ចិនផ្តល់ថវិកា១លានយ័នដល់កម្ពុជា លើគម្រោងលើកកម្ពស់ការយល់ដឹងទាក់ទងនឹងក្មេងស្រី

ចិនបានសម្រេចជ្រើសរើសកម្ពុជាគឺជាប្រទេសទី១ ក្នុងការផ្តល់ថវិកា តាមរយៈ​មូល​និធិ​របស់​លោក​ជំទាវទី១ នៃភរិយា ឯកឧត្តម ប្រធានាធិបតី ស៊ី ជីនពីង ដើម្បីអនុវត្ត​គម្រោង​លើក​កម្ពស់​ការ​យល់​ដឹងទាក់ទងនឹងក្មេងស្រី ក្រៅពីប្រទេសចិន បន្ទាប់ ពីគម្រោងមួយនេះ បានអនុវត្ត​ដោយ​ជោគជ័យ​នៅក្នុងប្រទេសរបស់ខ្លួន។

ឯកឧត្តម វ៉ាង វិនពីន ឯកអគ្គរដ្ឋទូតចិនប្រចាំកម្ពុជា ក្នុងជំនួបសម្តែងការគួរសម និង​ពិភាក្សា​ការ​ងារ ជាមួយលោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី នៅរសៀលថ្ងៃទី ២៥ ខែធ្នូ ម្សិលមិញនេះ ឯកឧត្តមបានប្រកាសពីកិច្ច សហប្រតិបត្តិការគ្រប់ជ្រុងជ្រោយ លើ​អាទិភាព​ចំនួន​៦ ក្នុងនោះសម្រាប់មានអាទិភាព១ គឺទាក់ទងនឹងនារី, នេះគឺជាជំនួបដំបូង លើការ​ពិនិត្យ​រ​ន​ល្ធភាព ក្នុងការផ្សារភ្ជាប់ទំនាក់ទំនង លើការចាប់ផ្តើមពង្រីកកិច្ចសហការទាក់ទងនឹងនារី រវាង​កម្ពុជា-ចិន។

ឯកឧត្តមឯកអគ្គរដ្ឋទូត ថ្លែងឱ្យដឹងថា គម្រោងនេះជាគម្រោងផ្ទាល់របស់លោកជំទាវទី១ នៃភរិយា ឯកឧត្តម ស៊ី ជីនពីង ប្រធានាធិបតីនៃសាធារណៈរដ្ឋប្រជាមានិតចិន ដែល​បាន​អនុវត្ត​នៅ​ក្នុង​ប្រទេស​ចិន​អស់រយៈពេល៤៥ឆ្នាំមកហើយ បច្ចុប្បន្នគម្រោង នេះបានទទួល​ពាន​រង្វាន់​ពី​អង្គការ​សហ​ប្រជាជាតិ។ តាមរយៈមូលនិធិនេះដែរ លោកជំទាវបានកំពុងអនុវត្តនៅក្រៅប្រទេសរបស់ខ្លួន ដើម្បី​ជួយទៅដល់ក្មេងស្រី ដោយបានសម្រេចជ្រើសយកកម្ពុជាគឺជាប្រទេសទី១ ដោយ​ផ្តល់​ថវិកា​១​លានយ័ន ក្នុងជំហានដំបូង មក កាន់កម្ពុជា ដើម្បីអនុវត្តលើកិច្ចខាងលើនេះ។ ឯកឧត្តម​ឯក​អគ្គ​រដ្ឋ​ទូតបានបញ្ជាក់ថា មូលហេតុសំខាន់ ដែលភាគីចិនបានជ្រើសរើស កម្ពុជាជាប្រទេសដំបូង ក្នុង​ការ​អនុវត្តគម្រោងនេះនៅក្រៅប្រទេសចិន ដោយសារកម្ពុជាគឺជាមិត្តដែកថែប និង​មាន​កិច្ច​សហ​ប្រតិ​បត្តិការត្បូងពេជ្រ ហើយវិស័យកិច្ចការនារីជាផ្នែកមួយ នៅក្នុង​កិច្ច​សហ​ប្រតិបត្តិការ​គ្រប់​ជ្រុង​ជ្រោយ ​នៃវិស័យអាទិភាពទាំង៦។

ជាការឆ្លើយតប, លោកជំទាវកិត្តិបណ្ឌិត អ៊ឹង កន្ថាផាវី បានស្វាគមន៍ និង​ថ្លែង​អំណអ​រ​គុណ​ដល់​មិត្ត​ចិន ដែលតែងតែយកចិត្ត ទុកដាក់ជួយគាំទ្រដល់កម្ពុជា ជាក់ស្តែងការផ្តល់ថវិកា សម្រាប់​អនុវត្ត​លើ​គម្រោង​មជ្ឈ​មណ្ឌលលើកកម្ពស់ការយល់ដឹងក្មេងស្រីនៅ កម្ពុជា ដែលគម្រោងនេះ​នឹង​ចាប់​ផ្តើម​អនុវត្តនៅត្រីមាសទី១ ឆ្នាំ២០២៥ ខាងមុខ ក្នុងវិស័យឌីជីថល ក៏ដូចជា​វិស័យ​វិទ្យា​សាស្ត្រ ​បច្ចេកវិទ្យា គណិតវិទ្យា និងវិស្វកម្មជាដើម គឺជាការជួយលើកកម្ពស់ការយល់ដឹង ជា​ពិសេស​ក្មេង​ស្រីនៅកម្ពុជា ដើម្បីជំរុញបង្កើត ធនធានមនស្សនៅកម្ពុជា ឱ្យសម្បូរបែប និង​ប្រកប​ដោយ​សក្តានុពល ក្នុងការចូលរួមអភិវឌ្ឍន៍សង្គម-សេដ្ឋកិច្ចជាតិ៕ អត្ថបទ៖ សុន រ៉ាឌី