[UPDATE] តុលាការកូរ៉េខាងត្បូង ចេញដីកាចាប់ខ្លួនលោកប្រធានាធិបតី Yoon

អាជ្ញាធរស៊ើបអង្កេតបាននិយាយថា តុលាការកូរ៉េខាងត្បូង នៅថ្ងៃអង្គារ (៣១ ធ្នូ) នេះ បានអនុម័តដីកាចាប់ខ្លួនលោកប្រធានាធិបតី Yoon Suk Yeol ដែលត្រូវបានចោទប្រកាន់ទម្លាក់តំណែង និងផ្អាកពីអំណាច ជុំវិញការសម្រេចចិត្តដាក់ច្បាប់អាជ្ញាសឹកកាលពីថ្ងៃទី០៣ ខែធ្នូ របស់លោក។

ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ CIO បានបញ្ជាក់ថា តុលាការទីក្រុងសេអ៊ូល ប្រចាំតំបន់ខាងលិច បានអនុម័តដីកាដែលស្នើដោយអ្នកស៊ើបអង្កេត ទទួលបន្ទុកពិនិត្យមើលការដាក់ច្បាប់អាជ្ញាសឹករយៈពេលខ្លីរបស់លោក Yoon ។

ប្រព័ន្ធផ្សព្វផ្សាយក្នុងស្រុកបានឱ្យដឹងថា នេះជាដីកាចាប់ខ្លួនដំបូងហើយ ដែលចេញសម្រាប់ប្រធានាធិបតីកំពុងកាន់អំណាចនៅកូរ៉េខាងត្បូង។ គេមិនទាន់ដឹងច្បាស់ទេថា តើដីកាចាប់ខ្លួនលោក Yoon នឹងត្រូវអនុវត្តនៅពេលណា ឬដោយរបៀបណានះ។ សេវាសន្តសុខប្រធានាធិបតីកូរ៉េខាងត្បូង បាននិយាយនៅក្នុងសេចក្តីថ្លែងការណ៍មួយនៅថ្ងៃអង្គារនេះថា ខ្លួននឹងចាត់ចែងដីកានេះតាមដំណើរការសមស្រប។

ការិយាល័យ CIO និយាយថា តុលាការក៏បានអនុម័តដីកាឆែកឆេរនិវេសនដ្ឋានរបស់លោក Yoon ផងដែរ។ កន្លងមក នគរបាលបានព្យាយាមចូលឆ្មក់ឆែកឆេរការិយាល័យប្រធានាធិបតី ជាផ្នែកមួយនៃការស៊ើបអង្កេតរបស់ខ្លួន ប៉ុន្តែមិនបានជោគជ័យទេ ដោយសារតែសេវាសន្តិសុខប្រធានាធិបតីរារាំងមិនឱ្យចូល៕