ពលរដ្ឋ និងសហជីពគាំទ្រពេញទំហឹងពាក្យ«ផ្ការីកក្នុងសួនសន្ដិភាព» របស់សម្ដេចតេជោ និងសម្ដេចបវរធិបតី

ពលរដ្ឋ និងសហជីពគាំទ្រពេញទំហឹងចំពោះពាក្យ«ផ្ការីកក្នុងសួនសន្ដិភាព»របស់សម្ដេចតេជោ ហ៊ុន សែន ប្រធានព្រឹទ្ធសភា និងសម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ដោយសារ​យុទ្ធសាស្រ្ត​នេះចាប់ផ្ដើម​ការ​អភិវឌ្ឍ​ន៍នានាក្នុ​ង​ប្រទេស​កើត​ចេញ​ពី​ការ​ធ្វើ​តិច​តួច​ទៅ​ច្រើន​ និងអនុវត្តពីតូចទៅធំ។

លោក ឡេវ សំអាន ជាប្រជាពលរដ្ឋនៅភ្នំពេញបាននិយាយថា៖«ក្នុងនាមខ្ញុំជាពលរដ្ឋខ្មែរ ខ្ញុំ​សូម​គាំទ្រ​ពេញ​ទំហឹងចំពោះប្រសាសន៍សម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត ទាក់​ទង​នឹងពាក្យ«ផ្ការីកក្នុងសួនសន្ដិភាព» ព្រោះបើគ្មានសន្ដិភាព ក៏មិនអាច​ដាំផ្កា​ឱ្យ​រីក​បាន​នោះ​ទេ។ បើគ្មានសន្ដិភាព ក៏មិនអាចអភិវឌ្ឍប្រទេសឱ្យរីកចម្រើនដូចជាផ្ការីកដែរ»។

លោកថា «រាជរដ្ឋាភិបាលកំពុងអនុវត្តយុទ្ធសាស្រ្តផ្ការីកក្នុងសួនសន្ដិភាព គឺយើងមើលទាំង​អស់​គ្នាដឹ​ង​ហើយថា ការអភិវឌ្ឍន៍នានាក្នុងប្រទេស គឺកើតចេញពីការអនុវត្តតិចតួចទៅ គឺធ្វើពីតូច​ទៅធំ ធ្វើពីតិចទៅច្រើន ដែលបូករួមជាមួយ​នឹង​សួន​ច្បារ​សន្ដិភាព​ដែល​ធ្វើឱ្យមា​ន​ឱកាស​អភិវឌ្ឍ​គ្រប់​បែប​យ៉ាងរហូតដល់ពេលនេះ»។

ពលរដ្ឋរូបនេះបន្ថែមថា ការអភិវឌ្ឍបច្ចុប្បន្ន​នេះ​អាច​មើល​ឃើញ​នឹង​ភ្នែក​ដែល​មិន​អាច​ប្រកែក​បាន​តាមរយៈ​សមិទ្ធផលជាច្រើនដូចជា ស្ពាន ផ្លូវថ្នល់តូចធំ អគារខ្ពស់ៗ មានតូច មានធំ មន្ទីរពេទ្យ សាលា​រៀន និងការ​ពង្រីក​វិស័យ​ជា​ច្រើន​ផ្សេង​ៗ​ដែល​សុទ្ធ​សឹង​តែ​កើត​ចេញ​ពី​ការ​ធ្វើ​ពី​តូច​ទៅធំ​ទាំង​អស់។

លោក ឈឺន គង្គា ជាប្រជាពលរដ្ឋម្នាក់ទៀតបាននិយាយថា លោកក៏គាំទ្រ​យុទ្ធសាស្រ្ត​ផ្ការីក​នៅ​ក្នុង​សួន​ច្បារសន្ដិភាពក្រោមការដឹកនាំដោយសម្ដេចតេជោ ហ៊ុន សែន និងសម្ដេចបវរធិបតី ហ៊ុន ម៉ាណែត ជានាយករដ្ឋមន្រ្តីបច្ចុប្បន្ននេះ។ លោកបានកត់សម្គាល់ឃើញថា យុទ្ធសាស្រ្ត​នេះ​ទទួល​បាន​ជោគ​ជ័យជា​បន្តបន្ទាប់តាមរយៈការអភិវឌ្ឍន៍ប្រទេស​ពីចំណុច​សូន្យ​រហូត​ដល់​មានអ្វីៗ​គ្រប់​យ៉ាង​នាពេលនេះ។

លោកចង់ឃើញរាជរដ្ឋាភិបាលអនុវត្តយុទ្ធសាស្រ្តផ្ការីកនេះបន្តទៀត ដោយការអនុវត្ត​គម្រោង​អភិវឌ្ឍ​ហេដ្ឋារចនាសម្ព័ន្ធថ្មីៗបន្ថែមប្រៀបដូចជាផ្ការីកព្រឹកព្រលឹមឥតឈប់ឈរ។ លោក​បាន​ប្ដេជ្ញា​គាំទ្ររាជរដ្ឋាភិបាលក្នុងការថែរក្សាសន្ដិភាព ដើម្បីបង្កើត​ឱកាស​ក្នុង​ការ​អនុវត្ត​យុទ្ធសាស្រ្ត​ផ្ការីក​។

