វិទ្យាល័យបាក់ទូកយកចិត្តទុកដាក់ទប់ស្កាត់ការលក់ដូរភេសជ្ជៈ និងអាហារប៉ះពាល់សុខភាព​សិស្ស

គណៈគ្រប់គ្រង នៃវិទ្យាល័យបាក់ទូក បានបន្តការយកចិត្តទុកដាក់ខ្ពស់ ក្នុង​ការ​អនុវត្ត​គោលការណ៍​ណែនាំរបស់ក្រសួងអប់រំ លើការហាមមិនឱ្យមានការលក់ដូរគ្រឿងភេសជ្ជៈ និង​នំនែក​ ចំណី​អាហារ ទាំងឡាយណា ដែលប៉ះពាល់សុខសុខភាព សិស្សានុសិស្ស ។

លោកខាត់ សារ៉ង នាយករងវិទ្យាល័យបាក់ទូក បានប្រាប់ឱ្យដឹងថា  នេះ​មិន​មែន​ជា​កិច្ច​ការងារ​ថ្មី​នោះ​ទេ គឺជាការអនុវត្តតាមគោលការណ៍ណែនាំជាបន្តបន្ទាប់មករហូតហើយ របស់ក្រសួង​អប់រំ​យុវជន និងកីឡា ក៏ដូចជាមន្ទីរអប់រំរាជធានីភ្នំពេញ លើកិច្ចការងារ​គិតគូរ​ពី​សុខ​មាល​ភាព​របស់​សិស្ស ​ក្នុងសាលាទាំងអស់ ។

លោកនាយករង បន្តថា បច្ចុប្បន្ននេះ ក្នុងវិទ្យាល័យ ពុំមាន​ការ​អនុញ្ញាត​​ឱ្យ​មាន​ការ​លក់​ដូរ​នូវ​គ្រឿង​ភេសជ្ជៈ ដែលត្រូវបានហាមឃាត់នោះឡើយ ។ វិទ្យាល័យ ក៏បានអប់រំផ្សព្វផ្សាយជាប្រចាំ ដល់​សិស្សានុសិស្សតាមរយះការគោរពទង់ជាតិ នៅរៀងរាល់ដើម និងចុងសប្តាហ៍ ក៏ដូច​ជា​ការ​លើក​ផ្ទាំងអក្សរ តាំងនៅជាច្រើនកក្នុងវិទ្យាល័យ បង្ហាញពីប៉ះពាល់ផងដែរ ។

អ្នកលក់ដូរ ក្នុងវិទ្យាល័យខាងលើ បានចូលរួមគោរពជាមួយគោលការណ៍ណែនាំរបស់ក្រសួង និង​គណៈ​គ្រប់​គ្រងវិទ្យាល័យ ដោយពួកគាត់បានបញ្ឈប់ការលក់ដូរគ្រឿងភេសជ្ជៈ និងចំណី​ទាំង​ឡាយ​ណា ដែលប៉ះពាល់សុខភាពសិស្ស មកជាយូរមកហើយដែរ ។

គួរបញ្ជាក់ថា ក្រសួងអប់រំ យុវជន និងកីឡាបានចេញសេចក្តីជូនដំណឹងថ្មី កាលពីថ្ងៃទី១០ ខែធ្នូ ឆ្នាំ​២០២៤ ដោយធ្វើការហាមឃាត់ ការទទួលទាន ការចែកចាយ ការតាំងលក់ និងការផ្សព្វ​ផ្សាយ​ពាណិជ្ជ​កម្ម​ផលិតផលភេសជ្ជៈប៉ូវកម្លាំងគ្រប់ ប្រភេទ នៅក្នុង និងជុំវិញជាប់​បរិវេណ​គ្រឹះស្ថាន​សិក្សា​ចំណេះ​ទូទៅសាធារណៈនិងឯកជន និងគ្រឹះស្ថានអប់រំ បច្ចេកទេសជាដើម ដើម្បីបង្ការហា​និភ័យ​នៃ​ជំងឺ​មិនឆ្លង ជាពិសេសជំងឺទឹកនោមផ្អែម ដែលពាក់ព័ន្ធនឹងទម្លាប់ ទទួលទានចំណី​អាហារ​ ភេសជ្ជៈផ្អែម និងភេសជ្ជៈប៉ូវកម្លាំង បង្កផលប៉ះពាល់ដល់សុខមាលភាពសិស្សានុសិស្ស នាពេល​បច្ចុប្បន្ននេះ៕ អត្ថបទ ៖ លីហេង