យុវជនគាំទ្រឱ្យដាក់ក្រុមមានចេតនាអាក្រក់បំផ្លាញសន្តិភាព ជាក្រុមភេរវកម្ម

យុវជនជាបញ្ញវន្ត គាំទ្រឲ្យមានច្បាប់ដាក់បញ្ចូល ក្រុមពួកឧទ្ទាមក្រៅច្បាប់ ជាប្រភេទក្រុមភារករ ព្រោះ​សកម្មភាពពួកជ្រុលនិយមទាំងអស់នោះ មានចេតនាអាក្រក់បង្កសង្គ្រាម និងបំផ្លាញ​សុខ​សន្តិភាព ដែលកម្ពុជារកបានដោយលំបាក តាមរយៈការបូជានូវសាច់ស្រស់ឈាមស្រស់ របស់​យុទ្ធជនអ្នកស្នេហាជាតិ ។

ក្រុមយុវជន លើកឡើងថា ពួកគេបានដឹងពីសកម្មភាព និងទង្វើររបស់ក្រុម​និយម​ជ្រុល​ក្រៅ​ប្រទេស ដែលបានញុះញង់ អុចអាលប្រជាពលរដ្ឋឲ្យប្រឆាំងនឹងរាជរដ្ឋាភិបាលស្របច្បាប់ នៅ​ក្នុងប្រទេសកម្ពុជា ដែលសកម្មភាពបែបនេះ ពួកគេបានប្រឆាំង និងបដិសេធជាដាច់ខាត ហើយ​មិនចង់ឲ្យមាននៅក្នុងទឹកដីកម្ពុជានោះទេ ។

ពួកគេបានបន្តថា សម្រាប់យុទ្ធនាការរបស់ទណ្ឌិតក្បត់ជាតិ ៣ជំនាន់ ដែលដាក់​ឈ្មោះ​ថា​យុទ្ធនាការផ្ការីក គឺជាអំពើខុសច្បាប់ ហើយវាផ្ទុយទៅនឹងអ្វី ដែលពួកគេនិយាយពេញ​ៗមាត់ថា​ខ្លួនឯងជាអ្នកប្រជាធិបតេយ្យ ចង់ឲ្យមានការផ្លាស់ប្ដូរបែបប្រជាធិបតេយ្យ គឺតាមរយៈការបោះឆ្នោត ប៉ុន្តែផ្ទុយទៅវិញ ពួកគេបានធ្វើម្មភាពបែបពួកផ្ដាច់ការ្រុលនិយម ចង់ផ្ដួលរំលំរាជរដ្ឋាភិបាលស្របច្បាប់ ហើយពួកគេគាំទ្រ ចំពោះចំណាត់ការណាមួយរបស់រាជរដ្ឋាភិបាលកម្ពុជា ក្នុងការទប់ស្កាត់នូវពួកនិយមជ្រុលទាំងអស់នោះ ។

គួរបញ្ជាក់ថា ក្នុងពិធីបើកមហាសន្និបាតមន្ត្រីសង្ឃទូទាំងប្រទេសលើកទី៣២ កាលពីខែវិច្ឆិកាកន្លងទៅ សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានថ្លែងថា “តើគួរដល់ពេលហើយឬនៅ? បងប្អូនជនរួមជាតិ និងក្រុមអ្នកច្បាប់ តាក់តែងច្បាប់ ដើម្បីរៀបចំនូវច្បាប់ដាក់ក្រុមជ្រុលនិយមក្រៅប្រទេស ជាក្រុមភេរវកម្ម” ។

បន្ទាប់ពីការថ្លែងរបស់សម្ដេចតេជោនេះ គណបក្សនយោបាយ ក្រុមអង្គការស៊ីវិល ប្រជាពលរដ្ឋ និងស្ថានប័នពាក់ព័ន្ធជាច្រើនទៀត បានប្រកាសគាំទ្រជាបន្តបន្ទាប់ នូវគំនិតផ្តួចផ្ដើមរបស់សម្តេច ក្នុងការបង្កើតច្បាប់ ដាក់ក្រុមជ្រុលនិយមនៅក្រៅប្រទេស ជាក្រុមភេរវកម្ម ។ តែយ៉ាងណាក្តី គិតមកដល់ពេលនេះ ការបង្កើតច្បាប់ដាក់ក្រុមជ្រុលនិយមជាក្រុមភេរវកម្ម មិនទាន់បានរាជរដ្ឋាភិបាលកម្ពុជា យកមកពិភាក្សាក្នុងប្រជុំគណៈរដ្ឋមន្រ្តីនៅឡើយនោះទេ ៕ អត្ថបទ បាន សុខរិទ្ធិ