សិស្សជាប់និងធ្លាក់បាក់ឌុប ចាប់ផ្តើមចូលរៀនជំនាញវិជ្ជាជីវៈថ្នាក់សញ្ញាបត្រជាន់ខ្ពស់បច្ចេកទេស

នៅថ្ងៃទី១៧ ខែធ្នូ នេះ នៅគ្រប់សាលាTVETទាំងអស់ នៅទូទាំងប្រទេស របស់ក្រសួងការងារ និង​បណ្តុះបណ្តាលវិជ្ជាជីវៈ បានចាប់ផ្តើមបើកដំណើរការបណ្តុះបណ្តាលជំនាញវិជ្ជាជីវៈ កម្រិត​សញ្ញា​បត្រ​ជាន់ខ្ពស់បច្ចេកទេស ថ្នាក់អាហារូបករណ៍រាជរដ្ឋាភិបាលដល់សិស្សដែលប្រឡងជាប់ ឬធ្លាក់សញ្ញាបត្រមធ្យមសិក្សាទុតិយភូមិ ។

សិស្សធ្លាក់បាក់ឌុបដែលចូលរៀនជំនាញវិជ្ជាជីវៈនៅថ្ងៃដំបូង នៅវិទ្យាស្ថានជាតិ​ពហុ​បច្ចេកទេស​តេជោ​សែន ខេត្តកណ្តាល បានប្រាប់BTVថា ការសម្រេចចិត្តចូល​រៀន​ជំនាញ​វិជ្ជា​ជីវៈ​កម្រិត​សញ្ញាបត្រ​ជាន់​ខ្ពស់បច្ចេកទេស ថ្នាក់អាហារូបករណ៍របស់រាជរដ្ឋាភិបាល ដើម្បីកុំឱ្យខាត​ពេល​វេលា និងបានប្តេជ្ញាខំប្រឹងរៀនជំនាញវិជ្ជាជីវៈ រយៈពេល២ឆ្នាំនេះ និងខំប្រឹង​រៀន​ចំណេះ​ដឹងទូទៅ​បំប៉ន​បន្ថែម​ផង ដើម្បីត្រៀមប្រឡងបាក់ឌុបនៅឆ្នាំក្រោយនេះទៀត។

លោ ច្រឹង ណារី នាយកវិទ្យាស្ថានជាតិពហុបច្ចេកទេសតេជោសែនខេត្តកណ្តាល បានឱ្យដឹងថា នៅក្នុងបវេសនកាលឆ្នាំ២០២៤នេះ វិទ្យាស្ថានជាតិ បានទទួលសិស្ស​ចូលរៀន​ជំនាញ​វិជ្ជា​ជីវៈ​កម្រិត​សញ្ញាបត្រ​ជាន់ខ្ពស់បច្ចេកទេសទាំង៧ជំនាញ ក្នុងនោះ​ជំនាញ​ដែល​មាន​សិស្ស​ចូល​រៀន​ច្រើន​ជាង​គេ រួមមាន៖ ជំនាញអគ្គិសនី បរិក្ខារត្រជាក់ សំណង់ស៊ីវិល និង​ជំនាញ​យន្តសាស្ត្រ​រថយន្ត ជួសជុល និងថែទាំរថយន្តជាដើម។

ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​ឱ្យដឹងថា នៅថ្ងៃនេះ គ្រប់សាលាTVETទាំងអស់នៅទូទាំងប្រទេស ចាប់ផ្តើមបើកដំណើរ​ការ​បណ្តុះ​បណ្តាល​ជំនាញវិជ្ជាជីវៈ កម្រិតសញ្ញាបត្រជាន់ខ្ពស់បច្ចេកទេស ដែលផ្តល់អាហារូបករណ៍​ដោយ​រាជ​រដ្ឋាភិបាល ជូនសិស្សប្រឡងជាប់ និង ធ្លាក់បាក់ឌុប ដើម្បីមានជំនាញ​វិជ្ជាជីវៈ​ពិត​ប្រាកដ​អាច​ប្រកបរបរការងារ បង្កើតប្រាក់ចំណូល ចិញ្ចឹមជីវភាពគ្រួសារ នៅថ្ងៃអនាគត ។ ទន្ទឹមនឹងនេះដែរ គ្រប់បណ្តាសាលាTVETទាំងអស់ គឺនៅតែបន្តទទួលពាក្យចុះឈ្មោះរៀនជំនាញ វិជ្ជា​ជីវៈសញ្ញាបត្រជាន់ខ្ពស់បច្ចេកទេសនេះជាធម្មតា ៕ អត្ថបទ៖ ស៊ុម សុខជា