រាជរដ្ឋាភិបាលតែងគិតគូរជានិច្ចដល់ពលរដ្ឋ និងនិស្សិតខ្មែរនៅក្រៅប្រទេស

ភ្នំពេញ៖ លោកជំទាវ ជ្រឹង បុទុមរង្សី ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានថ្លែងថា រាជរដ្ឋាភិបាលកម្ពុជា តាំងពីអាណត្តិមុន តមកអាណត្តិទី៧ ក្រោមការដឹកនាំរបស់សម្ដេចធិបតី ហ៊ុន ម៉ាណែត នាយករដ្ឋមន្ត្រី គឺតែងតែគិតគូរជានិច្ច ចំពោះសុខទុក្ខរបស់និស្សិតខ្មែរ ឬពលរដ្ឋខ្មែរ ដែលសិក្សា និងធ្វើការងារនៅក្រៅប្រទេស ដូចពលរដ្ឋខ្មែរដែលកំពុងរស់នៅក្នុងប្រទេសផងដែរ ។

ក្នុងពេលអនុញ្ញាតឱ្យសមាគមនិស្សិតខ្មែរប្រចាំសាធារណរដ្ឋកូរ៉េ (CSAK) ដែលដឹកនាំដោយ លោកស្រី ឈឿម ភីថង ប្រធានសមាគម ចូលជួបសម្តែងការគួរសម ដើម្បីបង្ហាញនូវសមាសភាពក្រុមប្រឹក្សាប្រតិបត្តិថ្មី នៃសមាគមក្នុងអាណត្តិទី១០ ព្រមទាំងរាយការណ៍ជូនពីសមិទ្ធផលការងាររយៈពេល៥ខែ របស់សមាគម កាលពីថ្ងៃទី១៣ ខែធ្នូ ឆ្នាំ២០២៤ លោកជំទាវឯកអគ្គរាជទូត បានថ្លែងការកោតសរសើរ ចំពោះរបាយការណ៍លម្អិត របស់សមាគមនិស្សិតខ្មែរប្រចាំសាធារណរដ្ឋកូរ៉េ និងបានវាយតម្លៃខ្ពស់ ចំពោះសកម្មភាពដ៏មមាញឹក របស់សមាគមក្នុងអាណត្តិទី១០ ក្នុងរយៈពេល ៥ខែកន្លន ដែលបានួយលើកកម្ពស់សាមគ្គីភាពក្នុងចំណោមនិស្សិត និងពលរដ្ឋខ្មែរ ព្រមទាំងបានផ្សព្វផ្សាយវប្បធម៌ ប្រពៃណី និងចំណេះដឹងនានាអំពីប្រទេសកម្ពុជាផងដែរ ។

លោកជំទាវ បានគូសបញ្ជាក់ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត តែងតែគិតគូរយកចិត្តទុកដាក់ជានិច្ច ដល់សមាគមនិស្សិតខ្មែរនៅសាធារណរដ្ឋកូរ៉េ និងនៅបន្តគាំទ្រដល់សមាគម ដើម្បីបម្រើផលប្រយោជន៍និស្សិតខ្មែរ នៅសាធារណរដ្ឋកូរ៉េ ។

ជាចុងក្រោយ លោកជំទាវឯកអគ្គរាជទូត បានលើកទឹកចិត្តដល់សមាគមនិស្សិតខ្មែរប្រចាំសាធារណរដ្ឋកូរ៉េ ឱ្យខិតខំបន្តការងារ និងផ្សព្វផ្សាយអំពីសកម្មភាពរបស់ខ្លួនឱ្យបានទូលំទូលាយថែមទៀត ជាពិសេសនៅតាមបណ្តាញទំនាក់ទំនងសង្គមនានា និងជំរុញពង្រីកសាខាសមាគមនិស្សិតនៅតាមតំបន់នានា ដើម្បីបង្កើនប្រសិទ្ធភាពការងារផងដែរ ៕ បាន សុខរិទ្ធិ