ពិព័រណ៍ម្ហូបអាហារនិងពិធីបុណ្យឆ្លងឆ្នាំសកលនៅខេត្តបាត់ដំបងទាក់ទាញទេសចរជាង ៣៦ម៉ឺននាក់

បាត់ដំបង៖ ព្រឹត្តិការណ៍ពិព័រណ៍ម្ហូបអាហារខ្មែររយៈពេល៣ថ្ងៃ និងការអបអរសាទរពិធីបុណ្យឆ្លងឆ្នាំសកល២០២៤-២០២៥ មានបងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ សរុបចំនួន ៣៦៤ ០៥៥ នាក់ មកទស្សនាកម្សាន្តសប្បាយនៅខេត្តបាត់ដំបង ដែលចំនួននេះ មានការកើនឡើង ២,៩៣% បើធៀបឆ្នាំ២០២៣។

លោក ហម អរុណ អនុប្រធានមន្ទីរ និងជាអ្នកនាំពាក្យនៃមន្ទីរទេសចរណ៍ខេត្តបាត់ដំបង ថ្លែងឱ្យដឹងថា កំណើនភ្ញៀវទេសចរជាតិ និងអន្តរជាតិមកទស្សនាកម្សាន្តនៅខេត្តបាត់ដំបងដោយសាររាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តី រក្សាបាននូវសុខសន្តិភាពពេញលេញធ្វើឱ្យប្រទេសជាតិមានការអភិវឌ្ឍរីកចម្រើនជាបន្តបន្ទាប់ ប្រជាពលរដ្ឋបានរស់នៅប្រកបដោយភាពសុខដុមរមនាក្រៃលែង។

ជាមួយគ្នានោះ ប្រជាពលរដ្ឋ និងអាជីវករ បានលើកឡើងថា ការរៀបចំព្រឹត្តិការណ៍ពិព័រណ៍ម្ហូបអាហារនេះឡើងពិតជាមានារំខាន់ខ្លាំងណាស់ក្នុងការលើកកម្ពស់ការផ្សព្វផ្សាយម្ហូបអាហារ ​និងផលិតផលខ្មែរឱ្យភ្ញៀវទេសចរជាតិ និងអន្តរជាតិបានស្គាល់កាន់​តែច្បាស់​ពីវប្បធម៌ប្រពៃណីរបស់អ្នកខេត្តបាត់ដំបង។

ប្រជាពលរដ្ឋ និងអាជីវករ គូសបញ្ជាក់ថា ការរៀបចំព្រឹត្តិការណ៍កម្សាន្តសប្បាយបែបនេះអាចធ្វើ ទៅបានដោយសារប្រទេសកម្ពុជាមានសុខសន្តិភាព និងការអភិវឌ្ឍ។

ប្រជាពលរដ្ឋ និងអាជីវករ ថ្លែងអំណរគុណដល់រដ្ឋបាលខេត្តបាត់ដំបង ដែលបានរៀបចំឱ្យមានព្រឹត្តិការណ៍ពិព័រណ៍ម្ហូបអាហារនេះឡើង និងចង់ឱ្យមានព្រឹត្តិការណ៍បែបនេះនៅឆ្នាំបន្តបន្ទាប់ទៀត។

សូមរំលឹកថា ក្រោមគំនិតផ្ដួចផ្ដើមរបស់ឯកឧត្តម សុខ លូ អភិបាលខេត្តបាត់ដំបង រដ្ឋបាលខេត្តបាត់ដំបង បានរៀបចំព្រឹត្តិការណ៍ពិព័រណ៍ម្ហូបអាហារ និងបង្អែមខ្មែររយៈពេល៣ថ្ងៃ ចាប់ពីថ្ងៃទី២៩-៣១ ខែធ្នូ ឆ្នាំ២០២៤ ដើម្បីអបអរសាទរពិធីបុណ្យឆ្លងឆ្នាំសកល២០២៤-២០២៥ និងលើកកម្ពស់ការផ្សព្វផ្សាយផលិតផលខ្មែរ ក៏ដូចជាបង្កបរិយាកាសសប្បាយរីករាយ​ជូនដល់ប្រជាពលរដ្ឋ ភ្ញៀវទេសចរជាតិ និងអន្តរជាតិ៕