ក្រុមប៉ាឡេស្ទីននិយាយថា កិច្ចព្រមព្រៀងបទឈប់បាញ់ហ្កាហ្សា កាន់តែខិតជិតជាងពេលណាៗទាំងអស់

ក្រុមហាម៉ាស និងក្រុមសកម្មប្រយុទ្ធប៉ាឡេស្ទីនពីរក្រុមផ្សេងទៀតបាននិយាយកាលពីថ្ងៃសៅរ៍ទី២១ខែធ្នូថា កិច្ចព្រមព្រៀងបទឈប់បាញ់នៅដែនដីហ្កាហ្សាជាមួយអ៊ីស្រាអែល គឺកាន់តែខិតជិតជាងពេលណាៗទាំងអស់ ប្រសិនបើអ៊ីស្រាអែលមិនដាក់លក្ខខណ្ឌថ្មី។

កាលពីសប្តាហ៍មុន ការចរចាដោយប្រយោលរវាងអ៊ីស្រាអ៊ែល និងក្រុមហាម៉ាសសម្របសម្រួលដោយកាតា អេហ្ស៊ីប និងសហរដ្ឋអាមេរិក ត្រូវបានធ្វើឡើងនៅទីក្រុងដូហា ដែលធ្វើឲ្យមានក្តីសង្ឃឹមឡើងវិញនៃកិច្ចព្រមព្រៀងមួយ ដើម្បីបញ្ឈប់ការកាប់សម្លាប់មនុស្សនៅហ្កាហ្សាទៀត។

ក្រុមហាម៉ាស ជីហាតអ៊ីស្លាម និងរណសិរ្សឆ្វេងនិយមសម្រាប់ការរំដោះប៉ាឡេស្ទីនបាននិយាយនៅក្នុងសេចក្តីថ្លែងការណ៍រួមដ៏កម្រមួយដោយសំអាងដល់ការលើកឡើងបន្ទាប់ពីកិច្ចពិភាក្សានៅទីក្រុងគែរកាលពីថ្ងៃសុក្រថាលពនៃការឈានដល់កច្ចព្រមព្រៀងបទឈប់បាញ់ និងដោះដូរអ្នកទោសគឺកាន់តែកៀកជាងពេលណាៗទាំងអស់ ប្រសិនបើសត្រូវឈប់ដាក់លក្ខខណ្ឌថ្មីទៀតនោះ។

មេដឹកនាំក្រុមហាម៉ាសបានប្រាប់សារព័ត៌មាន AFP កាលពីថ្ងៃសៅរ៍ថា កិច្ចពិភាក្សាបានធ្វើឱ្យមានវឌ្ឍនភាពដ៏សំខាន់ក្នុងរយៈពេលប៉ុន្មានថ្ងៃថ្មីៗនេះ។

ទោះបីជាទាំងភាគី ហាម៉ាស និងអ៊ីស្រាអែល សុទ្ធតែបានប្រកាសពីការរីកចម្រើនខ្លាំងនៃការចរចាយ៉ាងណាក៏ដោយ ក៏អ៊ីស្រាអែលនៅតែបន្តការវាយប្រហារតាមអាកាសលើដែនដីហ្កាហ្សាជារៀងរាល់ថ្ងៃ ហើយកាលពីថ្ងៃសុក្រសប្ដាហ៍នេះបានសម្លាប់ជនជាតិប៉ាឡេស្ទីនយ៉ាងហោចណាស់២៥នាក់ រួមទាំងយ៉ាងហោចណាស់៨នាក់នៅក្នុងផ្ទះមួយនៅជំរំជនភៀសខ្លួន Nuseirat និងយ៉ាងហោចណាស់ ១០ នាក់រួមទាំងកុមារ ៧ នាក់នៅក្នុងទីប្រជុំជន Jabalia៕