រាជរដ្ឋាភិបាលចាត់ទុកការសិក្សា ជាអាទិភាពក្នុងការអភិវឌ្ឍសង្គម-សេដ្ឋកិច្ចជាតិ

រាជរដ្ឋាភិបាលក្នុងអាណត្តិទី៧នេះ ចាត់ទុកការសិក្សា អប់រំ ជាអាទិភាពមួយដ៏សំខាន់ ក្នុងការ​អភិវឌ្ឍ​សង្គម-សេដ្ឋកិច្ចជាតិ ដោយ រាជរដ្ឋាភិបាលបានកំពុងស្តារ និងពង្រឹងវិស័យ​អប់រំ​ជា​បន្ត​បន្ទាប់​ ជាពិសេសការពង្រឹងគុណភាពសិក្សា និងការកសាងអគារសិក្សា នៅទូទាំងប្រទេស​ជាដើម​។

លោកជំទាវបណ្ឌិត ជា សិរី អគ្គទេសាភិបាល ធនាគារជាតិនៃកម្ពុជា លើកឡើង​នៅ​ក្នុង​ពិធី​សម្ពោធ​អគារ​សិក្សា ១ខ្នង ៥បន្ទប់ នៅសាលាបឋមសិក្សា កំពង់ថ្ម ស្ថិតក្នុងឃុំកំពង់ថ្ម ស្រុក​សន្ទុក ខេត្តកំពង់ធំ នៅថ្ងៃទី១៤ ខែធ្នូ ឆ្នាំ២០២៤ នេះថា ក្រោមដំបូល នៃសន្តិភាព និង​ការ​ដឹកនាំ​ប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ក្នុងអាណត្តិ​កន្លង​ទៅ និង សម្តេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្នុងអាណត្តិទី៧ នេះ តែងតែចាត់ទុកការសិក្សា អប់រំជាអាទិភាពមួយដ៏សំខាន់ ក្នុង​ការ​អភិវឌ្ឍ​សង្គម-សេដ្ឋកិច្ចជាតិ។ ក្នុងន័យនេះ រាជរដ្ឋាភិបាលបានស្តារ និងពង្រឹងវិស័យអប់រំជា បន្តបន្ទាប់ ដោយ​ការពង្រឹងទាំងគុណភាពសិក្សា និងការកសាងអគារសិក្សានៅទូទាំងប្រទេស។

យែកនៅេត្តកំពង់ធំ ឯកឧត្ត ជា ចាន់តូ អតីតអគ្គទេសាភិបាលកិត្តិយស នៃ​ធនាគារ​ជាតិ​នៃ​កម្ពុជា និងជាតំណាងរាស្ត្រមណ្ឌលខេត្តកំពង់ធំ កន្លងមក ឯកឧត្តមតែងតែបានខិតខំប្រឹងប្រែង អស់ពីកម្លាំងកាយចិត្តកសាងសមិទ្ធផលជាច្រើន នៅក្នុង ខេត្តកំពង់ធំ ដែលក្នុងនោះបានការ​កសាង​អគារសិក្សាជាច្រើន ទាំងបឋមសិក្សា អនុវិទ្យាល័យ និងវិទ្យាល័យជាដើម បច្ចុប្បន្ន, យើង មាន​សាលាមត្តេយ្យ និងសាលាបឋមសិក្សានៅស្ទើរគ្រប់ភូមិ ក្នុងនោះក្នុង ១ ឃុំ យ៉ាងហោច​ណាស់ ត្រូវមានអនុវិទ្យាល័យ ១ កន្លែង និងឃុំខ្លះៗ មានដល់ ២ អនុវិទ្យាល័យ, ដែលនេះ​ជា​ការ​ជួយ​សម្រួលដល់សិស្សានុសិស្ស មិនបាច់ធ្វើដំណើរទៅរៀនឆ្ងាយពីផ្ទះ។

លោកជំទាវបណ្ឌិត បន្តទៀតថា ការសិក្សាក្នុងស្ថានភាពល្អប្រសើរនេះ មានសារៈសំខាន់ណាស់ ដើម្បី​ទាក់​ទាញឱ្យសិស្សានុ-សិស្ស ចង់បន្តការសិក្សាទៅមុខឱ្យបានវែងឆ្ងាយ ក្នុងនោះការ​បញ្ជូន​កូន​មក​រៀន មិនត្រឹមតែជាកាតព្វកិច្ចរបស់មាតាបិតាគ្រប់រូបនោះទេ តែក៏ដូចជាកា​រ​សន្សំ​ប្រាក់​ឱ្យ​កូន​ និងជួយស្រោចស្រង់ជីវភាពឱ្យរួចផុតពីភាពក្រីក្រដោយប្រសិទ្ធភាពផងដែរ ដូចពាក្យ​ស្លោក​បរទេស មួយបានពោលថា៖ “ការសិក្សាគឺជាស្ពានឆ្ពោះទៅអនាគត ចង់មាន​ថ្ងៃ​ស្អែក​ទាល់​តែ​រៀប​ចំ​ពី​ថ្ងៃនេះ”។ លើសពីនេះ ការបញ្ជូនកូន មករៀន ក៏ជាការរួមចំណែកកសាង និងអភិវឌ្ឍ​សង្គម​ជាតិ​យើង សម្រាប់រយៈពេលវែង ដោយសារសិស្សានុសិស្សដែលកំពុងសិក្សា នាពេលនេះ នឹង​ក្លាយ​ជា​សសរទ្រូងដ៏រឹងមាំប្រកបដោយគុណភាពនៅក្នុងវិស័យនានា ហើយក៏​អាច​ក្លាយ​ជា​ថ្នាក់​ដឹកនាំ នាពេលអនាគត ទៀតផង៕ អត្ថបទ៖ សុន រ៉ាឌី