មន្រ្ដីជាន់ខ្ពស់ក្រសួងមហាផ្ទៃ ជំរុញឲ្យមន្រ្តីបង្កើនការចុះបញ្ជីអត្រានុកូលដ្ឋាន,បញ្ជីស្នាក់នៅ,អត្តសញ្ញាណប័ណ្ណសញ្ជាតិខ្មែរ

ភ្នំពេញ ៖ ឯកឧត្តម ប៉ាវ ហមផាន រដ្ឋលេខាធិការក្រសួងមហាផ្ទៃ បានជម្រុញមន្រ្តីនៃ អគ្គនាយកដ្ឋានអត្តសញ្ញាណកម្មគប្បីត្រូវបង្កើនការរៀបចំប្រព័ន្ធចុះបញ្ជីអត្រានុកូលដ្ឋាន,ប្រព័ន្ធចុះបញ្ជីស្នាក់នៅ, ប្រព័ន្ធចុះបញ្ជីអត្តសញ្ញាណប័ណ្ណសញ្ជាតិខ្មែរ និងប្រព័ន្ធចុះបញ្ជីផ្សេងទៀតឱ្យបានទាន់ពេលវេលា ដើម្បីធានាបាននូវការផ្តល់សេវារដ្ឋបាលឱ្យកាន់តែខិតជិតប្រជាពលរដ្ឋ និងកាន់តែមានភាពប្រសិទ្ធភាពខ្ពស់បន្ថែមទៀត។

ថ្លែងនៅពិធីបិទសន្និបាត ត្រួតពិនិត្យលទ្ធផលការងារឆ្នាំ២០២៤ និងលើកទិសដៅ ការងារឆ្នាំ២០២៥ របស់អគ្គនាយកដ្ឋានអត្តសញ្ញាណកម្ម នារសៀលថ្ងៃទី២៦ ខែធ្នូ ឆ្នាំ២០២៤នេះ នៅទីស្ដីការក្រសួងមហាផ្ទៃ ឯកឧត្តម ប៉ាវ ហមផាន រដ្ឋលេខាធិការក្រសួងមហាផ្ទៃ បានមានប្រសាសន៍ណែនាំមន្ត្រីពាក់ព័ន្ធទាំងអស់ ត្រូវបន្តយកចិត្តទុកដាក់ពង្រឹងប្រសិទ្ធភាពនៃការផ្តល់សេវាអត្តសញ្ញាណកម្មជារួម ជាពិសេស សេវាចុះបញ្ជីអត្រានុកូលដ្ឋាន,សេវាចុះបញ្ជីស្នាក់នៅ និងសេវាចុះបញ្ជីអត្តសញ្ញាណប័ណ្ណ សញ្ជាតិខ្មែរ ជូនប្រជាពលរដ្ឋប្រកបដោយស្មារតីទទួលខុសត្រូវខ្ពស់ ផ្តល់ភាពងាយស្រួល និងឆាប់រហ័សប្រកបដោយតម្លាភាពលើការស្នើសុំសេវាអត្តសញ្ញាណកម្មទាំងអស់ ដែលស្ិតៅក្នុងដែនសមត្ថកិច្ច របស់ខ្លួន ដោយគោរពទៅតាមគោលការណ៍ច្បាប់ និងលិខិតបទដ្ឋានគតិយុត្តដែលនៅជាធរមានជាដើម។

ជាមួយគ្នានោះដែរ ឯកឧត្តមរដ្ឋលេខាធិការ ក៏បានលើកឡើងពីការអនុវត្តច្បាប់ ស្តីពីអត្រានុកូលដ្ឋាន ស្ថិតិអត្រានុកូលដ្ឋាន និងអត្តសញ្ញាណកម្ម ដែលបានចូលជាធរមាន នាថ្ងៃទី០១ ខែកក្កដា ឆ្នាំ២០២៤ ដោយត្រូវបន្តជំរុញការរៀបចំសេចក្តីព្រាង លិខិតបទដ្ឋានគតិយុត្តក្រោមច្បាប់ ដែលនៅសេសសល់ឱ្យសម្រេចបានតាមផែនការដែលបានគ្រោងទុកផងដែរ។ ព្រមជាមួយនេះ ត្រូវយកចិត្តទុកដាក់រៀបចំយន្តការអនុវត្តនៅថ្នាក់ក្រោមជាតិ ស្របតាមតាមការចង្អុលរបស់ច្បាប់ និងលិខិតបទដ្ឋានគតិយុត្តក្រោមច្បាប់ គួរត្រូវបានរៀបចំឱ្យបានទាន់ពេលវេលា។

ត្រង់ចំណុចនេះ ឯកឧត្តមបានសង្កត់ធ្ងន់ថា ការអនុវត្តការងារអត្តសញ្ញាណកម្ម ដែលផ្ទុយពីការកំណត់របស់ច្បាប់ និងលិខិតបទដ្ឋានដែលមានជាធរមាន ដោយសារច្បាប់ថ្មីនេះ មានចែងពីទោសបញ្ញត្តិលើការអនុវត្តការងាររបស់មន្ត្រីផ្តល់សេវា (អាចមានទោសដល់ជាប់ពន្ធនាគារ)។ ដូច្នេះសូមមានការ ប្រយ័ត្នប្រយែង និងសូមរក្សាឱ្យបាននូវទំនាក់ទំនងរវាងរដ្ឋបាលថ្នាក់ក្រោមជាតិ មករដ្ឋបាលថ្នាក់ជាតិ ដើម្បីសាកសួរពាក់ព័ន្ធការងារអត្តសញ្ញាណកម្ម ក្នុងករណីមានចម្ងល់ ឬភាពមិនច្បាស់លាស់ណាមួយ ក្នុងការអនុវត្ត។

បើយោងតាមការបញ្ជាក់របស់ ឯកឧត្តម ឧត្តមសេនីយ៍ឯក បណ្ឌិត តុប នេត អគ្គនាយក នៃអគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ បានបញ្ជាក់ឲ្យដឹងថា ក្នុងរយៈពេល១ឆ្នាំកន្លងទៅនេះ ដោយអនុវត្តតាមប្រសាសន៍ដឹកនាំដ៏ខ្ពង់ខ្ពស់របស់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ (ក្រោមការដឹកនាំដ៏ឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី) អគ្គនាយកដ្ឋានអត្តសញ្ញាណកម្ម ក៏ដូចជារដ្ឋបាលថ្នាក់ក្រោមជាតិទាំង ២៥រាជធានី-ខេត្ត បានខិតខំប្រឹងប្រែងបំពេញការងារ ប្រកបដោយការទទួលខុសត្រូវ និងសម្រេចបាននូវសមិទ្ធផលថ្មីៗជាច្រើន៕

អត្ថបទ បាន ចក់