អគ្គនាយកដ្ឋានភស្ដុភារ និងហិរញ្ញវត្ថុ ក្រសួងមហាផ្ទៃ រៀបចំពិធីបិទសន្និបាតបូកសរុបលទ្ធផលការងារឆ្នាំ២០២៤

ភ្នំពេញ ៖ នៅរសៀលថ្ងៃពុធ ទី២៥ ខែធ្នូ ឆ្នាំ២០២៥ ឯកឧត្តម កៅ ខុនដារ៉ា និងឯកឧត្តម នាយឧត្តមសេនីយ៍ សួស អង្គារ៍ រដ្ឋលេខាធិការ ក្រសួងមហាផ្ទៃ ទទួលការងារអគ្គនាយកដ្ឋានភស្ដុភារនិងហិរញ្ញវត្ថុ តំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានអញ្ជើញជាអធិបតីបិទសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារសម្រាប់ឆ្នាំ២០២៥ របស់អគ្គនាយកដ្ឋានភស្ដុភារ និងហិរញ្ញវត្ថុ ក្រសួងមហាផ្ទៃ។

កិច្ចប្រជុំនេះដែរ ក៏មានការអញ្ជើញចូលរួមពី ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង អគ្គស្នងការរង លោក លោកស្រី ប្រធាន-អនុប្រធាននាយកដ្ឋាន ស្នងការរង អង្គភាពចំណុះក្រសួងមហាផ្ទៃ ព្រមទាំងមន្រ្តីជំនាញ នៃអគ្គនាយកដ្ឋានភស្ដុភារនិងហិរញ្ញវត្ថុ ជាច្រើនរូបទៀតផងដែរ។

នាឱកាសនោះដែរ ឯកឧត្តម នាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភស្ដុភារនិងហិរញ្ញវត្ថុ បានធ្វើសេចក្តីរាយការណ៍ដោយសង្ខេប អំពីកិច្ចដំណើរការ និង លទ្ធផលនៃអង្គសន្និបាតប្រចាំឆ្នាំរបស់អគ្គនាយកដ្ឋានភស្តុភារនិងហិរញ្ញវត្ថុ ដែរសម្រេចបាននាពេលកន្លងមក ជូនគណៈអធិបតី និងអង្គពិធីទាំងមូល ជ្រាប។

ថ្លែងបិទក្នុងពិធីសន្និបាតរបស់អគ្គនាយកដ្ឋានភស្ដុភារនិងហិរញ្ញវត្ថុ ឯកឧត្តម កៅ ខុនដារ៉ា រដ្ឋលេខាធិការ ក្រសួងមហាផ្ទៃ បានកោតសរសើរ និងវាយតម្លៃខ្ពស់ដោយស្មោះចំពោះការខិតខំប្រឹងប្រែង និងសមិទ្ធផលសម្រេចបានរបស់អគ្គនាយកដ្ឋានភស្តុភារនិងហិរញ្ញវត្ថុ ក្នុងឆ្នាំ កន្លងមក និងសូមសម្តែងនូវក្តីសង្ឃឹមយ៉ាងមុតមាំថាថ្នាក់ដឹកនាំមន្ត្រីគ្រប់ជាន់ថ្នាក់នឹងបន្តយកអស់ស្មារតីពុះពារគ្រប់ឧបសគ្គសម្រេចបានដោយជោគជ័យ នូវទិសដៅ ភារកិច្ចដែលក្រសួងមហាផ្ទៃ បានប្រគល់ជូនសម្រាប់ឆ្នាំ២០២៤នេះ។

ថ្លែងនៅក្នុងឱកាសនោះដែរ ឯកឧត្តម កៅ ខុនដារ៉ា លើកឡើងថា ការងារភស្តុភារ-ហិរញ្ញវត្ថុ ជាកិច្ចការមួយមានសារៈសំខាន់ ក្នុងចំណោមកិច្ចការសំខាន់ៗទាំងអស់របស់ក្រសួងមហាផ្ទៃ ហើយការងារនេះមានការពាក់ព័ន្ធដោយផ្ទាល់ដល់ការបំពេញកិច្ចប្រតិបត្តិការរបស់អង្គភាពជំនាញនានាចំណុះក្រសួង ក្នុងការរក្សាសន្តិសុខ សណ្តាប់ធ្នាប់សាធារណៈ ដែលក្រសួងមហាផ្ទៃ មានភារកិច្ចទទួលខុសត្រូវចំពោះមុខរាជរដ្ឋាភិបាលក៏ដូចជាពលរដ្ឋផងដែរ ។

ឯកឧត្តមបន្ថែមទៀតថា ការងារភស្តុភារ-ហិរញ្ញវត្ថុនេះ ក៏មានឥទ្ធិពលដល់ការអនុវត្តគោលនយោបាយ របស់រាជរដ្ឋាភិបាល គឺកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ក្នុងឆ្នាំ២០២៤នេះ គឺជាឆ្នាំទី២ នៃដំណាក់កាលទី៤ ដែលមានកម្មវត្ថុស្នូល គឺគណនេយ្យភាពសមិទ្ធកម្ម បានន័យថា យកថវិកា ទៅប្រើហើយឱ្យត្រូវគោលដៅ ហើយត្រូវមានរបាយការណ៍ទៀតផង។ ឯកឧត្តមក៏បាន ស្នដល់គ្រប់ អង្គភាពទាំងអស់ យកចិត្តទុកដាក់អនុវត្តឱ្យបានត្រឹមត្រូវ តាមគោលការណ៍របស់រាជរដ្ឋាភិបាល ក៏ ដូចជាក្រសួងសេដ្ឋកិច្ចនិងហិរញ្ញវត្ថុ៕

អត្ថបទ ៖ បានចក់