តុលាការកំពូលអាមេរិក នឹងពិចារណាលើសំណើបញ្ឈប់ការហាមឃាត់របស់ TikTok

តុលាការកំពូលរបស់សហរដ្ឋអាមេរិក បានសម្រេចកាលពីថ្ងៃពុធ (១៨ ធ្នូ) ថានឹងទទួលស្តាប់កិច្ចប្រឹងប្រែងរបស់បណ្ដាញសង្គម TikTok និងក្រុមហ៊ុនមេដែលមានមូលដ្ឋាននៅចិនរបស់ខ្លួនគឺ ByteDance ក្នុងសំណើរារាំងច្បាប់មួយ ដែលមានបំណងបង្ខំឱ្យលក់កម្មវិធីវីដេអូខ្លីនេះត្រឹមថ្ងៃទី១៩ ខែមករា ឬមិនដូច្នេះទេនឹងប្រឈមការហាមឃាត់ ដោយហេតុផលសន្តិសុខជាតិ។

ចៅក្រមមិនបានចាត់វិធានការភ្លាមៗតាមសំណើបន្ទាន់ពី TikTok និង ByteDance ក៏ដូចជាអ្នកប្រើប្រាស់មួយចំនួនរបស់ខ្លួនដែលបង្ហោះខ្លឹមសារនៅលើវេទិកាប្រព័ន្ធផ្សព្វផ្សាយសង្គម ទាមទាររកដីកាបង្គាប់ឱ្យបញ្ឈប់ការហាមប្រាមដែលកំពុងលេចឡើងនេះទេ ហើយជំនួសមកវិញ បានសម្រេចចូលស្តាប់សវនាការអំណះអំណាងលើបញ្ហានេះនៅថ្ងៃទី១០ ខែមករា។

អ្នកតតាំងផ្លូវ្បាប់ទាំងនោះកំពុងប្តឹងឧទ្ធរណ៍ចំពោះសេចក្តីសម្រេចរបស់តុលាការជាន់ទាប លើច្បាប់ដែលនឹងហាមប្រាមប្រតិបត្តិការរបស់ TikTok ដែលត្រូវបានប្រើប្រាស់ដោយជនជាតិអាមេរិកប្រហែល ១៧០លាននាក់។

សភាបានអនុម័តវិធានការនេះកាលពីខែមេសា ហើយលោកប្រធានាធិបតី Joe Biden បានចុះហត្ថលេខាឱ្យក្លាយជាច្បាប់ពេញលេញ។ ក្រសួងយុត្តិធម៌ បាននិយាយថា ក្នុងនាមជាក្រុមហ៊ុនចិន TikTok បង្កជា “ការគំរាមកំហែងសន្តិសុខជាតិនៃជម្រៅ និងទំហំដ៏ធំសម្បើម” ដោយសារតែការចូលប្រើប្រាស់ទិន្នន័យដ៏ច្រើនរបស់អ្នកប្រើប្រាស់អាមេរិក។

TikTok បាននិយាយថា ខ្លួនមិនបង្កការគំរាមកំហែងដល់សន្តិសុខអាមេរិកអ្វីនោះទេ ហើយប្ដេជ្ញាតតាំងដល់ទីបញ្ចប់៕