រដ្ឋមន្ត្រីទេសចរណ៍ជំរុញរួមគ្នាបន្តប្រឹងប្រែងទាក់ទាញ និងផ្សព្វផ្សាយគោលដៅទេសចរណ៍កម្ពុជា

រដ្ឋមន្ត្រីក្រសួងទេសចរណ៍បានបញ្ជាក់ថា ប្រតិបត្តិករទេសចរណ៍ឯកជន បាន​ចូលរួម​ចំណែក​យ៉ាង​សំខាន់​ក្នុង​ផ្សព្វផ្សាយកិត្តិនាមកម្ពុជាទៅកាន់ទីផ្សារអន្តរជាតិ និងការនាំភ្ញៀវទេសចរ​អន្តរជាតិ ឲ្យមកទស្សនានៅកម្ពុជា។ ឯកឧត្តមបានជំរុញលើកទឹកចិត្ត ឲ្យប្រតិបត្តិករ​ទេសចរណ៍​ជាតិ និងអន្តរជាតិបន្តខិតខំប្រឹងប្រែងទាក់ទាញ និងជួយផ្សព្វ​ផ្សាយ​គោលដៅ​ទេសចរណ៍​កម្ពុជា​បន្ថែម​ទៀត ព្រោះ“ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍” ។

ថ្លែងនៅក្នុងពិធីបើកអង្គសិក្ខាសាលាជំនួបផ្លាស់ប្ដូរពាណិជ្ជកម្មទេសចរណ៍កម្ពុជា ២០២៤ រយៈ​ពេល​២​ថ្ងៃ(១៤ -១៥) ខែធ្នូ ឆ្នាំ២០២៤ ដែលបានរៀបចំឡើង នៅសណ្ឋាគារ good time relax Hotel ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានគូសបញ្ជាក់ថា ក្រសួងទេ​សចរ​ណ៍​បាន​​សហការជាមួយ សមាគមទេចរណ៍អាស៊ីបាស៊ីហ្វិកកម្ពុជា( PATA Cambodia) បានរៀបចំ​ជំនួប​ផ្លាស់​ប្ដូរពាណិជ្ជកម្មទេសចរណ៍អន្តរជាតិ ២០២៤ នេះឡើងក្នុងគោល​បំណង​ជំរុញ​ការ​តភ្ជាប់​កញ្ចប់​ទស្សនកិច្ចទេសចរណ៍ ពីបណ្តាប្រទេសនានាមកកម្ពុជា និងពីកម្ពុជា​ទៅ​ប្រទេស​ផ្សេង​ៗ តាមរយៈការផ្លាស់ប្តូរប្រភពពាណិជ្ជកម្ម រវាងក្រុមហ៊ុនទេសចរណ៍ក្រៅប្រទេស ជាមួយ​ប្រតិបត្តិករ​ទេសចរណ៍ក្នុងស្រុក ពិសេសការបង្កើនកញ្ចប់​ទស្សនកិច្ច​ទេសចរណ៍​មក​កាន់​តំបន់​ឆ្នេរ​សមុទ្រក​ម្ពុជា ដោយឆ្លៀតឱកាសយកបុណ្យសមុទ្រនេះ ឲ្យធុរជនជាតិ និងអន្តរជាតិ អាចស្វែង​យល់​ពី​សក្តានុពល នៃគោលដៅកម្ពុជាបន្ថែមទៀត។

ឯកឧត្តមរដ្ឋមន្ត្រីបានជំរុញលើកទឹកចិត្តឲ្យប្រតិបត្តិករទេសចរណ៍ជាតិ និងអន្តរជាតិ ជូយចូល​រួម​ផ្សព្វ​ផ្សាយ​គោលដៅទេសចរណ៍កម្ពុជា និងចូលរួមអនុវត្តតាមយុទ្ធនាការរបស់ក្រសួង “ម្នាក់ៗ​គឺជា​អ្នក​ផ្សព្វផ្សាយទេសចរណ៍កម្ពុជាម្នាក់” និងយុទ្ធនាការ “ទេសចរណ៍ដើម្បីទាំងអស់គ្នា ទាំង​អស់គ្នា ដើម្បីទេសចរណ៍”។

លោកធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជា បានបញ្ជាក់ថា ជំនួប​រវាង​អ្នក​ទិញ និងអ្នកលក់នេះធ្លាប់ធ្វើឡើងនៅភ្នំពេញ ខេត្តសៀមរាប និងខេត្តព្រះសីហនុ ដោយឡែក​ខេត្តកំ​ពត​ជាលើកទី១ ក្នុងគោលបំណង់៣សំខាន់ ។

នៅក្នុងជំនួបនោះ ក៏មានការអញ្ជើញចូលរួមជាគណៈអធិបតីពី ឯកឧត្តមម៉ៅ ធនិន អភិបាល​ខេត្ត​កំពត និងឯកឧត្តម Nathapong Sangonchit អភិបាលខេត្តត្រាត ព្រះរាជាណាចក្រថៃ ដើម្បី​បើក​កម្ម​វិធីជំនួបរវាងទុរជន និងប្រតិបត្តិករទេសចរណ៍ជាតិ និងអន្តរជាតិសរុបជាង២០០នាក់ តំណាង​ក្រុមហ៊ុន ៧៥ក្រុមហ៊ុន មកពី៨ប្រទេស។ បន្ទាប់មកឯកឧត្តមរដ្ឋមន្ត្រី និងឯកឧត្តម​អភិបាល​ខេត្ត​ទាំងពីរ ក៏មានជំនួបដោយឡែកមួយផ្សេងទៀត ដើម្បីពង្រឹងកិច្ច​សហប្រតិបត្តិការ​លើ​វិស័យទេសចរណ៍រវាងកម្ពុជា និងថៃ ពិសេសខេត្តកំពត និងខេត្តត្រាតផងដែរ ។

រយៈ​ពេល១១ខែ កម្ពុជាទទួលបានទេសចរបរទេសសរុប ៦លាននាក់ កើនើង២% ធៀប​នឹង​រយៈ​ពេល្នានៅឆ្នាំ២០២៣ ក្នុងនោះទីផ្សារថៃឈរលំដាប់ទី១ វៀតណាមទី២ និងទីផ្សារចិន​លំដាប់​ទី៣ ប្រភពទីផ្សារទេសចរណ៍មកពីតំបន់អាស៊ីប៉ាស៊ីហ្វិក មានជាង៥លាននាក់។ តាម​ការ​ព្យាករណ៍នៅ​ឆ្នាំនេះ កម្ពុជានឹងទទួលភ្ញៀវទេសចរអន្តរជាតិ ប្រមាណ៦លាន ៧សែននាក់ ៕