អាជ្ញាធរខណ្ឌច្បារអំពៅ នឹងចាត់វិធានការលើទីតាំងទាំងឡាយណា ដែលយកចំណីផ្លូវធ្វើអាជីវកម្មផ្ទាល់ខ្លួន

ភ្នំពេញ ៖ កាលពីវេលាព្រឹកថ្ងៃទី១៨ ខែធ្នូ ឆ្នាំ២០២៤ កម្លាំងអាជ្ញាធរខណ្ឌច្បារអំពៅ ដឹកនាំដោយលោកគុយ គឹមហ៊ាង នាយករងរដ្ឋបាលខណ្ឌ បានបន្តការចុះរៀបចំសណ្តាប់ធ្នាប់សាធារណះនៅលើផ្លូវលេខ៣៦៩ ស្ថិតក្នុងសង្កាត់ច្បារអំពៅទី២ ខណ្ឌច្បារអំពៅ ។

លោកនាយករងរដ្ឋបាលខណ្ឌបានឱ្យដឹងថាកន្លងមករដ្ឋបាលខណ្ឌតែងតែចុះណែនាំនិងចែកលិខិតជូនដំណឹងលេខ ៤៩៥/៤៤ សជណ .ចអព. ដល់អាជីករ ក្នុងន័យមិនអនុញ្ញាតឱ្យដាក់តាំងលក់ទំនិញ និងសម្ភារផ្សេងៗលើផ្លូវនិងចិញ្ចើមផ្លូវសាធារណៈ។

បន្ទាប់ពីទទួលបានការណែនាំនិងលិខិតជូនដំណឹងរួចហើយ ឃើញថាអាជីវករភាគច្រើនគោរព និងអនុវត្តតាមការណែនាំ ជាមួយគ្នានេះក៏នៅមានអាជីវករមួួយចំនួនតូចប៉ុណ្ណោះ ដែលនៅតែបំពានដោយដាក់តាំងលក់ទំនិញ និងសម្ភារផ្សេងៗលើផ្លូវ និងចិញ្ចើមផ្លូវសាធារណៈ ដែលបង្កឱ្យបាត់សោភ័ណ្ឌភាពនិងបង្កការកកស្ទះចរាចរណ៍ ។

ករណីម្ចាស់ទីតាំង ឬអាជីវកម្មទាំងឡាយ ដែលនៅតែបំពានគោលការណ៍ណែនាំ ហើយនៅតែបំពានទៀតនោះ រដ្ឋបាលខណ្ឌ នឹងចាត់វិធានការណ៍រដ្ឋបាល ដោយមិនលើនោះឡើយ

លោកនាយករងរដ្ឋបាលខណ្ឌ បានបញ្ជាក់ថា ៖ ចំពោះកិច្ចការងាររៀបចំសណ្តាប់ធ្នាប់នេះដែរ កន្លងទៅ ក្រោមការចង្អុលបង្ហាញពីលោកចេង មុនីរ៉ា អភិបាខណ្ឌច្បារអំពៅ តែងតែឱ្យមន្ត្រីពាក់ព័ន្ធ ចុះពិនិត្យ និងរៀបចំឱ្យបានល្អរៀបរយ ក្នុងដែនសមត្ថកិច្ចរបស់ខ្លួន ដើម្បីរបៀបរៀបរយលើដងផ្លូវសាធារណះ បញ្ចៀសបានពីការកកស្ទះនានា ផងដែរ ពិសេសហាមប្រាមដាច់ខាតរាល់ការលក់ដូរ ឬបើកអាជីវកម្មនានាទាំងឡាយណា ដែលយកចំណីផ្លូវធ្វើជាផលប្រយោជន៍ផ្ទាល់ខ្លួន ដោយមិនបានខ្វល់ខ្វាយពីផលប៉ះពាល់ដល់សង្គមជាតិ ៕ លីហេង