អ្នកស្រុកកោះម៉ាយ៉ត់ របស់បារាំង ដែលរងគ្រោះដោយព្យុះស៊ីក្លូន ទាមទារជំនួយបន្ថែមពីលោក Macron

ប្រជាជននៅក្នុងកោះ ម៉ាយ៉ត់ (Mayotte) ដែលរងការបំផ្លិចបំផ្លាញដោយព្យុះស៊ីក្លូនដ៏កំណាច បានទទូចឱ្យលោកប្រធានាធិបតីបារាំង Emmanuel Macron កាលពីថ្ងៃព្រហស្បតិ៍ (១៩ ធ្នូ) ឱ្យប្រឹងប្រែងបន្ថែមទៀតដើម្បីជួយពួកគេ ខណៈលោកចុះទៅពិនិត្យស្ថានភាពទឹកដីក្រៅប្រទេសរបស់បារាំងមួយនេះ ជាទីដែលមនុស្សជាច្រើននាក់ត្រូវគេបារម្ភថាបានស្លាប់នៅក្នុងគំនរបាក់បែកពីព្យុះស៊ីក្លូន ឈីដូ (Chido)។

មនុស្សមួយចំនួននៅក្នុងចំណោមហ្វូងមនុស្សដែលប្រមូលផ្តុំគ្នានៅខាងក្រៅអាកាសយានដ្ឋាន បានស្រែកទាមទារជំនួយដាក់ក្បួនដំណើរប្រធានាធិបតី ខណៈអ្នកផ្សេងទៀតនិយាយថាពួកគេដឹងគុណចំពោះដំណើរទស្សនកិច្ចរបស់លោក Macron និងការជួយរបស់រដ្ឋាភិបាល។

ក្រុមមន្ត្រីក្នុងទឹកដីបរទេសដ៏ក្រីក្របំផុតរបស់បារាំងមួយនេះ ចបញ្ជាក់បនថា មានអ្នកស្លាប់ចំនួន ៣១នាក់ប៉ុណ្ណោះ ច្រើនជាង ៥ថ្ងៃបន្ទាប់ពីព្យុះស៊ីក្លូន ប៉ុន្តែអ្នកខ្លះនិយាយថា ពួកគេបារម្ភថាអាចមានជនរងគ្រោះរាប់ពាន់នាក់។ សមាជិកសភាម្នាក់បានប្រាប់លោក Macron ថាជនរងគ្រោះមួយចំនួនត្រូវបានកប់នៅក្នុងផ្នូរដ៏ធំ ប៉ុន្តែ មិនអាចបញ្ជាក់បានភ្លាមៗទេ។

ខណៈដែលលោក Macron បានបញ្ជុនយន្តហោះ និងនាវាដឹកជំនួយស្បៀងអាហារ និងផ្នែកវេជ្ជសាស្រ្តជាច្រើន អ្នកស្រុកមួយចំនួននិយាយថាមិនគ្រប់គ្រាន់ទេ។ រដ្ឋាភិបាលរបស់លោក Macron ត្រូវបានអ្នកនយោបាយបក្សប្រឆាំងចោទថា ធ្វេសប្រហែសលើកោះ Mayotte ហើយអ្នកស្រុកមួយចំនួនប្រាប់ថាពួកគេមិនទទួលបានជំនួយទាល់តែសោះ ចាប់តាំងពីព្យុះ Chido វាយប្រហារមក៕