នគរបាលខណ្ឌកំបូល ចុះផ្សព្វផ្សាយផលប៉ះពាល់នៃការប្រើប្រាស់គ្រឿងញៀន ច្បាប់ចរាចរណ៍ផ្លូវគោក និងអប់រំបញ្ហាក្មេងទំនើង

នគរបាលជំនាញនៃអធិការដ្ឋាននគរបាលខណ្ឌកំបូលសហការជាមួយ ប៉ុស្តិ៍​នគរបាល​រដ្ឋបាល​កំបូល បន្តចុះផ្សព្វផ្សាយ​អប់រំ អំពីផលប៉ះពាល់នៃការប្រើប្រាស់គ្រឿងញៀន ច្បាប់​ចរាចរណ៍​ផ្លូវ​គោក និងអប់រំបញ្ហាក្មេងទំនើង ដល់សិស្សានុសិស្ស។

ជាក់ស្ដែងនៅព្រឹកថ្ងៃទី ៣០ ខែធ្នូ ឆ្នាំ២០២៤នេះ លោកវរសេនីយ៍ឯក ហុង ពិសិដ្ឋ អធិការ នៃ​អធិការដ្ឋាន​នគរបាលខណ្ឌកំបូលបានដឹកនាំកម្លាំងនគរបាលជំនាញ ចុះផ្សព្វផ្សាយអប់រំ អំពី​ផល​ប៉ះពាល់​នៃ​ការប្រើប្រាស់គ្រឿងញៀន ច្បាប់ចរាចរណ៍ផ្លូវគោក និងអប់រំបញ្ហាក្មេងទំនើង ដល់​សិស្សា​នុសិស្ស នៃសាលាពិភពបញ្ញា ស្ថិតនៅភូមិផ្សារកំបូល សង្កាត់កំបូល ខណ្ឌកំបូល រាជធានី​ភ្នំពេញ​។

ក្នុងនោះដែរ វរសេនីយ៍ឯក ហុង ពិសិដ្ឋ អធិការ នគរបាលខណ្ឌកំបូល បានសំណេះសំណាល ជាមួយ​លោកគ្រូ អ្នកគ្រូ និងស្នើរសុំសហការជាមួយអាជ្ញាធរមានសមត្ថកិច្ចក្នុងមូលដ្ឋាន ដើម្បី​បង្ការ​ទប់ស្កាត់ រាល់បទល្មើសបានទាន់ពេលវេលា ជាពិសេសបញ្ហា ក្មេងទំនើង។

លោកឱកាសចុះផ្សព្វផ្សាយនេះដែរ លោកអធិកា បានឲ្យជំនាញពាក់ព័ន្ធនីមួយៗ ធ្វើការ​ពន្យល់​បញ្ជ្រាប​ ដល់សិស្សានុសិស្ស ឲ្យយល់ដឹងពី ផលប៉ះពាល់នៃគ្រឿងញៀន ច្បាប់ចរាចរណ៍ និង​បញ្ហា​ក្មេង​ទំនើង ដែលធ្វើឲ្យប៉ះពាល់ដល់ ខ្លួនឯង គ្រួសារ និងសង្គមជាតិ។

គួរបញ្ជាក់ផងដែរ កាលពីពេលថ្មីៗ កន្លងទៅនេះ ប្រមុខរដ្ឋាភិបាល បាន​ដាក់​បញ្ជា​ឲ្យ​អាជ្ញាធរ​រាជ​ធានី-ខេត្ត បង្កើនពង្រឹង បង្ការទប់ស្កាត់ បន្ថែមទៀត ជាពិសេស ត្រូវសហការ​ជាមួយ​គណៈ​គ្រប់​គ្រង​សាលា ចុះផ្សព្វផ្សាយ ដល់សាលារៀន៕ អត្ថបទ៖ កុម្ភៈ