សិល្បៈគំនូរឌីជីថល គឺជាទម្រង់សិល្បៈថ្មី ជួយលើកតម្លៃមរតកវប្បធម៌របស់អ្នកស្រុកជាតិយើង

ភ្នំពេញ ៖ សិល្បៈគំនូរឌីជីថល គឺជាទម្រង់សិល្បៈថ្មី និងទាន់សម័យបច្ចេកវិទ្យា នៃសង្គមឌីជីថល និងទីផ្សារ និងបង្ហាញឱ្យឃើញពីគំនិតច្នៃ ប្រឌិតបង្កើតថ្មីក្នុងសិល្បៈគំនូរទំនើបឌីជីថល សិល្បៈវប្បធម៌ សិប្បកម្ម ប្រពៃណី និងជាការលើកតម្លៃមរតកវប្បធម៌របស់អ្នកស្រុកជាតិ ដើម។

​ឯកឧត្តម ខឹម ចន្ថា រដ្ឋលេខាធិការក្រសួងវប្បធម៌ និងវិចិត្រសិល្បៈ លើកឡើងក្នុងឱកាស «ពិធីប្រគល់ពានរង្វាន់ជ័យលាភី សិល្បៈគំនូរឌីជីថល ក្រោមប្រធានបទ “សម្រស់មាតុភូមិកម្ពុជាក្នុងសម័យសន្តិភាព” នៅថ្ងៃទី ២២ ធ្នូ ម្សិលមិញនេះថា ការរៀបចំព្រឹត្តិ ការណ៍នេះ គឺជាកម្មវិធីមួយដ៏ល្អ ដោយគោលបំណងផ្តល់ជូនសាធារណជន ពិសេសយុវជន សិស្ស និស្សិត បានស្វែងយល់អំពីស្នាដៃ សិប្បកម្មខ្មែរ តាមសហគមន៍នានាក្នុងប្រទេសកម្ពុជា និងទស្សនាសិល្បៈគំនូរឌីជីថល ដែលជាស្នាដៃរបស់បេក្ខជន-បេក្ខនារ ចូលរួ ប្រកួតប្រជែង ដែលកន្លែងមកក្រសួងបានរៀបចំមានតែ ពិព័រណ៍គំនូរ ចម្លាក់ និងសិប្បកម្មសូត្រ (សូន្យរូប និងសិប្បកម្មជាដើម)។

ឯកឧត្តម បន្តថា ចំណែកនៅពេលនេះ ក្រសួងបានរៀបចំឱ្យមានការប្រកួតប្រជែងសិល្បៈគំនូរឌីជីថល ដែលជាប្រធានបទថ្មី មួយ ជាក់ស្តែងយើងបានរកឃើញអ្នកជាប់ជ័យលាភីនៅពេលនេះ ទោះបីផ្ទាំងគំនូរឌីជីថលអ្នកដែលជាប់ជ័យលាភីនៅមានកម្រិតក៏ ដោយ ក៏ចាត់ទុកជាស្នាដៃដ៏សំខាន់មួយ ដែលយុវជនយើងបានបញ្ចេញអស់ពីកំលាំងកាយចិត្ត លេចចេញជាផ្ទាំងគំនូរទំងនេះឡើង ដើម្បីបង្ហាញដល់គ្រប់មជ្ឈដ្ឋានឱ្យបានឃើញ អំពីកម្លាំងរួមមួយមកពីគ្រប់ជំនាញ គ្រប់វ័យ ដើម្បីបញ្ចេញនូវទេព្យកោសល្យរៀងៗខ្លួន។

ឯកឧត្តម ខឹម ចន្ថា ក៏បានស្ញើចសរសើរចំពោះស្នាដៃរបស់យុវជនយើង ដែលបានតស៊ូរហូតដណ្តើមបានជ័យលាភីផងដែរ ក្នុងនោះឯកឧត្តម ក៏បានផ្តាំផ្ញើរដល់អ្នកជាប់ជ័យលាភី និងអ្នកដែលមិនបានជាប់ជ័យលាភីនៅក្នុងការប្រកួតប្រជែងក្នុងកម្មវិធីនេះ សូមបន្តខិតខំប្រែងប្រែងបញ្ចេញសមត្ថភាព ទេពកោសល្យបន្ថែមទៀត នៅលើគំនិតច្នៃប្រឌិតបង្កើតថ្មី ក្នុងសិល្បៈគំនូរ, ការខិតខំ របស់ប្អូនៗ គឺជាការចូលរួមពង្រឹងកិច្ចការពារ អភិរក្ស និងអភិវឌ្ឍបេតិកភណ្ឌអរូបីដ៏ថ្លៃថ្លរបស់ជាតិយើង។

សូមបញ្ជាក់ថា ក្នុងការប្រកួតប្រជែងនេះ ក្នុងនោះកញ្ញា សួស សុខសុជាតា និស្សិតនៃសកលវិទ្យាល័យភូមិន្ទវិចិត្រសិល្បៈ ជំនាញគំនូរ សារគមនាគមន៍ ទទួលបានជ័យលាភីលេខ១, ចំណែកជ័យលាភីលេខ២ បានទៅលើកញ្ញា ចាន់ អាដែត ជាសិស្សផ្នែកគំនូរ អានីម៉ាស្យុង នៃអង្គការហ្វាមពន្លឺសិល្បៈ និងជ័យលាភីលេខ ៣ បានទៅលើកញ្ញា ងួន រូហ្សា មកពីពន្លឺសិល្បៈខេត្តបាត់ដំបង៕

អត្ថបទ៖ សុន រ៉ាឌី