មន្ត្រី៖ កំណើននៃរោងចក្រកែច្នៃផ្លែឈើកើនឡើង នៅខេត្តកំពង់ស្ពឺ ធ្វើឲ្យស្វាយកែវរមៀតមានតម្លៃល្អ

កំពង់ស្ពឺ៖ លោក យឹម ណន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ស្ពឺ បានឲ្យដឹងថា នាពេលបច្ចុប្បន្ននេះ ក្នុងខេត្តកំពង់ស្ពឺ មានការវិនិយោគលើវិស័យរោងចក្រសហគ្រាសជាច្រើន ដែលក្នុងនោះក៏មានរោងចក្រកែច្នៃផ្លែឈើផងដែរ ហើយការកើនឡើងនៃរោងចក្រកែច្នៃកសិផលនេះមានរហូតដល់ ១៥កន្លែង ហើយនៅឆ្នាំ២០២៤ បានធ្វើឲ្យផ្លែស្វាយកែវរមៀតមានតម្លៃល្អ ។

ក្នុងកិច្ចប្រជុំបូកសរុបលទ្ធផលការងារកសិកម្ម រុក្ខាប្រមាញ់ និងនេសាទ ប្រចាំឆ្នាំ២០២៤ និងទិសដៅឆ្នាំ២០២៥ នៅថ្ងៃទី២៧ ខែធ្នូ ឆ្នាំ២០២៤ លោកប្រធានមន្ទីរ លើកឡើងថា សម្រាប់ផ្ទៃដីដាំស្វាយកែវរមៀត នៅក្នុងខេត្តកំពង់ស្ពឺ មានចំនួនជាង ៥ម៉ឺនហិកតា ហើយកំពុងឲ្យផលជាង ៤ម៉ឺនហិកតា ខណៈនៅឆ្នាំនេះ ប្រមូលផលបានជាង ៥០ម៉ឺនតោន ។

លោកបន្តថា តម្លៃស្វាយកែវរមៀតដែលត្រូវលក់ចេញ មានចំនួន២ប្រភេទ ក្នុងនោះទី១. ស្វាយខៀវ ដែលត្រូវនាំចូលរោងចក្រ តម្លៃទាបបំផុត ៥០០រៀល ក្នុងមួយគីឡូក្រាម និងទី២. ស្វាយខ្ចប់ស្រស់ តម្លៃចាប់ព ១៥០ ទៅ២០០រៀល ក្នុងមួយគីឡូក្រាម ដែលតម្លៃប៉ុណ្ណេះ ធ្វើឲ្យកសិករទទួលយកបាន ហើយពួកគាត់ក៏សប្បាយចិត្ត ខណៈរោងចក្រកែច្នៃផ្លែស្វាយនេះ គឺមានទាំងការធ្វើជាដំណាប់ និងនាំចេញស្រស់ ទៅកាន់ទីផ្សារអន្តរជាតិ ។

លោក យឹម ណន បានបន្ថែមថា ក្រៅពីស្វាយកែវរមៀត គឺដំណាំស្រូវឆ្នាំនេះ ក៏មានតម្លៃល្អផងដែរ ហើយប្រជាកសិករក៏មិនមានការរអ៊ូរទាំរឿងតម្លៃ ក្នុងនោះស្រូវសែនក្រអូបជាដើម មានតម្លៃពី ១៣០០រៀល ទៅ១ ៤០០រៀល ក្នុងមួយគីឡូក្រាម ។

ក្នុងឱកាសបើកកិច្ចប្រជុំ លោកជំទាវ ហោ ម៉ាលីន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានជំរុញដល់មន្ទីរកសិកម្មខេត្តកំពង់ស្ពឺ បន្តជួយដោះស្រាយបញ្ហាកសិផលរបស់ប្រជាពលរដ្ឋ ឲ្យអស់ពីលទ្ធភាព ក៏ដូចជាពង្រឹងចំណេះដឹងបច្ចេកទេសការដាំដុះដល់បន្ថែមដល់ពួកគាត់ ដើម្បីឲ្យកសិផលទទួលបានផលល្អ ។

ត្រង់ចំណុចនេះ លោក យឹម ណន បានបញ្ជាក់ថា មន្ត្រីជំនាញនឹងបន្តជួយកសិករម្ចាស់ស្វាយ ឲ្យពួកគាត់ចូលរួមអនុវត្តន៍លទ្ធិកម្មកសិកម្មល្អ (GAP) និងការជួយពង្រឹងការធ្វើលទ្ធកម្មកសិកម្មល្អតាមកិច្ចសន្យា ដោយធានាពេលឲ្យផល គឺមានអ្នកទិញ ហើយតម្លៃអាចនិយាយគ្នាបាន ។

គួរបញ្ជាក់ថា ខេត្តសម្បូរដើមត្នោតជាងគេ ក្នុងប្រទេសកម្ពុជាមួយនេះ មានដំណាំសក្ដានុពលជាច្រើន ដូចជាស្វាយកែវរមៀត អំពៅ និងស្រូវជាដើម ហើយក៏មានបន្លែជាច្រើនប្រភេទ ខណៈការចិញ្ចឹមសត្វលក់សាច់ និងពូជ… ក៏មានច្រើនកសិដ្ឋានផងដែរ ៕

អត្ថបទ បាន សុខរិទ្ធិ