ពលរដ្ឋជាច្រើនត្រៀមចូលរួមព្រឹត្តិការណ៍«សាទរកម្ពុជា» ដែលគ្រោងចាប់ផ្តើមផ្លូវការនាថ្ងៃស្អែក

ព្រឹត្តិការណ៍ «សាទរកម្ពុជា» នឹងឈានចូលមកដល់ក្នុងថ្ងៃទី៣១ ខែធ្នូស្អែកនេះ ដែលនឹង​មាន​ការ​បង្ហាញ​ទស្សនីយភាពជាច្រើន ដូចជាក្បួនព្យុហយាត្រា​ជា​ដើម​ដើម្បី​បង្ហាញ​សិល្បៈ​វប្បធម៌​សម្បូរ​បែបរ​បស់​កម្ពុជា។ ខណៈប្រជាពលរដ្ឋដែលរស់នៅតំបន់ផ្សេងៗបានត្រៀមខ្លួនរួចជាស្រេច ដើម្បី​ចូល​រួម​អបអរសាទរក្នុងព្រឹត្តិការណ៍ដ៏អស្ចារ្យមួយនេះ។

កំពុងដើរទស្សនា និងថតរូបលេងកម្សាន្តនៅមុខព្រះបរមរាជវាំង កញ្ញា លីម ម៉ារី ជាពលរដ្ឋ​រស់​នៅ​ទី​ក្រុង​ភ្នំពេញ បានឲ្យព័ត៌មាន ប៊ីធីវី ដឹងថា កញ្ញាពិតជាសប្បាយរីករាយណាស់ នៅពេលដែល​កម្ពុជា​អាច​រៀបចំនូវព្រឹត្តិការណ៍ល្អៗជាបន្តបន្ទាប់ ដែលបង្ហាញពីឆន្ទៈ​រួបរួម​​គ្នាក្នុ​ង​ការ​បន្ត​រក្សា​សុខ​សន្តិភាព​ ក៏ដូចជាបង្ហាញនូវអ្វីដែលខ្មែរកំពុងមាន និងការរស់នៅប្រកប​ដោយ​ភាព​សម្បូរ​សប្បាយ​ក្រោម​ការ​ដឹកនាំដ៏ឆ្នើមរបស់រាជរដ្ឋាភិបាលកម្ពុជា។ ជាពិសេសការបង្ហាញពីររបរួម សាមគ្គីភាព​របស់​ខ្មែរ​តែមួយ។

ស្រដៀងគ្នានេះ ក្រុមប្រជាពលរដ្ឋដែលមកទស្សនាកម្សាន្តនៅមុខព្រះបរមរាជវាំងដែរ បាន​លើក​ឡើង​ថា ព្រោះតែកត្តាសុខសន្តិភាព ទើបធ្វើឲ្យកម្ពុជាអាចប្រារព្ធនូវព្រឹត្តិការណ៍ធំៗជាច្រើន បើ​គ្មាន​សន្តិភាព ក៏មិនអាចមានអ្វីៗគ្រប់យ៉ាងបានដូចគ្នាដែរ។ ប្រជាពលរដ្ឋ ក៏បានបន្ត​អំពាវនាវ​ដល់​មហា​ជន​អញ្ជើញចូលរួមក្នុងព្រឹត្តិការណ៍នេះឲ្យបានច្រើនកុះករ ដើម្បីមើលពីទិដ្ឋភាពទូទៅផ្សេងៗ និង​ការបង្ហាញពីវប្បធម៌យ៉ាងសម្បូរបែបរបស់ខ្មែរ។

សូមជម្រាបថា ព្រឹត្តិការណ៍ «សាទរកម្ពុជា» ឬ «Celebrating Cambodia» គឺជា​ព្រឹត្តិការណ៍​ថ្មី​មួយ​ថែម​ទៀត ដែលរៀបចំឡើងដោយ សហភាពសហព័ន្ធយុវជនកម្ពុជា (ស.ស.យ.ក.) ក្នុង​គោល​បំណង​ផ្សារភ្ជាប់ប្រជាជនទៅសង្គមជាតិទាំងមូល ដែលក្នុង​នោះ​តាមរ​យៈ​ការ​រៀប​ចំ​ព្រឹត្តិការណ៍ និងកម្មវិធីនានា។ ព្រឹត្តិការណ៍នេះ នឹងប្រារព្ធឡើងនៅថ្ងៃទី៣១ ខែធ្នូ ឆ្នាំ២០២៤ ហើយ​បន្ត​រហូតដល់វេលាឆ្លងឆ្នាំសាកល២០២៥ ស្ថិតនៅនៅតាមសួនច្បារប្របមាត់ទន្លេចតុមុខ រហូត​ដល់សួនច្បារមុខប្រាសាទច័ន្ទឆាយានៃព្រះបរមរាជវាំង ដែលនឹងមាន​អ្នក​ចូលរួម​ប្រមាណ​ជាង ៣០០០នាក់ ដើរដង្ហែ រួមទាំងការសម្តែងទស្សនីយភាពចម្រុះគ្រប់ទម្រង់ បង្ហាញ​ពី​ភាព​អស្ចារ្យ​នៃ​ប្រទេសកម្ពុជា៕ អត្ថបទ៖ ឈិត បូរ៉ាវី