របាយការណ៍ UN៖ មនុស្សជាង ២០០នាក់ បានស្លាប់ក្នុងការសម្លាប់រង្គាលនៅហៃទី

អង្គការសហប្រជាជាតិ បាននិយាយនៅក្នុងរបាយការណ៍មួយកាលពីថ្ងៃចន្ទ (២៣ ធ្នូ) ថា យ៉ាងហោចណាស់មនុស្ស ២០៧នាក់ ត្រូវបានសម្លាប់ដោយសមាជិកនៃក្រុមជនអន្ធពាល វ៉ាហ្វ ហ្សេរ៉េមី (Wharf Jeremie) នៅក្នុងតំបន់កំពង់ផែ ស៊ីតេ សូឡី (Cite Soleil) របស់ប្រទេសហៃទី កាលពីដើមខែនេះ ដោយបានពិនិត្យឡើងវិញនូវចំនួនអ្នកស្លាប់ដែលប៉ាន់ស្មានដំបូងថាមាន ១៨៧នាក់។

នៅក្នុងរបាយការណ៍ថ្មីមួយស្តីពីការសម្លាប់រង្គាលនេះ ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស បាននិយាយថា យ៉ាងហោចណាស់មានបុរស ១៣៤នាក់ និងស្ត្រី ៧៣នាក់ ភាគច្រើនជាអ្នកស្រុកវ័យចំណាស់ដែលចោទថាធ្វើអំពើអាបធ្មប់ ត្រូវបានសម្លាប់ក្នុងពេលតិចជាងមួយសប្តាហ៍នៃការប្រហារជីវិត ការចាប់ខ្លួន និងការវាយឆ្មក់ ដោយសមាជិកប្រហែល ៣០០នាក់នៃក្រុមប្រដាប់អាវុធ Wharf Jeremie។

មេដឹកនាំក្រុមជនអន្ធពាលនេះ ឈ្មោះ ម៉ូនែល ហ្វីលីច (Monel Felix) ហៅក្រៅថា មីកាណូ (Mikano) បានបញ្ជាឱ្យបើកការវាយប្រហារនោះ បន្ទាប់ពីកូនរបស់លោកធ្លាក់ខ្លួនឈឺ ដោយចោទអ្នកស្រុកថាបានបង្កជំងឺតាមរយៈអំពើផ្លូវងងឹត។

អង្គការសហប្រជាជាតិបាននិយាយថា ជនរងគ្រោះជាច្រើននាក់ត្រូវបានគេចាប់ពង្រត់ពីវត្ត វូឌូ (Voudou) និងពិធីសាសនាផ្សេងៗ។

ការសម្លាប់រង្គាលបានធ្វើឱ្យភ្ញាក់ផ្អើលនៅហៃទី ដែលរួមរឹតក្នុងជម្លោះក្រុមជនអន្ធពាលកាន់តែអាក្រក់ឡើង ធ្វើឱ្យមានការបំផ្លិចបំផ្លាញ កង្វះខាតស្បៀងអាហារ ខណៈបណ្ដាប្រទេសជិតខាងរបស់ខ្លួនយឺតយ៉ាវក្នុងការផ្តល់ជំនួយផ្នែកសន្តិសុខដែលបានសន្យាជាយូរមកហើយ៕