ពលរដ្ឋរូបនេះបន្ថែមថា៖«ផ្ការីកក្នុងសួនសន្ដិភាព ពាក្យនេះខ្ញុំចាប់អារម្មណ៍ខ្លាំងណាស់ ហើយ​ពិត​ជាមា​ន​ន័យ ដូច្នេះក្នុងនាមយើងជាពលរដ្ឋ គឺត្រូវចូលរួមជាមួយរាជរដ្ឋាភិបាល ដើម្បី​ថែ​រក្សា​សួន​ផ្កា​សន្ដិភាព​ឱ្យបានគង់វង្សយូអង្វែងថែមទៀត ហើយធ្វើឱ្យមាន​ក្លិន​ក្រអូប​ដល់​គ្រប់​ទីកន្លែង​នៅ​លើ​សកល​លោក​»។

លោក តែប តុន អនុប្រធានសហភាពពលកម្មជាតិកម្ពុជាបានថ្លែងថា កម្មកររោងចក្រ និង​មជ្ឈដ្ឋាន​ទូទៅផ្សេងទៀតមិនចាប់អារម្មណ៍នឹងផ្ការីករបស់ទណ្ឌិត សម រង្ស៊ី នោះទេ ប៉ុន្ដែពួកគាត់​ចាប់​អារម្មណ៍​ខ្លាំងចំពោះពាក្យ«ផ្ការីកក្នុងសួនសន្ដិភាព»ដែលផ្ដួចផ្ដើមដោយសម្ដេចតេជោ ហ៊ុន សែន តាមរយៈការអភិវឌ្ឍន៍ប្រទេសតាមទម្រង់ផ្ការីក។

លោក​បញ្ជាក់ថា៖«ខ្ញុំកំពុងដឹកនាំ និងកំពុងធ្វើការងារជាមួយកម្មកររោងចក្ររាប់ម៉ឺននាក់ ប៉ុន្ដែ​ពួកគាត់មិនបានចាប់អារម្មណ៍អ្វីនឹងពាក្យផ្ការីករបស់ទណ្ឌិត សម រង្ស៊ីទេ ប៉ុន្ដែពួ​ក​គាត់​ចាប់​អារម្មណ៍​ពាក្យ​របស់សម្ដេចតេជោ ផ្ការីកក្នុងសួនសន្ដិភាព ព្រោះពាក្យនេះប្លែក ហើយដូចនូវអ្វី​ដែល​សម្ដេច​តេជោបានពន្យល់អ៊ីចឹង គឺមកពីការអភិវឌ្ឍន៍ពីរបស់យើងតូចទៅធំ ហើយធ្វើពី​បាត​ដៃទ​ទេ រហូតមានគ្រប់យ៉ាងដល់សព្វថ្ងៃនេះ»។

ប៉ុន្មាន​ថ្ងៃចុងក្រោយនេះ ពាក្យ«ផ្ការីក»កំពុងត្រូវបានជនក្បត់ជាតិ៣ជំនាន់ សម រង្ស៊ី បានបង្ហោះ​ស្ទើរ​រាល់​ថ្ងៃនៅលើបណ្តាញសង្គម ដែលជាសញ្ញាចលនាបដិវត្តន៍មួយ ហើយប្រើប្រា​ស់​ជោគ​ជ័យ​តាម​បណ្តា​ប្រទេសមួយចំនួន ប៉ុន្ដែវាមិនអាចទទួលបានជោគជ័យនៅក្នុងប្រទេសកម្ពុជានោះទេ ដោយសារពលរដ្ឋអស់ជំនឿលើទណ្ឌិត សម រង្ស៊ី។

យ៉ាងណាម៉ិញ សម្ដេចតេជោ ហ៊ុន សែន ប្រធានព្រឹទ្ធសភា​បាន​ចម្អក​ទៅវិ​ញថា​៖«​ផ្ការី​ករៀង​រាល់​ថ្ងៃព្រោះ​កិច្ចការរបស់យើង សមិទ្ធផលរបស់យើងលើគ្រប់វិស័យតែងចេញ​ពី​យុទ្ធសាស្ត្រ​ផ្ការីក​ទាំង​អស់។​ យើងធ្វើពីតូចទៅធំ ពីទាបទៅខ្ពស់ ពីតិចទៅច្រើន សូម្បីតែជោគជ័យ​នៃ​ការវ៉ាក់សាំង​ការពារ​ជំងឺ​កូវីដ១៩ ក៏ចេញពីអភិក្រមផ្ការីកនេះផងដែរ។ល។ យើងចេះតែពាក្យផ្កា ព្រោះយើងមិន​ចេះ​ពាក្យ​មេខ្នុរ កូនខ្នុរនោះទេ ហើយយើងក៏មិនមែនជាកសិករស្រូវក្តឹបនោះដែរ»។

ចំណែក​សម្ដេចបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា​បានមាន​ប្រសាសន៍​ថា៖​«យុទ្ធ​សាស្ត្រ​ផ្ការី​ករបស់រាជរដ្ឋាភិបាល គឺជាការដាំគ្រាប់ផ្កានៃការអភិវឌ្ឍន៍ ហើយការអភិវឌ្ឍន៍​នៅ​ក្នុង​តំបន់​ទាំង​អស់នេះ សម្រាប់បម្រើផលប្រយោជន៍ជូនប្រជាពលរដ្ឋ និងសង្គម-សេដ្ឋកិច្ច ព្រោះ​ផ្ការីក​នៃ​សន្តិភាព មានសុខដុមនីយកម្ម និងភាពរីកចម្រើននៃជីវភាពរស់នៅរបស់ប្រជាជនកម្ពុជា»៕