សាខាកាកបាទក្រហមខេត្តត្បូងឃ្មុំ នាំអំណោយមនុស្សធម៌ ចែកជូនពលរដ្ឋងាយរងគ្រោះ ៥៣គ្រួសារ

ឯកឧត្ដម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ និង​ជា​ប្រធាន​គណៈកម្មាធិការ​សាខា​កាក​បាទ​ក្រហមខេត្ត កាលពីថ្ងៃទី១៤ ខែធ្នូ ឆ្នាំ២០២៤នេះ បានអញ្ជើញ​ចុះសំណេះ​សំណាល សួរសុខទុក្ខ និងនាំយកអំណោយសាខាកាកបាទក្រហមខេត្ត ទៅប្រគល់ជូន​ប្រជាពលរដ្ឋ​ងាយរងគ្រោះប្រមាណ៥៣គ្រួសារ នៅបរិវេណសាលាបឋមសិក្សាបឹងផ្តិល ស្ថិត​នៅ​ឃុំ​ទួលសុភី ស្រុកអូរាំងឪ ខេត្តត្បូងឃ្មុំ ។

មានប្រសាសន៍នាឱកាសនោះ ឯកឧត្ដម ប៉ែន កុសល្យ បានពាំនាំនូវប្រសាសន៍របស់សម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និង​សម្តេច​ធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ផ្ដាំផ្ញើការសួរសុខទុក្ខ ដោយក្តីបារម្ភនឹករលឹក អាណិត​ស្រឡាញ់​យ៉ាងជ្រាលជ្រៅ និងបាននាំយកអំណោយមួយចំនួន ដើម្បីជួយសម្រាល​ដល់​ការ​លំបាក​របស់ប្រជាពលរដ្ឋផងដែរ។

កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន គឺ​តែង​តែ​យក​ចិត្ត​ទុក្ខដាក់ខពស់បំផុតចំពោះប្រជាពលរដ្ឋរងគ្រោះ និងងាយរងគ្រោះ ក៏ដូចជា​ចាស់​ជរា​គ្មាន​ទីពឹង គ្រួសារទីទ័លក្រ ឬប្រជាពលរដ្ឋដែលរងគ្រោះដោយគ្រោះធម្មជាតិ ឬអគ្គិភ័យ សម្តេច​តែង​តែ​នាំ​យកអំណោយមនុស្សធម៌ទៅចែកជូនដល់ដៃបងប្អូនដោយគ្មានការរើសអើង មិនប្រកាន់​និន្នាការ​នយោបាយនោះទេ ហើយទីណាមានទុក្ខលំបាក ទីនោះតែងតែមានមុខអាជ្ញាធរ ជាពិសេស​មន្ត្រីកាកបាទក្រហមតែងចុះជួយបងប្អូនគ្រប់ពេលវេលា ហើយការចុះ​មក​ជួយ​នេះ​គឺ​មិន​គិត​ពីជាតិសាសន៍ ពណ៌សម្បុរ ឬនិន្នាការនយោបាយអ្វីទាំងអស់។

ជាមួយគ្នានោះឯកឧត្តម ប៉ែន កុលស្យ ក៏បានផ្តាំផ្ញើ ដល់បងប្អូនប្រជាពលរដ្ឋទាំងអស់ ត្រូវមាន​ការ​ប្រុង​ប្រយ័ត្នជាប់ជានិច្ច ចំពោះគ្រោះអគ្គិភ័យ និងគ្រោះធម្មជាតិ​ដែល​តែង​កើត​មាន​ឡើង​ជា​យថាហេតុ និងត្រូវចេះអប់រំកូនចៅ ឱ្យចៀសឆ្ងាយឧបាយមុខផ្សេងៗ ហើយត្រូវចូល​រួម​គោរព​ច្បាប់​ចរាចរណ៍ឲ្យបានម៉ឺងម៉ាត់។ បើតាមលោក រស់ សាខន នាយកប្រ​តិបត្តិ​សាខា​ស្ដីទី​កាកបាទ​ក្រហមខេត្តត្បូងឃ្មុំ បានឲ្យដឹងថា អំណោយមនុស្សធម៌ ដែលសាខាកាកបាក្រហមខេត្ត នាំ​យក​មក​ផ្តល់​ជូន​ដល់ជនងាយរងគ្រោះចំនួន៥៣គ្រួសារ ក្នុងមួយគ្រួសារៗទទួលបាន អង្ក២៥ គីឡូក្រាម​, មី១កេស, ត្រីខ១យួរ, ទឹកត្រី១យួរ, ទឹកស៊ីអ៊ីវ១យួរ,ប្រេងឆា១ដប, និងថវិកាមួយ​ចំនួន​ផងដែរ​៕ ដោយ ៖ ជឹង សេងឡុង