នាវាចម្បាំងអាមេរិក ចូលចតនៅកំពង់ផែខេត្តព្រះសីហនុចំនួនប្រាំថ្ងៃ ដើម្បីរឹតចំណងមិត្តភាព​ជាមួយកម្ពុជា

ដូចការគ្រោងទុក នាវាចម្បាំងកងទ័ពជើងទឹកសហរដ្ឋអាម៉េរិក មួយគ្រឿង ឈ្មោះ USS SAVANNAH (LCS 28) ដែលមាននាវិកចំនួន១០៣ នៅព្រឹកថ្ងៃទី ១៦ ខែធ្នូនេះ បាន​ចូល​ចត​នៅ​កំពង់​ផែស្វយ័តក្រុងព្រះសីហនុហើយ ខណៈការ​ចូល​សំចត​នេះ​គឺ​មាន​រយៈពេល​៥ថ្ងៃ​គឺ​ចាប់​ពីថ្ងៃ​ទី១៦ដល់ថ្ងៃទី២០ ខែធ្នូ ឆ្នាំ២០២៤។

ការចូលចតជាថ្មីរបស់នាវាអាម៉េរិកលើដែនសមុទ្រកម្ពុជានេះ គឺបន្ទាប់​ពីអាក់ខាន​ជា​ច្រើន​ឆ្នាំ​មក​ហើយ ដោយក្រសួងការពារជាតិកម្ពុជា បានអះអាងថាការចូលសំចតនាវារបស់អាម៉េរិកនេះ ក្នុង​គោល​បំណងពង្រឹង និងពង្រីកចំណងមិត្តភាព ក៏ដូចជាការលើកកម្ពស់នៃកិច្ចសហប្រតិបត្តិការ ទ្វេភាគីរវាងកម្ពុជា និងអាម៉េរិក។

បើតាមផេកហ្វេសបុកផ្លូវការរបស់កងទ័ពជើងទឹកកម្ពុជា បានឲ្យដឹង​ថា​នាវា​ចម្បាំង​កង​ទ័ព​ជើង​ទឹក​សហរដ្ឋ​អាម៉េរិក ដែលបានធ្វើដំណើរមកដល់កម្ពុជានៅថ្ងៃនេះ គឺមានការទទួល​ដោយ​ផ្ទាល់​ដោយ​លោក​វរនាវីឯក មាន សាវឿន មេ្ាររងមលដ្ឋានសមុទ្ររាម ក្នុងនាមកងទ័ពជើង​ទឹក​មូល​ដ្ឋាន​សមុទ្ររាម អមជាមួយការចូលរួមពីអាជ្ញាធរពាក់ព័ន្ធក្នុងខេត្តព្រះសីហនុផងដែរ។

តាមការគ្រោងទុកក្នុងអំឡុងពេល៥ថ្ងៃ នៃការចូលសំចតនៅកំពង់ផែ ខេត្តព្រះសីហនុនេះ គណៈ​ប្រតិភូ​អាម៉េរិកគ្រោងជួបពិភាក្សាការងារជាមួយមេបញ្ជាការមូលដ្ឋានសមុទ្ររាម និងថ្នាក់​ដឹក​នាំ​រដ្ឋបា​លខេត្តព្រះសីហនុ ហើយក្រុមនាវិករបស់នាវាចម្បាំងសហរដ្ឋអាម៉េរិក និងកងទ័ពជើង​ទឹកក​ម្ពុជា​នឹង​ចូលរួមកម្មវិធីប្រកួតកីឡាមិត្តភាព ដើម្បីលើកកម្ពស់ភាពស្និទ្ធស្នាល និងការសាម​គ្គីគ្នាជា​ក្រុមផ​ង​ដែរ៕

អត្ថបទបាន ចក់រូបភាព ពីសមុទ្ររាម