សម្ដេចកិត្ដិសង្គហបណ្ឌិត ម៉ែន សំអន អញ្ញើញប្រុងពលី បើកកម្មវិធីដារលាន ដាល់អំបុក​ឈ្នះឈ្នះ នៅក្រុងរុនតាឯកតេជោសែន

នៅព្រឹកថ្ងៃទី២៨ ខែធ្នូឆ្នាំ២០២៤នេះ សម្ដេចកិត្ដិសង្គហបណ្ឌិត ម៉ែន សំអន ឧត្ដមប្រឹក្សាផ្ទាល់ ព្រះមហាក្សត្រ និងជាប្រធានក្រុមប្រឹក្សាជាតិរណសិរ្សសាមគ្គីអភិវឌ្ឍន៍ មាតុភូមិកម្ពុជា និង ឯកឧត្តម​បណ្ឌិត សួន សេរីរដ្ឋា ប្រធានក្រុមប្រឹក្សាភិបាល វេទិកាសន្តិភាពកម្ពុជា បាន​អញ្ជើញ​ជា​អធិបតី​ពិធី​ប្រុងពលី កម្មវិធីដារលាន ដាល់អំបុកឈ្នះឈ្នះលើកទី៤ នៅក្រុងរុនតាឯកតេជោសែន ខេត្ដសៀមរាប និងមាន​ការ​អញ្ជើញ​ចូល​រួម​ពី​អាជ្ញាធរ​ខេត្ត​ក្រុង​ និង​អ្នក​ពាក់​ព័ន្ធ​ជា​ច្រើន​រូប​ផង​ដែរ។ ពិធី​ដារលានដាល់អំបុកឈ្នះឈ្នះ នឹងរៀបចំឡើងនៅថ្ងៃទី២៩ខែធ្នូឆ្នាំ២០២៤នេះ។

ក្រោយ​ពេលបញ្ចប់ពិធីប្រុងពាលី ឯកឧត្ដមបណ្ឌិត សួន សេរីរដ្ឋា មានប្រសាសន៍ថា ពិធីដារលាន ដាល់​អំបុកឈ្នះឈ្នះនេះ ធ្វើឡើងជាលើកទីបួន ដើម្បីអបអរវេទិកាសន្ដិភាព ដែល​បាន​ចាប់​កំណើតតាំ​ងពីឆ្នាំ២០២១ ដែលមកដល់ថ្ងៃទី២៩​ខែ​ធ្នូ​នេះ​មាន​រយៈ​ពេល​បួន​ឆ្នាំ។ ឯកឧត្ដម​បាន​បន្ដ​ថា ​កម្មវិធីដារលាន ដាល់អំបុកឈ្នៗ ជាពិធីមួយមិន​ត្រឹម​តែ​អរ​ថៃ​កំណើត​វេទិកា​សន្ដិភាព​នេះ​ទេ គឺធ្វើឡើងជាការផ្សព្វផ្សាយពីការកសាងសន្ដិភាព ពីគុណតម្លៃនៃ​សន្តិភាព​ និង​ផ្សព្វ​ផ្សាយ​ពី​កាតព្វ​កិច្ច​របស់ប្រជាពលរដ្ឋខ្មែរ ដែលបានចូលរួមការពារសន្តិភាព។បន្ថែមលើសពីនោះ ពិធីដារ​លាន​គឺ​ជាប្រពៃណីខ្មែរមានតាំងពីបុរាណកាលមកក្រោយពីប្រជាពលរដ្ឋបានប្រមូលផលស្រូវ ហើយ​ដាល់អំបុកឈ្នះឈ្នះគឺភ្ជាប់និងនយោបាយឈ្នះឈ្នះ របស់សម្ដេចតេជោហ៊ុន សែន អតីត​នាយករដ្ឋ​មន្ដ្រី ដែលបានសម្ដេចបានលបានលះបង់គ្រប់យ៉ាងដើម្បីរកសន្តិភាពជូនប្រទេសជាតិ ដូ​ច​នេះកម្មវិធីនេះ បានភ្ជាប់ប្រពីណៃនិងប្រវត្ដិសាស្ដ្រមរតកសន្ដិភាពសម្ដេចតេជោ។ឯកឧត្ដមថា កម្មវិធីនេះ សម្ដេចកិត្ដិសង្គហបណ្ឌិត ម៉ែន សំអន នឹងអញ្ជើញបញ្ជាន់ស្រូវជានិមិត្ដរូប និង​ដាល់​អំបុក ព្រមទាំងទស្សនាស្ដង់ពិព័រណ៌បន្លែត្រីសាច់ និងរាំវង់សន្ដិភាពផងដែរ។

កម្មវិធីដារលាន ដាល់អំបុកឈ្នះឈ្នះ នេះធ្វើឡើងជាលើកទី៤ ដែលលើក​ទី​១​ធ្វើ​នៅ​ខេត្ដ​កំព​ង់ឆ្នាំង លើកទី២នៅខេត្ដបន្ទាយមានជ័យ លើកទី៣នៅខេត្ដបាត់ដំបង និងលើកទី៤ នៅក្រុង​រុនតា​ឯកតេជោសែន ខេត្ដសៀមរាប។ឯកឧត្ដមបណ្ឌិត សួន សេរីរដ្ឋា បានបញ្ជាក់ថា កម្មវិធី​ធ្វើ​នៅក្រុង​រុនតាឯកតេជោសែននេះ ក៏ចង់បង្ហាញពីការអភិវឌ្ឍន៍រីកចំរើនរបស់ក្រុងនេះផងដែរ ដើម្បី​ឱ្យ​ក្រុម​អគតិនៃពួកប្រឆាំងជ្រុលនិយមបានឃើញ ព្រោះពួកគេតែង​តែចោ​ទ​ប្រកាន់ និង​មូល​បង្កាច់​រដ្ឋាភិបា​លថា យកប្រជាពលរដ្ឋមកទុកចោល។ ឯកឧត្ដមបន្ថែមថា ក្រុងរុនតាឯកតេជោសែននេះ មាន​ការ​អភិវឌ្ឍន៍យ៉ាងឆាប់រហ័ស ជាក់ស្ដែងសំណង់អគារ ផ្ទះប្រជាពលរដ្ឋ ជាពិសេស​ផ្សារ​ក្រុង​រុន​តាឯក​តេជោ​សែន មានភាពធំទូលាយជា​ង​គេក្នុ​ងចំ​ណោម​ផ្សារ​ក្នុង​ក្រុង​នៃ​ព្រះរាជា​ណា​ចក្រ​កម្ពុជា​៕